3 ¿Mintiꞌpe bajsbil teju tyola mintiꞌ tajben? ¿Ti ma tzaj tiꞌja tuꞌnju in yolina icju?

4 Nokwit akeye in che yajlanjtz ic tzaꞌn weye, icxwitlo weye jacu chin yoline ic tzaꞌn cyeye, tzinwitlo in xi nyucun nwiꞌye te xmaybil cyiꞌje ex tzinwitlo in nmaꞌne nok nicꞌpunxi yol.

5 Jacwitlo txi nmaꞌne yol tuj cheba ex te kꞌukbabl cycꞌuꞌje tuꞌn tcyuwset cycꞌuꞌje ex tuꞌn tten cyipune.

6 Ka ma chin yoline, mintiꞌ in chewix cꞌixcꞌoj wiꞌje, ex ka mintiꞌ in chin yoline ax icx mintiꞌ in chewix cꞌixcꞌoj wiꞌje.

7 Ma baj wipune tuꞌn Dios; cycyakil keju ateꞌ tuj njaye ma che naj tuꞌn,

8 ex ma chin ocx tkꞌoꞌn tuj pres. Ma jaw yol mya baꞌn wiꞌje tuꞌn; ma jaw sibj yol wiꞌje tuꞌn.

9 Cucx tkꞌojin Dios wiꞌje ex ma chin baj ttzakin, in kitxꞌitxꞌin t-xe teꞌ wiꞌje, nok ax nnoꞌc baj tbakꞌ twitz wiꞌje ic tzaꞌn jun aj kꞌoj.

10 Nim xjal in jaw cychmon cyib wiꞌje, nok in xi cynachꞌin cytziꞌ tuꞌn cytzeꞌn wiꞌje, nnoꞌc cyjatoꞌn nwitze ex in che ilin wiꞌje.

11 Ma chinx tkꞌoꞌn Dios tuj cykꞌab xjal mya baꞌn ex jawni cywitz.

12 Atintoke tuj txubtxaj; tzaj ttzyuꞌn tiꞌj nkule; in tzyete tuꞌn ex in cub tpaẍuꞌn, oc t-xoꞌn tplech wiꞌje.

13 Tuj tcyakil pacꞌ in tzaj t-xoꞌn tplech wiꞌje; in che ocx ke tplech tuj nchibjale ex mintiꞌ chꞌin tkꞌakꞌbil tcꞌuꞌj wiꞌje, ex nneꞌl chitj tuj ncꞌuꞌje twitz txꞌotxꞌ.

14 Nimcu ẍil nnoꞌc wiꞌje tuꞌn, in tzaj tzokpaj wiꞌje ic tzaꞌn jun kꞌojlel.

15 Ma tzꞌoc nkꞌoꞌne xbalun chꞌiꞌx twitz wiꞌje tuꞌn nbise, ex kꞌukl kine tuj kuk tuꞌnju ma tzꞌel tiꞌn woclene.

16 Ma txi mal nwitze tuꞌn okꞌel; ma tzꞌoc muj tiꞌj tbakꞌ nwitze,

17 masque mintiꞌ o nbinchaye jun mya baꞌn cyiꞌj xjal, ex aju nnaꞌj Diose baꞌn taꞌ.

18 Aya txꞌotxꞌ, miꞌn cub tewana aju mya baꞌn o binchanjtz wiꞌje; ex miꞌn cub tewana ncubsbile tuꞌn t-xi binchet wiꞌje.

19 Atlo jun at tuj cyaꞌj tuꞌn tyolin wiꞌje tuꞌn nclete,

20 tuꞌn t-xi tchicꞌbaꞌn te Dios ke nximbetze, tuꞌntzun ttzaj tqueꞌyin Dios taꞌl nwitze;

21 atlo jun in yolin twitz Dios wiꞌje, ic tzaꞌn nnoꞌc jun xjal yolil tiꞌj jun tucꞌil tuꞌn tbant tiꞌj twitz juntl xjal.

22 Aju chꞌintl wabkꞌiyile atx, jurat niban tbaj, chꞌix ttzyet nbeye ex mlay chin ajtz meltzꞌaje.