2 Ntxlaje oꞌcx ke xjal xmayil ateꞌ; in che oc tzokpaj wiꞌje tucꞌil cytxꞌuꞌjil.

3 Pero aya Nman yolina wiꞌje; ¿alcyetzun juntl ka mya aya jacu binchante?

4 Aya o tzꞌel tzpet-sante cynabl, miꞌn takꞌa ambil tuꞌn tcub wiꞌje cyuꞌn.

5 Ke xjal nok tuꞌn pwak in xi cycꞌayin ke cyamiw, tzul yajbil cyiꞌj cycꞌwaꞌl tuꞌn jlu.

6 Ma tbinchaya tuꞌn cyxmayin xjal wiꞌje, ex tuꞌn toc cytzuban tuj nwitze.

7 Niban toc muj cyiꞌj tbakꞌ nwitze tuꞌn taꞌw; jumajx ma tzꞌoc wiꞌje.

8 Ke xjal tzꞌaklxix in che jaw labin wiꞌje oc woc queꞌyine cyuꞌn; in tzaj cykꞌoj ex in chin oc cykꞌoꞌn te jun aj il.

9 In cymaꞌn ka tzꞌaklxix ke ex mintiꞌ cybinchben mya baꞌn.

10 Pero cytzaje cycyakile ex mlay cnet jun xjal wuꞌne cyxole atwit tnabl.

11 Chꞌix tjapun baj tuj nkꞌije, aju in cub nximane ex aju wajbile tuꞌn tbant mintiꞌ in japun.

12 Atzun cye nnoꞌc cykꞌoꞌn konicꞌan ic tzaꞌn kꞌijl; masque at klolj pero in cymaꞌn chꞌix tul spicꞌun.

13 Aju weye in chin ayon tiꞌj, oꞌcx tuꞌn npone tuj cynajbil cyimni ex tuꞌn ncub paleꞌye tuj kxopin.

14 Aju mukbil mer ic tzaꞌn nmane cꞌoquel, atzun ke ẍukꞌ mer ic tzaꞌn ntxuꞌye ex wanbe.

15 ¿Jatum baꞌn toc keꞌ ncꞌuꞌje? ¿Jatum baꞌn tcnet kꞌukbabl ncꞌuꞌje?

16 ¿Ocpe cbelex kꞌukbabl ncꞌuꞌje junx wucꞌile tuj cynajbil cyimni, tuꞌntzun wojlane junx tucꞌil tuj kuk?