2 Che bitzane bitz te nimbil te. Ex che yoline cyiꞌj ke tbinchben maꞌ cyxilen.

3 Che tzalajxe tiꞌj tbi xjan. Tzalajxwit cyanmi keju in che jyon tiꞌj Kman.

4 Che lakꞌexe tucꞌil Kman tuꞌntzun ttzaj tkꞌoꞌn cyipumale; che lakꞌexe tucꞌil tcyakil maj.

5 Cynaꞌntze ke tbinchben maꞌ cyoclen ex nim cyipumal, ex cynaꞌntze ke tley tzaj tmaꞌn;

6 akeye tiyjil Abraham aju tmajen Dios ex akeye tcꞌwaꞌl Jacob scꞌoꞌmaj keꞌye tuꞌn.

7 Atzun Kman jlu aju Kdios ex in cawin tibaj tcyakil twitz txꞌotxꞌ.

8 Masque ma tzicꞌ jun mil cꞌloj cyiyjil xjal, pero mlay tzicꞌ tnaꞌl tuꞌn aju tyol cyaj bant tiꞌj cyucꞌil,

9 ex mlay tzicꞌ tnaꞌl tuꞌn aju tyol cyaj bant tiꞌj tucꞌil Abraham, ex aju tyol axix toc xi ttziyan te Isaac;

10 cyaj tcyuwsaꞌn ju yol lu te Jacob tuꞌn toc ic tzaꞌn jun ley, ex cyaj tcyuwsaꞌn te jumajx te Israel,

11 tej tmante: Teya cxel nkꞌoꞌne aju txꞌotxꞌ Canaán tuꞌn toc te tetzbila.

12 Mya nim cybaj tej cyten tuj cytxꞌotxꞌ aj Canaán ex stranjer xjal ke,

13 nok e betjeꞌ tuj cytxꞌotxꞌ ke nasyon ex e ten tjakꞌ cycawbil ke rey,

14 pero mintiꞌ xi tkꞌoꞌn Dios ambil tuꞌn cyyajlanjtz cyuꞌn mastl xjal, nokpe xi tmaꞌn cye rey:

15 Miꞌn tzꞌoc cykꞌoꞌne cykꞌabe cyiꞌj ke xjal scꞌoꞌmaj wuꞌne ex miꞌn che oc tene yajlal cye ke nsanjele.

16 Tzaj weꞌyaj tuꞌn Dios tuj txꞌotxꞌ Canaán, ex el tiꞌn tcyakilju in ajben te cywa.

17 Pero nej xi samaꞌn José tuꞌn Dios tuj txꞌotxꞌ Ejipt, aju otok txi cycꞌayin tuꞌn toc te cymajen xjal.

18 O cꞌixbisanjtz tuꞌn caden oc kꞌoꞌn tiꞌj tkan, ex oc tcꞌaloꞌn tkul tuꞌn cꞌuxbil te presbil te.

19 Oc José tuj malbil tuꞌn tyol Kman maxi tej tjapun baj ju yol otok tma te tjakꞌxi.

20 Aju rey in cawin cyibaj nimcu xjal xi tmaꞌn tuꞌn ttzokpet José;

21 ex oc tkꞌoꞌn te nejenel tuj tja tuꞌn toc tcwentin tcyakilju at te,

22 tuꞌntzun t-xi tkꞌoꞌn xnakꞌtzbil cye ke nejenel ex cye ke tij xjal tuꞌn toc nim cynabl.

23 Te tibajxi pon Israel, aju ax Jacob tbi, ex o najan ic tzaꞌn jun stranjer xjal tuj txꞌotxꞌ Ejipt, aju cytxꞌotxꞌ tiyjil Cam.

24 E chmet-xix ke tiyjil Jacob tuꞌn Dios, ex oc mas cyipun cywitz aj Ejipt.

25 Pero te tibajxi chꞌexpet cyanmi aj Ejipt tuꞌn Dios, e oc ten yajlal cyiꞌj ke xjal etzan tuꞌn, ex e oc ten sbul cye ke tmajen.

26 Xitzun t-samaꞌn Dios Moisés aju tmajen, tucꞌix Aarón aju otok jaw t-scꞌoꞌn,

27 ex tuꞌn Dios cybincha ke techal cyucꞌix ke binchben nim cyipumal tuj txꞌotxꞌ Ejipt.

28 Tzaj t-samaꞌn Dios klolj ex biꞌx cub kloljix tuj tcyakil part, pero mintiꞌ xi cyniman aj Ejipt tyol Dios.

29 E oc ke nima tuꞌn te chicꞌ, ex biꞌx e naj cycyakil cyiẍ;

30 baj noj tuj txꞌotxꞌ cyuꞌn ke ẍal, tucꞌix tuj tja rey.

31 Tzaj t-samaꞌn Dios txkan xmisak ex sak us, ex biꞌx baj noj twitz cytxꞌotxꞌ aj Ejipt cyuꞌn.

32 Te t-xel jbal tzaj t-samaꞌn sakbakun tucꞌix tkan kꞌancyok tibaj txꞌotxꞌ Ejipt.

33 Biꞌx e naj ke tkan uva ex ke tkan higo awaꞌn cyuꞌn; cyucꞌix ke tzeꞌ biꞌx e naj tuj Ejipt.

34 Tzaj t-samaꞌn Dios txkan ẍplon nimxix wen ex miban cyajlanjtz.

35 Baj cywaꞌn tcyakil chaꞌx cꞌul tuj cojbil, tucꞌix tcyakil awal.

36 E cyim ke nej cycꞌwaꞌl aj Ejipt tuꞌn, tujile junjun ja xjal.

37 E jeꞌtztzun tiꞌn Dios ke xjal etzan tuꞌn kꞌiꞌn kꞌan pwak tucꞌix sak pwak cyuꞌn, ex mi jun o baj tipun cyxol junjun cꞌloj cyiyjil.

38 Biꞌx e jaw tzalaj ke aj Ejipt tej cyqueꞌyinte cub be cyuꞌn, tuꞌnju otok tzaj nim t-xobil cyiꞌj.

39 Cub tlicꞌun Dios jun muj cyibaj tuꞌn cybet tjakꞌ, ex tzaj t-samaꞌn jun tkan kꞌakꞌ tuꞌn t-spicꞌbante cyibaj te konicꞌan.

40 Xi cykanin cychiꞌ te Dios, ex tzaj t-samaꞌn ke tzꞌuchin te cychiꞌ, ex noj cycꞌuꞌj tuꞌn wabj tzaj t-samaꞌn Dios twitz cyaꞌj.

41 O pax pic tuꞌn ex etz aꞌ tuj ex o bet ic tzaꞌn jun nima tuj tzkij txꞌotxꞌ.

42 Tzaj tnaꞌn aju yol xjan otok txi ttziyan te Abraham aju tmajen.

43 Cyjaꞌtzun tten e jeꞌtz tiꞌn Dios ke xjal etzan tuꞌn, ex keju scꞌoꞌmaj tuꞌn in che bitzan ex in che schꞌin tuꞌn tzalajbil.

44 Xi tkꞌoꞌn txꞌotxꞌ cye, aju cytxꞌotxꞌ mastl nasyon, tucꞌix tcyakil cyawal ex tcyakilju cyakꞌunben,

45 tuꞌntzun t-xi cyniman aju tley Kman ex tuꞌn cyjapun ke tmandamyent cyuꞌn.

Nimanxwit tbi Kman.