2 tcyakil tiꞌja at t-spicꞌumala, tuꞌna xi tlicꞌuna cyaꞌj ic tzaꞌn in xi licꞌet jun xbalun.

3 Cub tkꞌukbaꞌna ke tkan tjaya cyibaj ke aꞌ twitz cyaꞌj. In che oc tkꞌoꞌna ke muj te tcarwaja, ex aju cykꞌikꞌ in ajben te ikal teya.

4 Nnoꞌc tkꞌoꞌna ke cykꞌikꞌ te t-sanjela, ex nnoꞌc tkꞌoꞌna tkan kꞌancyok te tmajena.

5 Cub tkꞌoꞌna txꞌotxꞌ tibaj tkꞌukbil tuꞌntzun miꞌn tyucch tuj tlugar.

6 Aju twitz txꞌotxꞌ biꞌx cyaj tjakꞌ nintz mar maꞌ t-xeꞌ, ic oc mar ic tzaꞌn jun xbalun in xi licꞌet, ex makset tcyakil twitz txꞌotxꞌ tuꞌn. Ke nmak witz biꞌx e cyaj tjakꞌ aꞌ.

7 Pero tej t-xi tmayoꞌna aꞌ, jurat naj el ok tej tbinte tyola ic tzaꞌn kꞌancyok in julin.

8 Icꞌ aꞌ cyibaj ke witz ex cuꞌpun cyibaj ke chkꞌajlaj tuꞌn tpon tuj lugar jatum banimaj tuꞌn tcyaj ten,

9 ex ax pon tuj tmojonil xi tmaꞌna te, tuꞌntzun mi tnoj juntl maj tibaj txꞌotxꞌ tuꞌn.

10 Tuꞌna in che jatz jlet ke twi aꞌ ex in che canun cyuj ke nima in che bet cyxol ke witz.

11 Tiꞌjtzun aꞌ lu in che cꞌan ke jil te tjakꞌ cꞌul; ex tuꞌntzun aꞌ lu in weꞌ txketleꞌn cyiꞌj ke chej te tjakꞌ cꞌul.

12 Cytziꞌ ke nima in bant cykꞌuꞌ ke chyuꞌj; ex atzun in che kꞌajt ke cyxol tkꞌab tzeꞌ.

13 Tuꞌna in tzaj jbal cyibaj ke witz ex max in tzaj tuj tjaya twitz cyaꞌj; in tzaj tkꞌoꞌna nim aꞌ twitz cyaꞌj tuꞌn tchaꞌxix txꞌotxꞌ.

14 Tuꞌna in chꞌiy cꞌul te cywa alumaj, ex tuꞌna in chꞌiy tawal xjal in cuꞌx tawaꞌn tuꞌntzun twaꞌn tiꞌj ju in tzaj tkꞌoꞌn txꞌotxꞌ;

15 in cnet twa tuꞌn toc tipun, tucꞌix taꞌl twitz uva te *** tuꞌn ttzalaj, tucꞌix aseyt tuꞌn tkoptzꞌaj twitz.

16 In che aꞌlinjtz ke tzeꞌ wiꞌten twi witz Líbano, akeju cuꞌx tawaꞌn Kman.

17 Cywiꞌ ke tzeꞌ lu in bant cykꞌuꞌ ke chyuꞌj, atzun ke garza in che najan cywiꞌ ke tzaj.

18 Cywiꞌ ke nmak witz ateꞌ ke chip te tjakꞌ cꞌul, ex cywitz ke pic in xi cyewan cyib ke cwatusa.

19 O tbinchaya xjaw te techal junjun tkꞌijlalil, ex aju kꞌij baꞌn tuꞌn jnicꞌ or tuꞌn tex.

20 Tuꞌna in tzaj tkꞌoꞌna klolj oc nnoꞌc konicꞌan, ex atzun in che etz ke jil te tjakꞌ cꞌul betel.

21 In che tzanun ke balun tiꞌj cycanb; ex in che kanin te Dios tuꞌn ttzaj kꞌoꞌn cychiꞌ.

22 Octzun tjawil kꞌij in che aj meltzꞌaj ex in che cub buneꞌ tuj cyjul.

23 Atzun cye xjal in che ex akꞌnal tiꞌj cyakꞌun ex max in xi cycolin ocxi tex kꞌij.

24 Nimcu tbinchbena o bant Nman. Tcyakil o bant tuꞌna tuꞌnju at nim tnabla; nojni twitz txꞌotxꞌ tuꞌn tchꞌisbena.

25 Lu mar at maꞌ twitz ex matij wen jatum in che chmet nimcu jil; at jil chꞌin ex at nmak;

26 atzun in che bet ke barc tibaj, ex atzun taꞌ aju nintz txcup Leviatán tbi, aju tbinchaya tuꞌn t-schan tuj mar.

27 Cycyakil jlu in che ayon tiꞌja tuꞌn cyxi tcꞌaꞌchana oc tpon tajben cye.

28 In xi tkꞌoꞌna cywa ex in xiꞌ cyuꞌn; nim cywa in xi tkꞌoꞌna ex in noj cycꞌuꞌj wen.

29 Oc in che cyaj tcolina, biꞌx in che jaw xob, ex oc nneꞌl tiꞌna cyxew, biꞌx in che cyim ex in che oc juntl maj te tkukil txꞌotxꞌ.

30 Pero oc ttzaj t-samaꞌna t-xewa in che pokꞌl, ex cyjaꞌtzun acꞌaj nnoꞌc juntl maj twitz txꞌotxꞌ tuꞌna.

31 Cucxwit tten tajwalil Kman te jumajx, ex tzalajxwit tiꞌj tcyakil tbinchben.

32 Biꞌx in tzaj luꞌlun txꞌotxꞌ oc in xi tqueꞌyin Kman tiꞌj; ex biꞌx nneꞌl bukin sib cyiꞌj ke witz oc cyoc tmacoꞌn.

33 Oc chin bitzale te Kman aju Ndiose acux itzꞌx kine.

34 Cuchiwt tuꞌn ttzalaj Kman tiꞌj nximbetze, porque oꞌcx tucꞌil in tzaj ntzalajbile.

35 Cuchiwt tuꞌn cynaj ke aj il twitz txꞌotxꞌ, ex cuchiwt che naj keju binchal mya baꞌn.

Cxel nkꞌoꞌne chjonte te Kman tuꞌn tcyakil wanmiye. Nimanxwit tbi Kman.