2 Cxel nkꞌoꞌne chjonte te Kman tuꞌn tcyakil wanmiye; mlay tzicꞌ tnaꞌl wuꞌne tcyakilju t-xtalbil in tzaj tkꞌoꞌn weye.

3 Ate Kman in cub najsante tcyakil wile, in chin banixe tuꞌn tuj tcyakil nyabile.

4 Ate Kman in clonte weye te camic ex txolin wiꞌje tuꞌn tcꞌujlalil ex tuꞌn tkꞌakꞌbil tcꞌuꞌj.

5 In tzaj tkꞌoꞌn nimcu baꞌn weye tuꞌn toctl wipune, ic tzaꞌn tipun jun cuꞌxun, ex ic tzaꞌn tipun jun tꞌiw.

6 In tbinchaꞌn Kman aju tzꞌaklxix, ex tuj tumelxix in xi tbinchaꞌn cyiꞌj keju in che yajlanjtz.

7 Xi tchicꞌbaꞌn te Moisés alcye t-ximbetz tuꞌn tbant tuꞌn, ex xi tyecꞌun cye aj Israel ke tbinchben nim cyipumal.

8 In kꞌakꞌan tcꞌuꞌj Kman kiꞌj ex in tzꞌeꞌy tcꞌuꞌj kiꞌj; nim tpasens kiꞌj ex nim tcꞌujlalil.

9 Mya cucx in ko oc ticꞌleꞌn, ex mintiꞌ in ten tkꞌoj te jumajx.

10 Mintiꞌ in cub tkꞌoꞌn kcastiw ic tzaꞌn cyajlal kil ex ke kbinchben mya baꞌn.

11 Ic tzaꞌn te cyaꞌj lekꞌch tjaw tibaj txꞌotxꞌ, ax icx te Dios nim tcꞌujlalil cyiꞌj keju in che niman te.

12 Ic tzaꞌn tjawitz kꞌij ex telex kꞌij najchak cyxol, ax icxtzun ke kil najchak ma tzꞌel tlakꞌbaꞌn Dios kiꞌj.

13 Ic tzaꞌn jun mambaj in tzaj tzꞌeꞌy tcꞌuꞌj cyiꞌj tcꞌwaꞌl, ax icx te Kman in tzaj tzꞌeꞌy tcꞌuꞌj cyiꞌj keju in che niman te.

14 Porque ojtzkiꞌn tuꞌn alcye banin koꞌ tiꞌj: baꞌn tuꞌn tkukil txꞌotxꞌ koꞌ.

15 Aju tankꞌibl xjal ic tten ic tzaꞌn cꞌul nok chꞌin in ten; ex ic tzaꞌn jun bech tuj cojbil jurat in tzaj pokꞌl;

16 oc nnicꞌ cykꞌikꞌ tibaj, biꞌx in naj tuꞌn ex mlay cyil xjal juntl maj.

17 Atzunte Kman tcꞌujlalil cucx tten te jumajx cyiꞌj ke xjal in che niman te, ex cucx tbinchante aju tzꞌaklxix cye cycyakil cꞌloj xjal ojtxi ex keju che ul itzꞌj te tibajxi,

18 cye keju in japun tyol cyuꞌn, aju cyaj bant tiꞌj tuꞌn cyucꞌil cyxeꞌchel, ex mintiꞌ nnicꞌ tnaꞌl cyuꞌn tuꞌn t-xi cyniman ke tmandamyent.

19 Ma cub tkꞌoꞌn Kman tkꞌukbil te tcawbil tuj cyaꞌj, ex in cawin tibaj tcyakil.

20 Cykꞌonxe chjonte te Kman akeye anjel at nim cyipune ex in cybinchaꞌne aju in tzaj kꞌmaꞌn cyeye, ex tocxix cywiꞌye tiꞌj tyol tuꞌn t-xi cynimane.

21 Cykꞌonxe chjonte te Kman akeye ateꞌye tuj cyaꞌj nim cyajlale ex in che ajbene te, ex in bant aju tajbil cyuꞌne.

22 Cykꞌonxe chjonte te Kman cycyakile binchaꞌn keye tuꞌn, ateꞌye tuj tcyakil lugar te tcawbil.

Cxel nkꞌoꞌne chjonte te Kman tuꞌn tcyakil wanmiye.