2 Miꞌn txi tewan tiba nwitze oc in tzaj yajbil wiꞌje; bix chin tzaj tbiꞌna, bix chin tzaj ttzakꞌweꞌn naja oc ntxocone tiꞌja.

3 Porque jurat in baj nchwinklale ic tzaꞌn sib, in che tzaj julin nbakile mer ic tzaꞌn kꞌakꞌ,

4 niban tbaj tipun wanmiye ic tzaꞌn cꞌul in tzkij; ex mintiꞌtl nganiye tuꞌn nwaꞌne.

5 niban toc lacꞌeꞌ ntzꞌumile cyiꞌj nbakile tuꞌn tlaj nimxix in chin ayayane.

6 Ic ntene ic tzaꞌn jun ẍin at tuj tzkij txꞌotxꞌ, ex ic tzaꞌn jun xitxꞌ at cyxol ke ja o che baj xitj.

7 Mintiꞌ in chin tane. Ic ntene ic tzaꞌn jun chyuꞌj tjunalx tjax twi ja.

8 Mintiꞌ in xi cycolin aj kꞌoj tuꞌn cyyasun wiꞌje, ex in ajben nbiye cyuꞌn tuꞌn t-xi cykanin mya baꞌn tiꞌj juntl xjal.

9 Te t-xel pan in xi nwaꞌne tzaꞌj; ex in baj t-smon tib taꞌl nwitze tuj ncꞌaye

10 tuꞌn tlaj tkꞌoja ex ttxꞌuꞌjila. Ma chin jaw ttzyuꞌna ex te tibajxi ma chin ex t-xoꞌna.

11 Aju nchwinklale ic tten ic tzaꞌn xlecun in cub naj; in chin oc tzkije ic tzaꞌn cꞌul.

12 Atzun teya Nman, in cawina te jumajx; cucx ctzajel naꞌn tbiya.

13 Weꞌctza, kꞌakꞌantz tcꞌuꞌja tiꞌj tnam Sión porque ma japun baj tkꞌijlalil; ma pon or tuꞌn tcub tnajsaꞌna til.

14 In che bisun ke tmajena cyiꞌj ke abj ateꞌ tuj tnam, ex in tzaj taꞌw tuj cyanmi cyiꞌj ke ttxꞌakan buy cub.

15 Cycyakil nasyon ex ke rey ateꞌ twitz txꞌotxꞌ cjawil cynimsaꞌn tbi Kman tbanilxix

16 oc tjaw tbinchaꞌn juntl maj aju tnam Sión ex oc tyecꞌunte tib tuj tajwalil.

17 Ctzajel tbiꞌn cynaꞌj Dios keju otok che cyaj colin nej ex ctzajel tbiꞌn aju cycubsbil.

18 E tcyaj tzꞌibet jlu te cye ke xjal che ul itzꞌj te tibajxi, tuꞌntzun tjaw cynimsaꞌn tbi Kman.

19 Max tuj cyaꞌj tzaj tqueꞌyin Kman; twitz txꞌotxꞌ tzaj tqueꞌyin max tuj tja xjan,

20 tuꞌn cytzaj tbiꞌn keju ateꞌcx pres in che okꞌ ex tuꞌn cyclet keju tcub cysentens tuꞌn cycyim;

21 tuꞌntzun tpacbanjtz tbi Kman tuj Sión ex tuꞌn tjaw nimset tbi tuj tnam Jerusalén,

22 oc toc cychmon cyib ke xjal najl cyuj cycyakil nasyon cyucꞌix ke rey, tuꞌn cycꞌulun te.

23 Tuꞌn ma tzꞌel tiꞌn wipune tuj be; ma tzꞌoc tlakꞌbaꞌn tuj nkꞌije.

24 Xi nmaꞌne te cyjaꞌ: Nman Dios, miꞌn takꞌa ambil tuꞌn ncyim naje naꞌnxtok tjapun wabkꞌiyile. Atzun teya mintiꞌ bajsbil te tabkꞌiyila.

25 Cub tkꞌukbaꞌna twitz txꞌotxꞌ atxix t-xe tnejel; tuꞌnxa o bant cyaꞌj.

26 Tcyakil jlu cnajel, atzun teya cucx ctela te jumajx. Tcyakil jlu cbajel ic tzaꞌn jun xbalun; tuꞌna cchꞌexpetel, ex biꞌx cchꞌexpetelx ic tzaꞌn jun xjal in baj tchꞌexpuꞌn t-xbalun.

27 Atzun teya cucx ttena te jumajx, ex mintiꞌ bajsbil te tabkꞌiyila.

28 Ke cycꞌwaꞌl tmajena oc che ankꞌil tuj segurxix, ex ke cyiyjil che bel ten twitza te jumajx.