3 Octzun tchmoꞌn David cycyakil aj Israel tuj Jerusalén tuꞌn ticꞌ lakꞌbat cax cꞌubl tley Dios, tuꞌn tpon tuj lugar otok baj tbinchaꞌn. 4 Ax icx oc tchmoꞌn David cycyakil tiyjil Aarón ex ke aj Leví. 5 Ke tiyjil Coat japun jun syent tucꞌil winkin cybaj, ex aju nejenel cye, atzun Uriel. 6 Ke tiyjil Merari japun cab syent tucꞌil winkin cybaj, ex aju nejenel cye, atzun Asaías. 7 Atzun ke tiyjil Gersón japun jun syent tucꞌil 30 cybaj, ex aju nejenel cye, atzun Joel. 8 Ke tiyjil Elizafán japun cab syent cybaj, ex aju nejenel cye, atzun Semaías. 9 Atzun ke tiyjil Hebrón japun 80 cybaj, ex aju nejenel cye, atzun Eliel. 10 Atzun ke tiyjil Uziel japun jun syent tucꞌil cablaj cybaj, ex aju nejenel cye, atzun Aminadab.

11 E tzajtzun ttxcoꞌn David ke pal Sadoc ex Abiatar, ax icx e tzaj ttxcoꞌn junjun aj Leví, ex atzun ke jlu: Uriel, Asaías, Joel, Semaías, Eliel ex Aminadab, 12 ex xi tmaꞌn cye: Como akeye nejenel cyxol junjun cꞌloj tiyjil Leví, cyxjansaꞌn baj cyibe, cyucꞌix ke cyermaniye, tuꞌntzun ticꞌ cylakꞌbaꞌne cax cꞌubl tley Kman, aju Kdios aj Israel koꞌ, ex tuꞌn tul cyiꞌne tuj lugar banimaj wuꞌne; 13 porque tnejel maj mya a keye e tzaj kꞌinte cax cꞌubl tley Dios, cyjaꞌtzun cub kcastiw tuꞌn Kman, ex tuꞌnju mintiꞌ xi kkanin te alcye mer tumel.

14 Bajtzun cyxjansan cyib ke pal ex ke aj Leví tuꞌntzun ticꞌ lakꞌbat cax cꞌubl tley Dios, aju Cydios aj Israel. 15 Ex atzun ke aj Leví e tzaj kꞌinte cax cꞌubl tley Dios, ex cykꞌoꞌn ke tzeꞌ cyuj ke argoy ateꞌc ttxlaj cax ex tzaj cyikan cax twi cysemil, ic tzaꞌnx otok cyaj tmaꞌn Moisés, aju kꞌmamaj te tuꞌn Kman.

16 Ax icx xi tmaꞌn David cye nejenel cye aj Leví tuꞌn tjaw cyscꞌoꞌn junjun cyerman ex tuꞌn t-xi kꞌot cyoclen tuꞌn cybitzan, ex tuꞌn cychimban cyiꞌj chnab, quitar, arpa ex ke tal lak cꞌuxbil, ex tuꞌn toc cykꞌajtzaꞌn in che tzalaj wen. 17 Atzun cye aj Leví oc cykꞌoꞌn toclen Hemán aju tcyꞌajal Joel, tucꞌix Asaf aju tcyꞌajal Berequías, aju at t-xilen tucꞌil Hemán; ex cyxol ke tiyjil Merari oc cykꞌoꞌn toclen Etán aju tcyꞌajal Cusaías, ax at t-xilen tucꞌil Hemán ex Asaf. 18 Ax icx oc kꞌoꞌn cyoclen juntl cꞌloj te onil, ax at cyxilen cyucꞌil keju otok che oc kꞌoꞌn tnejel, ex atzun ke jlu: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, tucꞌix Obed-edom ex Jehiel, akeju xkꞌukil ttzi ja.

19 Akeju bitzal, Hemán, Asaf ex Etán, tuj cycwent taꞌ tuꞌn toc cykꞌajtzaꞌn ke tal lak kꞌan cꞌuxbil, 20 atzun cye Zacarías, Aziel, Semiramot, Jehiel, Uni, Eliab, Maasías ex Benaía, kꞌiꞌmlex quitar cyuꞌn tuꞌn toc cykꞌajtzaꞌn tkꞌajkꞌajel tzinin twiꞌ. 21 Atzun cye Matatías, Elifelehu, Micnías, Obed-edom, Jeiel ex Azazías, kꞌiꞌntok arpa cyuꞌn tuꞌn toc cykꞌajtzaꞌn tkꞌajkꞌajel julin twiꞌ te tmoj cybitz keju in che bitzan. 22 Atzunte Quenanías nejenel cye ke bitzal aj Leví, ex ax tcyajsaꞌn te nejenel tuꞌn tjaw jucꞌet bitz, porque attok nim tnabl tiꞌj. 23 Atzunte Berequías tucꞌix Elcana, cwentil te cax cꞌubl tley Kman. 24 Atzun ke pal Sebanías, Josafat, Natanael, Amasai, Zacarías, Benaía ex Eliezer, atzun ke in che kꞌajtzan chun twitz cax cꞌubl tley Dios. Ax icx cye Obed-edom tucꞌix Jehías, cwentil cax ke.

25 Atzunte David cyucꞌix ke tij xjal cyxol aj Israel ex ke nejenel cye jun milchak soldad, e jeꞌx tja Obed-edom tucꞌil nim tzalajbil kꞌilte cax cꞌubl tley Dios. 26 Ex tuꞌnju ate Dios onin cyiꞌj aj Leví tej ticꞌ lakꞌbat cax cꞌubl tley Dios, cyjaꞌtzun xi cykꞌoꞌn wuk tal tor ex wuk tman ẍneꞌl te chojbil. 27 Ex toctok jun tcapiẍay David tbanilxix, ax icx cye cycyakil aj Leví, akeju kꞌiꞌn cax cyuꞌn, ex ke bitzal, ax icx te Quenanías aju nejenel tiꞌj bitz cyxol ke bitzal; cycyakil ke jlu toc cyxbalun ẍjoꞌw tbanilxix, ax icx toctok jun tcapiẍay David tbanilxix banin tiꞌj xbalun lino. 28 Cyjaꞌtzun tten xi cyiꞌn aj Israel cax cꞌubl tley Dios, in che schꞌin tuꞌn tzalajbil, ex nnoꞌc cykꞌajtzaꞌn tcach ẍneꞌl ex chun ex ke tal lak cꞌuxbil, tucꞌix quitar ex arpa.

29 Tejtzun tpon cax cꞌubl tley Dios tuj tnam toc tbi Ttanmi David, ate Mical aju tmeꞌjel Saúl etz tqueꞌyin ttzi ventan, ex o til lu rey David in bixantok tucꞌil tzalajbil, ex tzajtzun jun icꞌbil tuj tanmi tiꞌj David.