O tajbe David tuꞌn ticꞌ tiꞌn cax cꞌubl tley Kman
6
Octzun tchmoꞌn David juntl maj ke soldad scꞌoꞌmaj ke cyxol aj Israel, ex 30 mil japun cybet; 2 etztzun tuj tnam Baala tuj Judá, cyucꞌix cycyakil ke soldad ateꞌ tucꞌil, ex cub cyximan tuꞌn ticꞌ cylakꞌbaꞌn ju cax cꞌubl tley Dios jatum in cub tyecꞌun tib Kman, aju Tajaw Tcyakil, aju tcub tkꞌukbil cyibaj ke querubín.3-4 Jaxtzun cykꞌoꞌn ju cax tibaj jun carret acꞌaj ex icꞌ cyiꞌn tuj tja Abinadab, aju tcubtok ttxaꞌn twiꞌ jun tal witz. Akeju tcyꞌajal Abinadab, Uza tucꞌix Ahío, nejni ke twitz carret tjax cax cꞌubl tley Dios tibaj, ex ate Ahío nejni twitz cax. 5 Atzunte David ex cycyakil aj Israel in che bitzan ex in che bixun tucꞌil tcyakil cyipun te nimbil te Kman, tucꞌil t-sonil chnab arpa, ex ke quitar, ex tal tampor, ex ke tzoꞌc, ex ke lak cꞌuxbil in che kꞌajt wen oc toc kꞌajtzaꞌn jun tiꞌj juntl. 6 Tejtzun cypon tuj lugar jatum nneꞌl tbakꞌ triw teju xjal Nacón tbi, e cub mejtzꞌaj ke wacẍ, cyjaꞌtzun xi tnukpiꞌn Uza tkꞌab tiꞌj tcax Kman tuꞌn miꞌn tex tzꞌak. 7 Atzunte Kman tzaj tkꞌoj tiꞌj Uza tuꞌnju mya xoꞌn ju cax tuꞌn, ex ax cyim Uza tuꞌn Kman, axtzun cub tzꞌak ttxlaj cax cꞌubl tley Dios.
8 Mya baꞌn eꞌla tuj twitz David tuꞌnju otok cyim Uza tuꞌn Kman, cyjaꞌtzun oc tkꞌoꞌn tbi ju lugar lu Pérez-Uza, ex axtzun tbi tocsaꞌn jaꞌlo. 9 Tujx kꞌij lu tzaj nim t-xobil David twitz Dios ex tma: ¿Ti tten tuꞌn t-xi wiꞌne cax cꞌubl tley Kman tuj njaye? 10 Tuꞌn jlu mintiꞌ o tajbe tuꞌn t-xi tiꞌn ju cax tuj tnam tocsaꞌn tbi Ttanmi David, ex xi tmaꞌn tuꞌn t-xi kꞌiꞌn tuj tja Obed-edom, aju xjal aj Gat. 11 Ox xjaw o ten cax cꞌubl tley Kman tuj tja Obed-edom, atzunte Kman cub cyꞌiwlante te cyucꞌix cycyakil keju ateꞌ tuj tja.
Pon tiꞌn David cax cꞌubl tley Dios tuj Jerusalén
12 Tej tbinte rey David ka tuꞌn tlaj cax cꞌubl tley Kman otok che cub cyꞌiwlaꞌn keju ateꞌ tuj tja Obed-edom tucꞌix tcyakilju at te, xiꞌ tucꞌil nim tzalajbil ex etz tiꞌn cax cꞌubl tley Dios tuj tja Obed-edom tuꞌn tpon tuj tnam tocsaꞌn tbi Ttanmi David. 13 Tej otok txiꞌ kak t-xol cykan ke xjal ikalte cax cꞌubl tley Kman, cub tbyoꞌn David jun tor te chojbil, tucꞌix jun ẍneꞌl ulni tnabl.
14 Toctok jun tcapiẍay David tbanilxix ex in bixun tuꞌn tcyakil tipun te nimbil te Kman; 15 tzaꞌnx te David, ax icx ke aj Israel kꞌiꞌn tcax Kman cyuꞌn, in che schꞌin tucꞌil tzalajbil ex in che kꞌajtzaꞌn cyiꞌj chun.
16 Tejtzun tpon kꞌiꞌn cax cꞌubl tley Kman tuj tnam tocsaꞌn tbi Ttanmi David, ate Mical aju t-xuꞌjil David ex tmeꞌjel Saúl etz tqueꞌyin ttzi ventan, lu rey David in tꞌicpaj ex in bixun te nimbil te Kman; ex tzaj jun icꞌbil tuj tanmi Mical tiꞌj David.
17 Aju cax cꞌubl tley Kman xi kꞌiꞌn ex cub kꞌoꞌn tuj tlugaril tuj jun ja xbalun otok baj tbinchaꞌn David tuꞌn tajben te. Te tibajxi cub tbyoꞌn David ke wacẍ te chojbil te Kman, ax icx xi tkꞌoꞌn ke chojbil te mojbabl tib tucꞌil Kman, 18 ex t-xilenxitzun tkꞌoꞌn ke chojbil, e cub tcyꞌiwlaꞌn David ke tnam xjal tuj tbi Kman aju Tajaw Tcyakil. 19 Ex cye cycyakil aj Israel akeju ax ateꞌtok, tzaꞌnx ke xuꞌj ax icx ke xinak, xi tkꞌoꞌn jun pan te teyle junjun, ex jun piẍ cychiꞌ ex jun cyloꞌ twitz uva tzkij. Tbajlenxi jlu e ajtz cycyakil ke xjal cyja.
20 Ax icx te David aj tja tuꞌn cycub tcyꞌiwlaꞌn cycyakil keju ateꞌ tuj tja. Atzunte Mical aju tmeꞌjel Saúl etz canol tiꞌj ex tma:
—Cyeꞌyex te rey cye aj Israel ma tbincha jaꞌlo, ma tzꞌel tiꞌn t-xbalun cywitz ke cycryad ke tmajen xinak, ic tzaꞌn nok alcye xjal mintiꞌ chꞌin tchꞌixwi.
21 Atzunte David xi ttzakꞌweꞌn:
—Ax toc ma chin bixune, pero te nimbil te Kman ma chin bixune, aju jaw scꞌonte weye te t-xel tmana ex te cyxel cycyakil keju ateꞌ tuj tjaya, tuꞌn woque te nejenel cye aj Israel akeju etzan tuꞌn, ictzun in chin bixune twitz. 22 Ax icx mas cbel nmansin wibe twitz jaꞌlo; ex chin oquele ic tzaꞌn mintiꞌ woclene tuj twitza, pero chin jawil nimsaꞌne cyuꞌn keju majen txin lu, akeju in tmaꞌna, chi David.
23 Atzunte Mical aju tmeꞌjel Saúl, mintiꞌ tal o tzaj tuj tcyakil tankꞌibl.