O yolin David tiꞌj tuꞌn ttzaj kꞌit cax cꞌubl tley Dios tuꞌn tul tuj Jerusalén
13
Xi tkanin David tconsej cye ke nejenel cye soldad, akeju at jun milchak soldad tuj cycwent, ax icx cye keju at jun syentchak soldad tuj cycwent, 2 ex te tibajxi xi tkanin cye cycyakil tnam xjal aj Israel cyjaꞌ: Ka baꞌn tuj cywitze, ex ka ic tajbil Kman Dios, ¿baꞌnpe tuꞌn tex jun tkanil cye ke kerman ateꞌ tuj tcyakil txꞌotxꞌ cye aj Israel, ex cye cycyakil pal ex aj Leví, akeju ateꞌ cyuj cytanmi ex cyuj aldey, tuꞌn cytzaj ktxcoꞌn, ex tuꞌn toc cychmon cyib junx kucꞌil, 3 tuꞌntzun ttzaj kiꞌn cax cꞌubl tley Kdios? Porque atxix tuj tcwent Saúl cyaj kcolin ex mintiꞌ nnuꞌl tiꞌj kcꞌuꞌj, chi David. 4 Cycyakil tnam xjal baꞌn eꞌla tuj cywitz tuꞌn tbinchet icju, porque tuj ttxolil eꞌla jlu tuj cywiꞌ.Icꞌ tiꞌn David cax cꞌubl tley Dios
5 Oc tchmoꞌn David cycyakil aj Israel, tzajx keꞌ jatum taꞌ tkꞌab xak Sihor tbi, aju toc te mojón tucꞌil Ejipt, ex pon baj max jatum nnoꞌcx tbeyil tnam Hamat, tuꞌntzun t-xi kꞌibaj cax cꞌubl tley Dios tuj tnam Quiriat-jearim. 6 Xiꞌtzun David cyucꞌix cycyakil aj Israel tuj tnam Quiriat-jearim, aju ax juntl tbi Baala, aju taꞌ tuj cytxꞌotxꞌ tiyjil Judá, tuꞌntzun ticꞌ lakꞌbat cax cꞌubl tley Dios jatum in tzaj naꞌt tbi Dios, aju najl cyxol ke tilbilal querubín. 7 Jaxtzun cykꞌoꞌn cax tibaj jun carret acꞌaj ex icꞌ cyiꞌn tuj tja Abinadab; ate Uza tucꞌix Ahío nejni ke twitz carret. 8 Atzunte David cyucꞌix cycyakil aj Israel in che bixan twitz Kman tuꞌn tcyakil cyipun, ex in che bitzan tucꞌil tkꞌajkꞌajel cywiꞌ chnab arpa, quitar, tal tampor, lak cꞌuxbil ex chun. 9 Tejtzun cypon tuj lugar Quidón tbi, jatum nneꞌl bujet triw, e cub mejtzꞌaj ke wacẍ, ex atzunte Uza xi tnukpiꞌn tkꞌab tuꞌn ttzaj ttzyuꞌn cax. 10 Pero tzaj tkꞌoj Kman tiꞌj Uza tuꞌnju oc tmacoꞌn cax cꞌubl tley Dios, ex ax tuj lugar lu biꞌx cyim Uza tuꞌn Kman.
11 Atzunte David mya baꞌn eꞌla tuj twitz tuꞌnju otok cyim Uza tuꞌn Kman, cyjaꞌtzun oc tkꞌoꞌn tbi lugar lu Pérez-uza, ex axtzun tbi tocsaꞌn jaꞌlo. 12 Tujx kꞌij lu tzaj nim t-xobil David twitz Dios ex tma: Ka ic ttenju ¿tzaꞌn tten tuꞌn t-xi wiꞌne cax cꞌubl tley Dios tuj njaye? 13 Cyjaꞌtzun mintiꞌ pon tiꞌn David cax cꞌubl tley Dios tuj lugar toc tbi Ttanmi David, nok oꞌcx xi tmaꞌn tuꞌn t-xi cyiꞌn tuj tja Obed-edom aju aj Gat. 14 Ox xjaw cyaj ten cax cꞌubl tley Dios tuj tja Obed-edom, ex e cub tcyꞌiwlaꞌn Kman cycyakil keju ateꞌ tuj tja Obed-edom ex tcyakilju at te.