E pon t-samaꞌn Hiram ke t-sanjel tucꞌil David
14
E pon t-samaꞌn Hiram aju rey cye aj Tiro ke t-sanjel tucꞌil David, cyucꞌix ke albañil ex ke calpinter ex pon cyiꞌn tzeꞌ wiꞌten tuꞌn tjaw cybinchaꞌn tja rey. 2 El tnicꞌ David tiꞌj ka ate Kman oc kꞌonte te te rey cyibaj aj Israel, porque puro baꞌn eꞌla tcawbil tuꞌn Dios, nok tuꞌnju at tcꞌujlalil Dios cyiꞌj aj Israel, akeju etzan tuꞌn.Ke mastl tcꞌwaꞌl David
3 Cnet mastl t-xuꞌjil David tuj Jerusalén, ex tzajtzun mastl tcyꞌajal ex tmeꞌjel. 4 Atzun cybi ke tcyꞌajal e itzꞌj tuj Jerusalén jlu: Samúa, Sobab, Natán, Salomón, 5 Ibhar, Elisúa, Elpelet, 6 Noga, Nefeg, Jafía, 7 Elisama, Beeliada, ex Elifelet.
Cub cyiꞌj aj Filistey tuꞌn David
8 Tejtzun cybinte aj Filistey ka otok tzꞌoc kꞌoꞌn David te rey cyibaj cycyakil aj Israel, cycyakiltzun e jeꞌx jyolte David tuꞌn ttzyet cyuꞌn, pero tej tbinte David jlu, etz kꞌojlel cyiꞌj. 9 E pontzun ke aj Filistey ex xi cytxolban cyib tuꞌn cykꞌojin tuj chkꞌajlaj Refaim. 10 Xitzun tkanin David te Kman:
—¿Baꞌnpe tuꞌn woc tzokpaje cyiꞌj aj Filistey, ex jacupe onina wucꞌile tuꞌn tcub cyiꞌj?
Atzunte Kman tzaj ttzakꞌweꞌn:
—Toc tzokpaja cyiꞌj, porque chin onile tucꞌila tuꞌn tcub cyiꞌj tuꞌna. 11 Jaxtzun David tuj Baal-perazim, cyucꞌix ke t-soldad, ex atzun cub cyiꞌj tuꞌn. Ex tmatzun David cyjaꞌ: Ic tzaꞌn jun nima in chꞌiy wen ex tcyakil in xi tikan, cyjaꞌxtzun ma che tenba ke aj kꞌoj wiꞌje tuꞌn Kman tej ẍe naj, chi David. Ex cyjaꞌtzun oc cykꞌoꞌn tbi ju lugar lu Baal-perazim. 12 Ax icx cyaj cyxoꞌn aj Filistey ke tilbilal nnoꞌc cydiosin, atzunte David xi tmaꞌn tuꞌn cycub patit.
13 Atzun cye aj Filistey e oc tzokpaj juntl maj cyiꞌj ke xjal tuj chkꞌajlaj Refaim. 14 Cyjaꞌtzun xi tkanin David juntl maj te Dios. Atzunte Dios tzaj ttzakꞌweꞌn cyjaꞌ:
—Miꞌn txiꞌya kꞌojlel cyiꞌj jatum cyjaꞌ cytzaj, mas baꞌn t-xiꞌya kꞌol welt cyiꞌjxi ex toc tzokpaja cyiꞌj oc tpona cyjakꞌ ke tzeꞌ bálsamo. 15 Oc t-xi tbiꞌna cywiꞌ ke tzeꞌ mer ic tzaꞌn tkꞌajkꞌajel kambaj in che bet, jurattzun txiꞌ naja kꞌojlel cyiꞌj, porque atzun jun techal ka akine chin bel nej twitza tuꞌn tcub cyiꞌj ke soldad aj Filistey wuꞌne.