Oc David te cyrey aj Israel ex te cyrey aj Judá
5
Te yajxitl, cycyakil cꞌloj cyiyjil aj Israel e jeꞌx tuj Hebrón tuꞌn cyyolin tucꞌil David, ex xi cymaꞌn te: Ax t-xjalila koꞌye. 2 Ax toc, masque atok Saúl toc te kreye, pero aya oc te nejenel cye aj Israel tej cyex tuj kꞌoj. Ex ate Kman tzaj ttziyan ka aya tuꞌn toc te nejenel ex cawil cyibaj aj Israel akeju etzan tuꞌn, che chi aj Israel.3 Cyjaꞌtzun tten, cycyakil ke cytijil xjal aj Israel e jeꞌx yolil tucꞌil rey David tuj Hebrón, atzunte David bant tiꞌj jun tyol cyucꞌil, ex oc cykꞌoꞌn Kman te testiw tiꞌj. Octzun cykꞌoꞌn toclen David te rey tuꞌn tcawin cyibaj. 4 Toctok David twiꞌ 30 abkꞌi tej toc te rey, ex o cawin 40 abkꞌi. 5 Wuk abkꞌi tucꞌ mey o ten tuj Hebrón tuꞌn tcawin cyibaj aj Judá, ex 33 abkꞌi o ten tuj tnam Jerusalén tuꞌn tcawin cyibaj cycyakil aj Israel ex cyibaj aj Judá.
Tzyet cwartel tuꞌn David tuj tnam Sión
6 Ate rey David cyucꞌix ke t-soldad e jeꞌx tuj Jerusalén kꞌojlel cyiꞌj aj Jebusey, akeju najlketok tuj txꞌotxꞌ lu. Pero tuj cywitz aj Jebusey ka mlay xcyeꞌ David tuꞌn tocx tuj tnam, ex cyma: Mlay tzꞌoctza tzalu, nokpe ke moẍ ex ke cox jacu che xcyeꞌ tiꞌja tuꞌn miꞌn toctza. 7 Masque cyma icju, pero tzyet tuꞌn David aju cwartel cubsaꞌn twi witz Sión, ex atzun tbi tnam jaꞌlo Ttanmi David. 8 Tej naꞌnxtok ttzyet kꞌoj tuꞌn David otok tma cyjaꞌ: Cycyakil keju ma cheꞌx kꞌojlel cyiꞌj aj Jebusey che oquex tuj tbe aꞌ nnoꞌcx tujxi cwartel, tuꞌntzun tcub cybyoꞌn ke moẍ ex ke cox, akeju icꞌun wuꞌne, chi David. Atzun tzajni jlet ju tal twitz yol: Mi ke moẍ ex mi ke cox, mlay che ocx tuj tja Dios. 9 Xiꞌtzun David tuj cwartel tuꞌn tnajan tuj, ex oc tkꞌoꞌn tbi ju tnam lu Ttanmi David; ax icx jaw tbinchaꞌn muro tuꞌn toc tiꞌjele, xi keꞌ tiꞌj lugar otok baj nojsaꞌn tuj tuꞌn toc te chkꞌajlaj, ex pon baj max tiꞌj tja rey.
Xi t-samaꞌn rey Hiram ke t-sanjel tucꞌil David
10 Aju tipumal tcawbil David cyjaꞌ tchꞌiy, ex ate Kman at tucꞌil, aju Dios Tajaw Tcyakil. 11 Ate Hiram aju rey cye aj Tiro e jeꞌx t-samaꞌn ke t-sanjel tucꞌil David, ax icx e jeꞌx t-samaꞌn ke calpinter ex ke jasol abj, ex xi cyiꞌn ke tzeꞌ wiꞌten ex jaw cybinchaꞌn tja David. 12 Atzunte David el tnicꞌ tiꞌj ka ate Kman cyuwsante tcawbil cyibaj aj Israel, ex baꞌn eꞌla tcawbil tuꞌn Dios nok tuꞌnju at tcꞌujlalil cyiꞌj aj Israel akeju etzan tuꞌn.
Txkantl tcꞌwaꞌl David
13 Ticꞌlenxi David tuj tnam Hebrón tuꞌn tpon tuj tnam Jerusalén, cnet mastl t-xuꞌjil, cyjaꞌtzun tzaj mastl tcyꞌajal ex tmeꞌjel. 14 Ke tcꞌwaꞌl e itzꞌj tuj Jerusalén, atzun cybi jlu: Samúa, Sobab, Natán, Salomón, 15 Ibhar, Elisúa, Nefeg, Jafía, 16 Elisama, Eliada ex Elifelet.
Cub cyiꞌj aj Filistey tuꞌn David
17 Tejtzun cybinte aj Filistey ka otok tzꞌoc kꞌoꞌn toclen David te rey cyxol aj Israel, cycyakil e jeꞌx jyolte David tuꞌn ttzyet cyuꞌn, pero jurat naj tbi David, ex xiꞌ tuj jun lugar cyuw tten tuꞌn tclonte tib. 18 Atzun cye aj Filistey e pon lakꞌeꞌ ex e cub ten tuj chkꞌajlaj Refaim. 19 Tuꞌn jlu xi tkanin David te Kman:
—¿Baꞌnpe tuꞌn woc tzokpaje cyiꞌj aj Filistey? ¿Jacupe che tzaj tkꞌoꞌna tuj nkꞌabe tuꞌn tcub cyiꞌj wuꞌne?
Atzunte Kman tzaj ttzakꞌweꞌn:
—Baꞌn tuꞌn toc tzokpaja kꞌojlel cyiꞌj, porque che xel nkꞌoꞌne tuj tkꞌaba tuꞌn tcub cyiꞌj tuꞌna.
20 Pontzun David tuj Baal-perazim, ex atzun cub cyiꞌj tuꞌn. Cyjaꞌtzun tma: Ic tzaꞌn jun aꞌ in chꞌiy wen ex tcyakil in xi tikan, icxtzun ẍe tenba ke aj kꞌoj wiꞌje tuꞌn Kman tej ẍe naj. Cyjaꞌtzun oc tkꞌoꞌn David tbi lugar lu Baal-perazim. 21 Atzun cye aj Filistey cyaj cycolin ke tilbilal cydios tej cyel ok, atzunte David cyucꞌix ke t-soldad xi cyiꞌn.
22 Pero e cub ten juntl maj aj Filistey tuj chkꞌajlaj Refaim, 23 cyjaꞌtzun xi tkanin David te Kman alcye tuꞌn tbant tuꞌn. Atzunte Kman tzaj tmaꞌn:
—Miꞌn tzꞌoc tzokpaja kꞌojlel cyiꞌj jatum cyjaꞌ cytzaj, nok oꞌcx kꞌona welt tuꞌn toc tzokpaja ma cyiꞌjxi jatum ateꞌ ke tzeꞌ bálsamo. 24 Oc t-xi tbiꞌna tkꞌajkꞌajel kambaj cyxol ke tzeꞌ, biꞌxtzun txi naja kꞌojlel cyiꞌj, porque atzun jun techal ka akine chin bel nej twitza tuꞌn tcub cyiꞌj ke soldad aj Filistey wuꞌne.
25 Banttzun tuꞌn David ic tzaꞌnx otok tzaj tmaꞌn Kman te, ex e cub ke aj Filistey tuꞌn, tzajx keꞌ tuj Gabaón ex ul baj tuj Gezer.