4 Ex ate Jonatán aju tcyꞌajal Saúl attok jun tcyꞌajal, Mefi-boset tbi, ex coxtok ke tkan. Matok jweꞌ abkꞌi Mefi-boset tej ttzaj jun xjal tuj Jezreel kꞌmalte tkanil ka otok che cyim Saúl tucꞌix Jonatán. Tzajtzun kꞌiꞌn Mefi-boset tuꞌnju xuꞌj cwentil te ex el ok tucꞌil, pero tuꞌnju in kelan wen tej tel ok, el tzꞌak Mefi-boset tuꞌn, ex tuꞌntzun jlu biꞌx oc te cox.

5 Atzunte Recab tucꞌix Baana akeju tcyꞌajal Rimón aju aj Beerot, e jeꞌx tuꞌn cypon jatum taꞌ tja Is-boset, ex atzun e pon tuj or tej at nimtok taꞌw cyak, ex matok in tan Is-boset tbajlen waꞌn. 6 Aju xuꞌj xkꞌukil ttzi ja otok tzꞌoc ten saksal tuj triw, pero te tibajxi icꞌ tan, cyjaꞌtzun tten e ocx Recab tucꞌix Baana aju terman, ex mi aꞌl jun o queꞌyinte cye. 7 Tej cyocx tuj ja, lutok Is-boset in tan twi twatbil tuj cwart jatum in tan; cubtzun cybyoꞌn ex el cytxꞌemin twiꞌ, ex te tibajxi jlu xi cyiꞌn twiꞌ, ex tuj enter akꞌbil e bet tuj be tuj lugar Arabá tbi, 8 tuꞌntzun t-xi cykꞌoꞌn te David, tuꞌnju atzun taꞌtok David tuj tnam Hebrón. Ex xi cymaꞌn te cyjaꞌ:

—Tat Rey, lu twiꞌ Is-boset lu, aju tcyꞌajal Saúl, aju aj kꞌoj tiꞌja ex oc tilil tuꞌn tuꞌn tcyima tuꞌn. Pero jaꞌlo ma tzaj tkꞌoꞌn Kman ambil tuꞌn t-xelin tuꞌna tiꞌj Saúl, ex cyiꞌj ke tiyjil.

9 Xitzun ttzakꞌweꞌn David cye:

—Cxel nmaꞌne jun yol axix toc twitz Kman aju ma chin clete tuꞌn tuj tcyakil xobajil, 10 tej tpon jun xjal wucꞌile, tuj twitz ka jun baꞌn tkanil tuꞌn ttzaj tkꞌoꞌn weye, pon kꞌmalte ka otok cyim Saúl, pero tuꞌnju tkanil lu biꞌx tzyet wuꞌne ex cub nbyoꞌne tuj tnam Siclag. 11 Tuꞌn jlu ax cbantel wuꞌne cyiꞌje akeye binchal mya baꞌn, tuꞌnju ma cub cybyoꞌne jun xinak mintiꞌ til tej matok in tan tuj tex tja. Cyjaꞌtzun cchjetel cyuꞌne tuꞌnju ma cub cybyoꞌne Is-boset. Che najele wuꞌne tuꞌn miꞌn cytentle twitz txꞌotxꞌ.

12 Xitzun tkꞌoꞌn David orden cye keju at cyoclen ttxlaj, ex cyuꞌntzun ke jlu e cub byoꞌn; el cytxꞌemin ke cykꞌab cyucꞌix ke cykan, ex e jaw cyyoban jatum taꞌ nintz pil tuj tnam Hebrón. Te tibajxi tzaj cyiꞌn twiꞌ Is-boset ex cuꞌx cymakuꞌn tuj Hebrón, tujx tpantyón Abner.