2 Ke tcyꞌajal David e ul itzꞌj tej tten tuj tnam Hebrón, atzun ke jlu: Aju nej cꞌwaꞌl Amnón tbi, tal ju xuꞌj Ahinoam aju aj Jezreel; 3 aju tcabin Quileab tbi, tal ju xuꞌj Abigail aju t-xuꞌjilben ktzan Nabal aju aj Carmel; aju toxin Absalón tbi, tal ju xuꞌj Maaca aju tmeꞌjel Talmai aju rey te Gesur; 4 aju tcyajin Adonías tbi, tal ju xuꞌj Haguit; aju tjweꞌyin Sefatías tbi, tal ju xuꞌj Abital; 5 aju tkakin Itream tbi, tal ju xuꞌj Egla aju juntl t-xuꞌjil David. Atzun ke jlu e ul itzꞌj tej axtok taꞌ David tuj tnam Hebrón.

6 Cucxtok toc kꞌoj cyxol ke xjal ateꞌtok tucꞌil ktzan Saúl, cyucꞌil keju ateꞌtok tucꞌil David, ex cyxol ke xjal ateꞌtok tucꞌil ktzan Saúl oc mas tipun Abner. 7 Otok ten jun tcab t-xuꞌjil Saúl Rizpa tbi, tmeꞌjel jun xjal Aja tbi, ex xi tmaꞌn Is-boset te Abner:

—¿Tikuꞌn ma cub tana tucꞌil tcab t-xuꞌjil ktzan nmane?

8 Atzunte Abner tzaj nimxix tkꞌoj tiꞌj Is-boset tuꞌnju otok tma icju, ex xi ttzakꞌweꞌn cyjaꞌ:

—¿Baka txꞌyan kine tuꞌn wajbene cye aj Judá? Tuj tumelxix ma chin ajbene cye ke xjal ateꞌ tucꞌil Saúl aju ktzan tmana, ex cye ke xjal at t-xilen cyucꞌil ex cye ke tamiw, ex mintiꞌ xi nkꞌoꞌne tuj tkꞌab David; atzun teya ma jaw t-simina yol wiꞌje ka ma nbinchaye il tucꞌil jun xuꞌj. 9 Awt Kman cub kꞌonte ncastiwoye cyuwxix ka miꞌn ma bant wuꞌne tuꞌn wonine te David, tuꞌn tjapun aju tzaj ttziyan Kman te, 10 tuꞌn tel cyoclen ke tiyjil Saúl te rey, ex tuꞌn tcyuwset toclen David tuꞌn tcawin cyxol aj Israel ex aj Judá, ctzajelx keꞌ tuj Dan tuꞌn tpon baj max tuj Beerseba.

11 Atzunte Is-boset mintiꞌ xi ttzakꞌweꞌn, porque tzaj nim t-xobil twitz Abner. 12 Atzunte Abner xi t-samaꞌn ke sanjel kꞌmalte te David cyjaꞌ: ¿Al e ju txꞌotxꞌ lu? E tbant tiꞌj jun kyol kxol: Jacu chin onine teya tuꞌn cyul cycyakil aj Israel tucꞌila.

13 Atzunte David xi ttzakꞌweꞌn: Baꞌn, jacu bant tiꞌj jun kyol pero ka ma bant tuꞌna aju cxel nmaꞌne teya: Oc ttzaja queꞌyil weye, mlay tzula nwitze ka mya ucꞌin Mical tuꞌna, aju tmeꞌjel Saúl. 14 Ax icx xi t-samaꞌn David ke t-sanjel tucꞌil Is-boset, ex xi tmaꞌn te cyjaꞌ: Kꞌontza Mical weye, aju nxuꞌjile, aju in mojeꞌye tucꞌil nej ex o chjet wuꞌne tuꞌn jun syent ttzꞌumal cytzꞌaꞌlbil ke xjal aj Filistey e cub nbyoꞌne.

15 Xitzun tmaꞌn Is-boset tuꞌn tel xcꞌayin Mical twitz tchmil, aju Paltiel tbi, ex tcyꞌajal Lais; 16 atzunte Paltiel xi lpeꞌ tiꞌj t-xuꞌjil ex in okꞌtok tiꞌj, ex xi lpeꞌ tiꞌj tejxi tpon tuj tal tnam Bahurim. Ex atzun xi tmaꞌn Abner te tuꞌn taj meltzꞌaj, ex ajtzun meltzꞌaj Paltiel.

17 Te tibajxi o yolin Abner cyucꞌil ke cytijil xjal cyxol aj Israel ex xi tmaꞌn cye cyjaꞌ: Ma bet-xi kꞌij cyajbile tuꞌn toc David te cyreye. 18 Ma pon tkꞌijlalil jaꞌlo tuꞌn cybinchanteye jlu, porque ma tzaj ttziyan Kman te David cyjaꞌ: Tuꞌn David che cletel ke aj Israel; akeju etzan tuꞌn che cletel tjakꞌ cycawbil aj Filistey ex tuj cykꞌab cycyakil ke aj kꞌoj cyiꞌj.

19 Ax icx o yolin Abner cyucꞌil ke xjal tiyjil Benjamín, ex te tibajxi xiꞌ tuj tnam Hebrón tuꞌn t-xi tmaꞌn te David alcye cyajbil aj Israel, ex alcye cyajbil cycyakil tiyjil Benjamín. 20 Ucꞌin winkin xinak tuꞌn Abner tej tpon tuj tnam Hebrón jatum taꞌtok David, ex o bant jun nintz waꞌn tuꞌn David te Abner ex te cye keju tucꞌil ucꞌin tuꞌn. 21 Ex xitzun tmaꞌn Abner te David cyjaꞌ:

—Jaꞌlo baꞌn tuꞌn waje tuꞌntzun cyoc nchmoꞌne cycyakil aj Israel, tuꞌntzun tcyaj bant tiꞌj jun cyyol tucꞌila, Tat Rey, ex tuꞌntzun tcawina cyibaj ic tzaꞌnx tajbila.

Bajtzun cykꞌolben cyib David tucꞌil Abner, ex aj meltzꞌaj Abner in tzalaj wen.

22 Pontzun Joab cyucꞌix ke t-soldad David otok cheꞌx aj kꞌojlel, ex kꞌiꞌntok nimcu tiꞌxti cyuꞌn aju otok tzꞌel cyiꞌn cye aj kꞌoj. Ya mi aꞌltok te Abner tucꞌil David tuj tnam Hebrón, otok tzꞌaj meltzꞌaj in tzalaj wen tbajlenxi cykꞌolben cyib tucꞌil David. 23 Tej tpon Joab cyucꞌix cycyakil ke soldad in che bettok tucꞌil, xi kꞌmaꞌn te ka ate Abner aju tcyꞌajal Ner otok pon aj tucꞌil rey, ex otok tzꞌaj meltzꞌaj tbajlenxi cykꞌolben cyib tucꞌil rey. 24 Xiꞌtzun Joab tucꞌil rey, ex xi tmaꞌn te cyjaꞌ:

—¿Ti ma tbinchaya? Ma tzul aj Abner queꞌyil teya, ¿tikuꞌn ma tzꞌaj ttzokpiꞌna tuꞌn taj meltzꞌaj? 25 ¿Mintiꞌpetzun baꞌn tuꞌna, ate Abner aju tcyꞌajal Ner ma tzul aj nok tuꞌn tcub sbuꞌna tuꞌn, ex queꞌyilte jatum in beta, ex tuꞌn telxix tnicꞌ tiꞌj tcyakilju in tbinchaꞌna?

26 Ex tej tetz Joab tbajlenxi yolin tucꞌil David, xi t-samaꞌn ke sanjel jyolte Abner, ex mintiꞌtok bin David tiꞌj jlu, ex ajtz meltzꞌaj Abner cyuꞌn, max jatum taꞌ ju xoch Sira tbi. 27 Tejtzun tpon Abner tuj tnam Hebrón, xi kꞌiꞌn tuꞌn Joab tiꞌjxi tpwertil tnam tuꞌntzun tyolin tucꞌil tjunalx, ex atzun xi t-xayuꞌn jun cchil tuj tcꞌuꞌj, ex cyim tuꞌn tuꞌntzun t-xelin tuꞌn porque otok cub tbyoꞌn Abner Asael aju terman. 28 Tejtzun tbinte David jlu mas yajxi, tmatzun cyjaꞌ: Akine cyucꞌix keju ateꞌ tuj ncawbile mintiꞌ kile twitz Kman tiꞌj tcamic Abner aju tcyꞌajal Ner. 29 E tcub tzꞌak ju il lu tibaj Joab ex cyibaj cycyakil keju at cyxilen tucꞌil, ex cuchiwt tuꞌn cyten junjun cyxol yab ke tuꞌn poj in jaw tuj twiꞌ cytzꞌaꞌlbil, ex ka tuꞌn txꞌaꞌc mintiꞌ kꞌanbil tiꞌj, ex ka tuꞌn cyten cox, ex ka byoꞌn tuꞌn cycub, ex ka tuꞌn ticꞌx weꞌyaj cyuꞌn, chi David.

30 Ate Joab tucꞌix Abisai e cub byonte Abner, porque tuj ju kꞌoj oc tuj Gabaón otok cub tbyoꞌn Abner aju cyerman, aju Asael tbi.

31 Te tibajxi xi tmaꞌn David te Joab ex cye ke xjal ucꞌin tuꞌn: Cysbitꞌun ele cyxbalune ex cykꞌoꞌnque cyxbalune chꞌiꞌx twitz, ex che bisune tiꞌj tcyimlen Abner. Atzunte rey David xi lpeꞌ tiꞌj cax. 32 Ex atzun cuꞌx makuꞌn Abner tuj tnam Hebrón, atzunte rey oc ten okꞌel cyuwxix wen ttxlaj tmukbil Abner, ax icx e jaw okꞌ cycyakil tnam xjal. 33 Octzun ten rey bitzal jun bitz te bis tiꞌj Abner, ex chi cyjaꞌ:

Ax icx ke xjal cucx e oc ten okꞌel tiꞌj Abner. 35 E jeꞌxtzun cubsal cywitz twitz David tuꞌn t-xiꞌ chꞌin twa naꞌnxtok tex kꞌij, atzunte David xi tmaꞌn jun yol axix toc cyjaꞌ:

—Awt Dios cub kꞌonte ncastiwoye cyuwxix ka ma txi nnicꞌbeꞌne chꞌin pan ex ka juntl tiꞌxti ka naꞌnxtok tex kꞌij.

36 Cycyakiltzun el cynicꞌ tiꞌj jlu ex baꞌn ela tuj cywitz, porque tcyakil aju in tbinchaꞌn rey in che tzalaj xjal tiꞌj. 37 Tuj kꞌij lu, cycyakil aj Israel el cynicꞌ tiꞌj ka ate rey mintiꞌ toclen tiꞌj tcyimlen Abner aju tcyꞌajal Ner.

38 Xitzun tmaꞌn rey cye ke xjal at cyoclen ttxlaj:

—Jaꞌlo baꞌn cyuꞌne ma naj jun nejenel maꞌxix toclen cyxol aj Israel. 39 Cyjaꞌtzun, masque akine rey aju o jaw t-scꞌoꞌn Dios, pero ma nnaꞌye mintiꞌ wipune cywitz ke tal Sarvia, ex aju ma cybincha, jumajx mya baꞌn jlu. Ate Kman cꞌajel kꞌonte t-xel teju xjal ma binchante mya baꞌn lu.