—¿Baꞌnpe tuꞌn nxiꞌye tuj jun tnam cyxol ke tnam ateꞌ tuj Judá?

Atzunte Kman tzaj ttzakꞌweꞌn:

—Baꞌn tuꞌn t-xiꞌya.

Atzunte David tma:

—¿Jatum chin pole?

Atzunte Kman tzaj ttzakꞌweꞌntl:

—Txiꞌya tuj Hebrón.

2 Xiꞌtzun David cyucꞌix cabe t-xuꞌjil: Ahinoam tbi jun ex atzun tzajni tuj tnam Jezreel, atzun juntl Abigail tbi, aju t-xuꞌjilben ktzan Nabal aju aj Carmel. 3 Ax icx e jeꞌx tiꞌn ke tucꞌil cyucꞌix keju ateꞌ tuj cyja, ex axtzun e ten cyuj ke tnam nikayin ateꞌ tiꞌj tnam Hebrón. 4 E pontzun ke xjal aj Judá tucꞌil David ex oc cykꞌoꞌn toclen te rey tuj Judá.

Tejtzun tbinte David otok cuꞌx makuꞌn Saúl cyuꞌn aj Jabes aju tnam at tuj txꞌotxꞌ Galaad, 5 xi t-samaꞌn junjun sanjel kꞌmalte cye: Awt Kman cyꞌiwlante cyeye tuꞌnju ma cybinchaye xtalbil tiꞌj Saúl aju cyreye, tuꞌnju ma cuꞌx cymakuꞌne. 6 Ex awt Kman kꞌonte xtalbil cyeye ex cucx tuꞌn tjapun tyol cyucꞌile. Ax icx weye oc nbinchaꞌye baꞌn cyeye tuꞌnju ma cybinchaye baꞌn tiꞌj cyreye. 7 Jaꞌlo tenx cyipune ex miꞌn che xobe, masque ma cyim Saúl aju cyreye, pero ma tzꞌoc kꞌoꞌn woclene cyuꞌn aj Judá tuꞌn woque te cyrey.

8 Pero ate Abner aju tcyꞌajal Ner ex nejenel cye t-soldad Saúl tzaj tiꞌn Is-boset aju tcyꞌajal Saúl, ex xi tiꞌn tuj tnam Mahanaim, 9 ex atzun oc tkꞌoꞌn toclen tuꞌn toc te rey cyuj ke txꞌotxꞌ lu: Galaad, Gesuri, Jezreel, Efraín, Benjamín ex cye cycyakil aj Israel. 10 Otok japun Is-boset twiꞌ 40 abkꞌi tej ttzyet tcawin cyibaj aj Israel ex o cawin cab abkꞌi. Atzun cye tiyjil Judá, tocsaꞌntok David cyuꞌn te rey, 11 cyjaꞌtzun tten oc David te rey cye aj Judá tuj wuk abkꞌi tucꞌ mey, ex aju tnam jatum o cawin, atzun Hebrón.

12 Etztzun Abner aju tcyꞌajal Ner tuj tnam Mahanaim tuꞌn tpon tuj tnam Gabaón, nejni cywitz t-soldad Is-boset aju tcyꞌajal Saúl. 13 Ax icx te Joab aju tal Sarvia, cyucꞌix t-soldad David e etz tuj tnam Hebrón, ex atzun oc cycꞌulban cyib cyucꞌil, ttziꞌ nintz tanc te chmobl aꞌ tuj Gabaón. Ex cycabil cꞌloj soldad ax e cub weꞌ jatum chmoꞌn aꞌ, jun cꞌloj cub ten tuj jun pacꞌ ex juntl cꞌloj aj ten tuj juntl pacꞌ. 14 Xitzun tmaꞌn Abner te Joab:

—E cyetz junjun cuꞌxun tuꞌn cykꞌojin kwitz kcyakil.

—Ax baꞌn, chi Joab xi ttzakꞌweꞌn.

15 Cyjaꞌtzun, akeju tuꞌn cykꞌojin te cyxel aj Benjamín ex te Is-boset aju tcyꞌajal Saúl, e jeꞌtz cablaj xinak cyxol, ex cablaj e jeꞌtz cyxol ke t-soldad David. 16 Teyle junjun tzaj ttzyuꞌn aju taj kꞌoj tiꞌj tiꞌj ttzmal twiꞌ ex xi cyxayuꞌn cyspad tuj cyxuꞌc cyaj kꞌoj cyiꞌj; cyjaꞌtzun e cyim cycyakil. Tuꞌn jlu, aju lugar at tuj Gabaón oc tbi Cojbil jatum oc kꞌoj tuꞌn spad. 17 Cyuwxix aju kꞌoj oc tuj kꞌij lu, ex ate Abner cyucꞌix ke soldad cye aj Israel cub cyiꞌj cyuꞌn ke t-soldad David. 18 Ex ateꞌtok ox tal Sarvia ma chixin: Joab, tucꞌix Abisai ex tucꞌix Asael. Ate Asael cyuwxix ojkelan wen, mer ic tzaꞌn ojkelan jun masat tuj cojbil, 19 oc lpeꞌ tiꞌj Abner ex mintiꞌ xi tkꞌoꞌn ambil tuꞌn tcolpaj. 20 Ex tej taj tqueꞌyin Abner tiꞌjxi, xi tmaꞌn te:

—¿Myapetzun aya Asael?

—Ax toc akine, chi Asael xi ttzakꞌweꞌn.

21 Xitzun tmaꞌn Abner te:

—Miꞌn tzꞌoc lpeꞌtla wiꞌje. Mejor tzyuma jun cye keju cuꞌxun ex kꞌinxa tcyakilju kꞌiꞌn tuꞌn.

Pero mintiꞌ cub tuj twitz Asael tuꞌn miꞌn toc lpeꞌ tiꞌj. 22 Cyjaꞌtzun xi tmaꞌn Abner juntl maj te:

—Miꞌn tzꞌoc lpeꞌtla wiꞌje, ex katzun taja tuꞌn tnaja wuꞌne. Nok oꞌcx, ¿chi toc wuꞌne cxel nmaꞌne te termaniya Joab ka ma cuba wuꞌne?

23 Tuꞌnju mintiꞌ cub tuj twitz Asael tuꞌn tel tpaꞌn tib tiꞌj, xitzun t-xayuꞌn Abner t-xe lans tuj tcꞌuꞌj, ex biꞌx elpun ttzal tiꞌj, ex axtzun cub tzꞌak Asael ex cyim ma chixin. Ex cycyakil keju e pon tuj lugar jatum otok cyim Asael, e cub weꞌ queꞌyilte. 24 Atzunte Joab tucꞌix Abisai e jeꞌx lpeꞌ tiꞌj Abner. Nok nneꞌxcu kꞌij tej cypon twiꞌ tal witz Amma aju tcubsaꞌn tumlal twitz lugar Gía, tuj ju be in xiꞌ tuj tzkij txꞌotxꞌ te Gabaón. 25 Maxtzun ma chixin oc cychmon cyib ke soldad tiyjil Benjamín tucꞌil Abner, ex junxtzun e ela ex e cub ten twiꞌ jun witz. 26 Xitzun schꞌiꞌn Abner tiꞌj Joab ex tma:

—¿Jtoj ban t-xi cycoline tuꞌn cycub cybyone ke xjal? ¿Naꞌnxpetzun tel tnicꞌa tiꞌj, ate jlu nok bis in tzaj tiꞌn? ¿Jtoj ban t-xi tmaꞌna cye ke t-xjalila tuꞌn miꞌn cyxi lpeꞌtl cyiꞌj ke cyerman?

27 Xitzun ttzakꞌweꞌn Joab:

—Cxel nmaꞌne jun yol teya axix toc twitz Dios, nokwit mintiꞌ ma tmaya jlu, mawtlo cheꞌx lpeꞌ ke nxjalile cyiꞌj ke cyerman ocxi tcub kꞌij.

28 Xitzun tmaꞌn Joab tuꞌn cyoc kꞌajtzaꞌn ke chun, ex cycyakiltzun xjal e weꞌ ex mintiꞌ e oc lpeꞌtl cyiꞌj aj Israel tuꞌn cykꞌojin cyiꞌj. 29 Atzunte Abner cyucꞌix ke xinak ucꞌin tuꞌn, o che bet tuj enter akꞌbil tuj chkꞌajlaj at tuj Arabá, ex e icꞌx tuj nima Jordán ex tuj tcyakilju tkan xak Bitrón, ex e pon tuj tnam Mahanaim.

30 Mintiꞌtl xi lpeꞌ Joab tiꞌj Abner. Oc tchmoꞌn cycyakil ke t-soldad, ex tejtzun tjaw list cyiꞌj, otok che cyim belajlaj xinak t-soldad David ke, ex part te Asael. 31 Ex atzun ke t-soldad David otok che cub cybyoꞌn 360 xinak aj Benjamín, akeju ateꞌtok tucꞌil Abner.

32 Atzunju t-ximlal Asael xi kꞌiꞌn tuj Belén, ex atzun cuꞌx makuꞌn ma chixin tuj tpantyón ktzan tman. Atzunte Joab cyucꞌix ke xinak ucꞌin tuꞌn e bet tuj enter akꞌbil lu, ex tej tcub kꞌij otok che pon tuj tnam Hebrón.