Ke xjal mojl cyyol tucꞌil David
12
Tej otok tzꞌel ok David twitz Saúl aju tcyꞌajal Cis, at jun cꞌloj xjal cyuw cycꞌuꞌj tuj kꞌoj e jeꞌx onil te David tuj tnam Siclag. 2 Akeju kꞌojlel lu, kꞌiꞌntok ke xobl plech cyuꞌn, baꞌn che xoꞌn abj tuꞌn xobl abj, ex baꞌn che xoꞌn plech tuꞌn xobl plech; baꞌn che xoꞌn tuꞌn cybankꞌab ex tuꞌn cynayaj. Tiyjil Benjamín ke, at cyxilen tucꞌil Saúl, ex atzun ke jlu: 3 Ahiezer aju nejenel, tucꞌix Joás; ake jlu tcyꞌajal Semaa ke, ex atzun najlke tuj tnam Gabaa; Jeziel ex Pelet, ake jlu tcyꞌajal Azmavet ke; Beraca ex Jehú aju aj Anatot, 4 Ismaías aju aj Gabaón, a jlu jun cyxol ke 30 xinak cyuw cycꞌuꞌj tuj kꞌoj, ax nejenel cye; Jeremías, Jahaziel, Johanán, Jozabad aju aj Gedera, 5 Eluzai, Jerimot, Bealías, Semarías, Sefatías aju aj Haruf, 6 Elcana, Isías, Azareel, Joezer, tucꞌix Jasobeam, tiyjil Coré ke, 7 Joela ex Zebadías, ake jlu tcyꞌajal Jeroham ke, aju aj Gedor.8 Ax icx aj cykꞌon cyib junjun tiyjil Gad tuj tcwent David tej tten tuj lugar te tcolbil tib tuj tzkij txꞌotxꞌ. Kꞌojlel ke, cyuw cycꞌuꞌj tuj kꞌoj ex xnakꞌtzamni ke tuꞌn cykꞌojin, ex kꞌiꞌmlex cymakbil tucꞌix cylans; jawni ke, mintiꞌ in che xob; ic cyten ic tzaꞌn balun, ex cyuw che kelan cywiꞌ ke witz ic tzaꞌn masat. 9 Ex atzun ke jlu: Ezer tbi tnejel, Obadías tbi tcabin, Eliab tbi toxin, 10 Mismana tbi tcyajin, Jeremías tbi tjweꞌyin, 11 Atai tbi tkakin, Eliel tbi twukin, 12 Johanán tbi twajxakin, Elzabad tbi tbelajin, 13 Jeremías tbi tlajin, ex Macbanai tbi tjunlajin. 14 Ake jlu tiyjil Gad ke toctok cyoclen te nejenel cye soldad; aju chꞌin toclen toc, jun syent soldad at tuj tcwent, atzunju maꞌ toclen toc, jun mil soldad at tuj tcwent. 15 Atzun ke jlu e icꞌx tuj nima Jordán ttzi jbalil tej otok chꞌiy nima ex otok baj noj tuj tbe, ex cycyakil keju ateꞌ tuj chkꞌajlaj ttzi nima Jordán tuj tjawitz kꞌij ex tuj telex kꞌij e jeꞌl ok cyuꞌn.
16 Ax icx at junjun xinak cyxol tiyjil Benjamín ex cyxol tiyjil Judá e jeꞌx tuꞌn taj cykꞌon cyib tucꞌil David tuj lugar te tcolbil tib. 17 Atzunte David ex canul cyiꞌj ex xi tmaꞌn cye cyjaꞌ: Ka ma che ule wucꞌile tuꞌn tten kmojbabl kib ex tuꞌn cyonine wucꞌile, jacu che cꞌmete wuꞌne tuꞌn tcyakil wanmiye; katzun ma che ule nok tuꞌn cyoc meltzꞌaje wiꞌje ex tuꞌn nxi cykꞌoꞌne tuj cykꞌab aj kꞌoj wiꞌje, ex mintiꞌ jun wile ma nbinchaye, entons jacu til Cydios ktzan kxeꞌchel ti cꞌoquel cyiꞌje tuꞌn, chi David.
18 Atzunte Amasai aju nejenel cye ke 30 xinak, ul T-xew Dios tucꞌil, jaw tkꞌajkꞌajel twiꞌ cyuwxix ex tma:
Teya koꞌye, tat David, ex tucꞌila atoꞌye, aya tcyꞌajal Isaí. Cuchiwt tuꞌn ttena tuj txubtxaj, cuchiwt tuꞌn ttena tuj txubtxaj cyucꞌix keju onil teya, porque aju Tdiosa ma onin teya, chi Amasai.
19 Ax icx aj cykꞌon cyib junjun tiyjil Manasés tuj tcwent David tej t-xiꞌ cyucꞌil aj Filistey tuꞌn tkꞌojin tiꞌj Saúl. Pero mintiꞌ xiꞌ David onil cyucꞌil aj Filistey, porque e yolin ke nejenel cye aj Filistey tiꞌj, ex bant tiꞌj cyuꞌn tuꞌn miꞌn t-xiꞌ cyucꞌil ex cyma cyjaꞌ: Jacu bant tzꞌoc meltzꞌaj David kiꞌj, mya yajcu tzꞌaj tkꞌon tib tucꞌil Saúl aju tpatrón; ex jacu ko naj. 20 Akeju xinak tiyjil Manasés aj cykꞌon cyib tuj tcwent David tej t-xiꞌ tuj Siclag, atzun ke jlu: Adnas, Jozabad, Jediaiel, Micael, Jozabad, Eliú ex Ziletai; ake jlu nejenel ke cye soldad tiyjil Manasés ex at jun milchak soldad tuj tcwent junjun. 21 Atzun ke jlu e onin tucꞌil David tej tkꞌojin cyiꞌj txkan elekꞌ, porque cycyakil ke jlu cyuw cycꞌuꞌj tuj kꞌoj ex oc tkꞌoꞌn David cyoclen te nejenel cye soldad. 22 Ex tcyakil kꞌij in che ulxe mastl xinak onil tucꞌil David, tejxi tchmet nimxix cyajlal soldad.
Ke t-soldad David
23 Atzun jun cyajlal soldad jlu kꞌiꞌmlex cymacbil in che ajben tuj kꞌoj, banin cyten tuꞌn cykꞌojin, ex oc cymojban cyib tucꞌil David tuj tnam Hebrón, tuꞌn toc cykꞌoꞌn David te rey te t-xel Saúl, ic tzaꞌnx otok tma Kman. 24 Cyxol tiyjil Judá at kak mil tucꞌil wajxak syent xinak kꞌiꞌmlex makbil cyuꞌn, tucꞌix cylans, ex banin cyten tuꞌn cykꞌojin. 25 Cyxol tiyjil Simeón at wuk mil tucꞌil jun syent xinak cyuw cycꞌuꞌj tuj kꞌoj ex banin cyten tuꞌn cykꞌojin. 26 Cyxol tiyjil Leví at cyaje mil tucꞌil kak syent cybet. 27 Ax icx at ox mil tucꞌil wuk syent tiyjil Aarón, ex aju nejenel cye, Joiada tbi, 28 tucꞌix Sadoc aju cuꞌxun cyuw tcꞌuꞌj tuj kꞌoj, tucꞌix 22 nejenel tucꞌil, ax terman ke. 29 Cyxol tiyjil Benjamín at ox mil aj cykꞌon cyib tuj tcwent David, atzun tnimal cybet ax e cyaj ten cytxlaj tiyjil Saúl, porque ax tiyjil Benjamín te Saúl. 30 Cyxol tiyjil Efraín at winkin mil tucꞌil wajxak syent xinak cyuw cycꞌuꞌj tuj kꞌoj, ex in che yolin cyxjalil cyiꞌj ka at-xix cynabl tuꞌn cykꞌojin. 31 Cyxol mij tiyjil Manasés at wajxak laj mil xinak otok che jaw scꞌoꞌn tuꞌn cyxiꞌ kꞌolte toclen David tuꞌn toc te rey. 32 Cyxol tiyjil Isacar at cab syent xinak nejenel ke cyiꞌj cyxjalil, atzun ke xjal lu at cynabl tuꞌn tel cynicꞌ tiꞌj tkꞌijlalil ex tuꞌn tel cynicꞌ tiꞌj alcye tuꞌn cybinchante aj Israel. 33 Cyxol tiyjil Zabulón at 50 mil soldad banin cyten tuꞌn cyxiꞌ tuj kꞌoj, ex kꞌiꞌmlex tcyakil txcaj macbil cyuꞌn, akeju in che ajben tuj kꞌoj, ex cykꞌon cyib tuꞌn cyonin tiꞌj David. 34 Atzun cyxol tiyjil Neftalí at jun mil nejenel cyucꞌix 37 mil xinak kꞌiꞌmlex cylans tucꞌix cymakbil in che ajben tuj kꞌoj. 35 Cyxol tiyjil Dan at 28 mil tucꞌil kak syent soldad banin cyten tuꞌn cykꞌojin. 36 Cyxol tiyjil Aser at 40 mil soldad at cynabl, banin cyten tuꞌn cykꞌojin. 37 Ax icx cyxol keju ateꞌ jlajxi nima Jordán at jun syent tucꞌil winkin mil xinak; at junjun tiyjil Rubén ke, ex junjuntl tiyjil Gad, tucꞌix mijtl tiyjil Manasés, kꞌiꞌn tcyakil txcaj macbil cyuꞌn, akeju in che ajben tuj kꞌoj.
38 Cycyakil soldad lu banin cyten tuꞌn cyxiꞌ tuj kꞌoj. Tuꞌn tcyakil cyanmi e jeꞌx tuꞌn cypon max tuj tnam Hebrón tuꞌn toc cykꞌoꞌn toclen David te rey cyibaj cycyakil aj Israel, ax icx cye mastl aj Israel ax cyximbetz tuꞌn toc David te rey. 39 Ox kꞌij e ten tucꞌil David ma chixin. E waꞌn ex e cꞌan porque ke cyxjalil otok baj cybinchaꞌn tcyakilju at tajben tuꞌn cywaꞌn tiꞌj. 40 Ax icx ke cyvesin, cyucꞌix ke tiyjil Isacar, ke tiyjil Zabulón ex ke tiyjil Neftalí, pon cyiꞌn arin, tucꞌix twitz higo tzkijsaꞌmaj, twitz uva tzkijsaꞌmaj, taꞌl twitz uva, ex chibj aseyt. Tcyakil jlu pon cyiꞌn cyibaj chej bur, camey, mul, ex cyibaj wacẍ. Ax icx pon cyiꞌn ke wacẍ ex ke ẍneꞌl te chibj. O chmet nimcu, tuꞌnju nimxix o che tzalaj ke aj Israel.