—Ic tzaꞌn in tila, akine atine tuj jun ja puro tbanil tzeꞌ wiꞌten, atzunju cax cꞌubl tley Kman atzun taꞌ tuj jun ja xbalun mya tbanil.

3 Atzunte Natán tma:

—Binchama tcyakil ic tzaꞌnxju ma cub t-ximana, porque a Dios tucꞌila.

4 Tujx akꞌbil lu, o yolin Kman tucꞌil Natán cyjaꞌ: 5 Txiꞌya tucꞌil nmajene David ex kꞌmanxa te: Chitzun Kman teya cyjaꞌ: Mya aya cjawil binchante jun njaye jatum tuꞌn ntene tuj. 6 Atxix tuj kꞌij tej cyetz wiꞌne aj Israel tuj Ejipt, ax icx jaꞌlo, mi jun maj ma chin tene tuj jun ja tbanil, nok oꞌcx ma chin betjeꞌye tuj jun ja xbalun. 7 Tuj tcyakil tkꞌijlalil ma chin bete cyucꞌil aj Israel akeju etzan wuꞌne, ex oc nkꞌoꞌne ke nejenel cyxol tuꞌn cycawin cyibaj, pero mi jun maj xi nmaꞌne cye tuꞌn tjaw cybinchaꞌn jun ja te cꞌulbil weye aju tbanil tzeꞌ wiꞌten. 8 Cyjaꞌtzun tten kꞌmanxa te nmajene David: Akine Dios aju Tajaw Tcyakil in xi nmaꞌne te cyjaꞌ: Ma tzꞌel wiꞌne tuꞌn miꞌn tpastorintla cyiꞌj ke ẍneꞌl tuj cojbil, tuꞌn toca te nejenel cye aj Israel akeju etzan wuꞌne. 9 Ma chin bete tucꞌila nok jatum ma beta, ax icx ma che cub ke aj kꞌoj tiꞌja wuꞌne, akeju e oc tzokpaj tiꞌja, ex cꞌelel tkanila wuꞌne tuꞌn cybinte xjal ka maꞌ toclena, ic tzaꞌn ke xjal maꞌ cyoclen ateꞌ tuj tcyakil twitz txꞌotxꞌ. 10 Ax icx ma baj nbinchaꞌne jun lugar jatum tuꞌn cynajan ke aj Israel akeju etzan wuꞌne, ex ax ma che cub nkꞌoꞌne tuꞌn cynajan tuj cyex cytxꞌotxꞌ; mi jun clabtel cyiꞌj ex mlay che yajlanjtz juntl maj cyuꞌn ke xjal mya baꞌn ic tzaꞌn nej, 11 atxix tej cyoc nkꞌoꞌne ke nejenel tuꞌn cycawin cyibaj ke xjal etzan wuꞌne. Che cletele wuꞌne tuj cykꞌab ke aj kꞌoj cyiꞌje tuꞌntzun cytene tuj txubtxaj. Ex cxel ntziyane teya tuꞌn tchmet cybaj ke tiyjila, 12 ex oc tjapun baj tabkꞌiyila tuꞌn tcyima, ax kine chin oquel kꞌonte jun tcyꞌajala te rey ex ccyuwsetel tcawbil wuꞌne. 13 Ex atzun jlu cjawil binchante jun ja te cꞌulbil weye, ex akine chin cyuwsalte tcawbil te jumajx. 14 Akine chin oquel te tman, atzun te cꞌoquel te ncꞌwaꞌle; ex ka at jun il ma tbincha, ax kine chin bel kꞌonte tcastiw, ex cbajel n-asyaline ic tzaꞌn in cybinchaꞌn cycyakil mambaj cyiꞌj cycꞌwaꞌl, 15 pero cucx ctel ncꞌujlalile tiꞌj, ex mlay nbinchaye ic tzaꞌn nbinchaye tiꞌj Saúl, aju ma tzꞌel wiꞌne toclen te rey nok tuꞌn toca te t-xel. 16 Che oquel tiyjila te rey ex cyjel ten tcawbila te jumajx; akine chin clolte cye ex cucx che bel keꞌ ke tiyjila tuj kꞌukbil te cawbil te jumajx, chicuya te David, chi Dios te Natán.

17 Xi ttxꞌolbaꞌn Natán tcyakil jlu te David cabalxix, ic tzaꞌn o tbi ex ic tzaꞌnx o til. 18 Ocxtzun rey David yolil tucꞌil Kman ex tma: Nman Dios, ¿alcye kine ex ti cyoclen ke wiyjile tuꞌnju ma tzaj tkꞌoꞌna woclene te rey? 19 Ex mya maꞌ ma tzꞌela jlu tuj twitza Nman Dios, ax icx ma yolina tiꞌj ju cbajel te tibajxi cyiꞌj ke wiyjile tuꞌn cyoc te rey. Mi jun xjal jacu pon ic tzaꞌn teya, Nman. 20 ¿Alcye mastl jacu txi nmaꞌne teya Nman Dios, porque baꞌn tuꞌna alcye kine, akine tmajena? 21 Tcyakilju tbinchbena maꞌxix t-xilen ma bant tuꞌna ic tzaꞌnx tzaj ttziyana, ex ic tzaꞌnx tajbila, tuꞌntzun tel nnicꞌe tiꞌj; 22 cyjaꞌtzun Nman, maꞌxix t-xilena porque mlay pon juntl ic tzaꞌn teya, oꞌcx aya Dios ex mintiꞌ juntl ic tzaꞌn ma kbiye tiꞌja. 23 Atzun cye aj Israel akeju etzan tuꞌna, mintiꞌ juntl tnam ic tzaꞌn cye, porque oꞌcxcu jun tnam lu scꞌoꞌmaj tuꞌna tuj tcyakil twitz txꞌotxꞌ. Dios, tuꞌna ma che tzokpet tuꞌn cyoc te jun tnam etzan tuꞌna, ex ma tzꞌel tkanil tuꞌna ka maꞌ cyoclen tuꞌnju tbinchbena nim tipumal ex xobajilxix. Tej cyetz tcolpiꞌna tuj Ejipt e icꞌ tlajoꞌna ke mastl tnam cywitz cyucꞌix ke cydios; 24 porque ma che oc tkꞌoꞌna ke aj Israel tuꞌn cyoc te jun tnam etzan tuꞌna te jumajx, ex aya Nman ma tzꞌoca te Cydios.

25 Cyjaꞌtzun Nman Dios, cucxwit tuꞌn tten ju yol ma tzaj ttziyana weye, akine tmajena, ex cye ke wiyjile che ul itzꞌj te tibajxi, ex japunx tuꞌna aju ma tmaya. 26 Cucxwit jaw nimsaꞌn tbiya, ex cucxwit kꞌmanjtz cyjaꞌ: Ate Kman Tajaw Tcyakil, atzun Cydios aj Israel. Cuchiwt miꞌn che cub yupj ke wiyjile che ul itzꞌj te tibajxi, akine David aju tmajena, cucxwit che ten tuꞌna. 27 Aya Nman Tajaw Tcyakil, aya Cydios aj Israel ma tzaj tmaꞌna weye ka che oquel tkꞌoꞌna ke wiyjile tuꞌn cyoc te rey; tuꞌntzun jlu masque tmajena kine, pero ma nnimari wibe tuꞌn t-xi nkanine jlu teya. 28 Aya Nman aya Dios, ex aju tyola axix toc, ex ma tzaj ttziyana tuꞌn ttzaj tkꞌoꞌna nimxix t-xtalbila weye. 29 Cuchiwt baꞌn tzꞌela tuj twitza tuꞌn tcub tcyꞌiwlaꞌna ke wiyjile che oquel te rey te tibajxi, ex cucx tuꞌn cyoc tcwentina. Aya Kman Dios ma tzaj ttziyana, ex tuꞌnju tcyꞌiwbila cucx che bel cyꞌiwlaꞌn ke wiyjile te jumajx, chi David.