3 Ax kꞌij lu xi tmaꞌn t-sanjel Dios tuꞌn tbant jun techal maꞌxix t-xilen ex tma: Atzun jun techal maꞌxix t-xilen jlu, aju ma tma Kman: Aju altar lu cbajel xitj ex aju tzaꞌj tcub tibaj cbajel sputj.

4 Tejtzun tbinte rey Jeroboam aju sentens otok tma t-sanjel Dios tiꞌj altar at tuj Betel, max ttxlaj altar xi tnukpiꞌn tkꞌab ex tma: Cytzyuntze xjal lu. Pero aju tkꞌab xi tnukpiꞌn, biꞌx txꞌiꞌlix tiꞌj ex ya mintiꞌ bant tyucch. 5 Tujx or lu baj pax altar ex aju tzaꞌj tcub tibaj biꞌx baj sputj, ic tzaꞌnx ju techal otok txi tmaꞌn Dios te t-sanjel. 6 Atzunte rey xi tmaꞌn te t-sanjel Dios:

—In chin cubsane teya tuꞌn tcubsana wiꞌje twitz Kman aju Tdiosa, tuꞌntzun tbanix nkꞌabe.

Atzunte t-sanjel Dios oc ten cubsal twitz Kman, ex aju tkꞌab rey o banix ic tzaꞌn tten nej. 7 Xitzun tmaꞌn rey te t-sanjel Dios cyjaꞌ:

—Koꞌ wucꞌile ma njaye tuꞌntzun twaꞌna, ex jacu txi nkꞌoꞌne jun oyaj teya.

8 Atzunte t-sanjel Dios xi ttzakꞌweꞌn te rey cyjaꞌ:

—Masque tzaj tkꞌoꞌna mijcu tetzbila weye, mlay chinxe tucꞌila, mlay chin waꞌne pan ex mlay chin cꞌane aꞌ tuj ju lugar lu; 9 porque ictzun tten tzaj tmaꞌn Kman weye, chi tma cyjaꞌ: Miꞌn txi twaꞌna pan, miꞌn txi tcꞌaꞌna aꞌ, ex miꞌn tzꞌajtz meltzꞌaja tujx ju be jatum cxeꞌlaya.

10 Ajtzun meltzꞌaj t-sanjel Dios tuj juntl be, mya tujx ju be jatum otok txiꞌ tuꞌn tpon tuj Betel.

11 Attok jun t-sanjel Dios otok tijin, najltok tuj Betel. Ax kꞌij lu e pon ke tcyꞌajal tucꞌil ex xi cymaꞌn te tcyakil aju otok tbincha t-sanjel Dios tzajni tuj Judá, ax icx xi cymaꞌn te cyman aju otok txi tmaꞌn t-sanjel Dios te rey. 12 Xitzun tkanin cyman cye:

—¿Alcye be ma txi tiꞌn?

Atzun keju tcyꞌajal xi cymaꞌn alcye be otok txi tiꞌn t-sanjel Dios aju tzajni tuj Judá. 13 Xitzun tmaꞌn cye ke tcyꞌajal:

—Chux cykꞌonque t-siy nburre.

Cybinchatzun icju, jaxtzun t-sanjel Dios tij xjal tibaj bur 14 ex xi lpeꞌ tiꞌj t-sanjel Dios aju tzajni tuj Judá. Lu o cnet tuꞌn kꞌukl tjakꞌ jun wiꞌ tzeꞌ cꞌol, ex xi tkanin te:

—¿Apeya aju t-sanjel Dios tzajni tuj Judá?

—Akine, chi xi ttzakꞌweꞌn.

15 Tzaja waꞌl wucꞌile tuj njaye, chi t-sanjel Dios tij xjal.

16 Atzunte t-sanjel Dios xi ttzakꞌweꞌn:

—Mlay chinxe tucꞌila, mi tuꞌn wocxe tuj tjaya, mi tuꞌn nwaꞌne pan ex mi tuꞌn ncꞌane aꞌ tucꞌila tuj lugar lu; 17 porque clarxix tzaj tmaꞌn Kman weye: Miꞌn waꞌna pan ex miꞌn cꞌana aꞌ tzalu, ex miꞌn tzꞌajtz meltzꞌaja tujx ju be jatum cxeꞌlaya.

18 Atzunte tij xjal xi tmaꞌntl:

Ax icx weye ax t-sanjel Dios kine ic tzaꞌn teya, ex at jun t-anjel Kman ma tzaj kꞌmante weye tuꞌn t-xi wiꞌne njaye, ex tuꞌn t-xi nkꞌoꞌne twaya ex tcꞌaya, chi tij xjal. Pero nok o nicꞌan tij xjal yol twitz t-sanjel Dios.

19 Xiꞌtzun t-sanjel Dios tucꞌil, o waꞌn ex o cꞌan tuj tja. 20 Tej kꞌuklkeꞌtok tiꞌj mes, tzaj yolin Kman tucꞌil t-sanjel Dios tij xjal, aju otok tzꞌajtz kꞌinte t-sanjel Dios tzajni tuj Judá, 21 ex xi tmaꞌn te tucꞌil tkꞌajkꞌajel twiꞌ cyuwxix:

—Chi Kman ma tma: Tuꞌnju mintiꞌ ma txi tnimana aju yol tzaj tmaꞌn Dios teya, 22 ex tuꞌnju ma tzꞌajtz meltzꞌaja tuꞌn twaꞌna ex tuꞌn tcꞌana jatum xi tmaꞌn Kman teya tuꞌn miꞌn tbinchanteya, mlay tzꞌocx makuꞌn t-ximlala tuj cypantyón ktzan t-xeꞌchela, chi tij xjal.

23 Tejtzun tbaj waꞌn ex tej tbaj cꞌan t-sanjel Dios tzajni tuj Judá, octzun kꞌoꞌn t-siy tbur tuꞌn t-sanjel Dios tij xjal, 24 ex ajtzun t-sanjel Dios tzajni tuj Judá. Pero etz jun balun tuj be ex cub byoꞌn t-sanjel Dios tuꞌn ex cub paleꞌ t-ximlal tuj be, ex ax cub ten bur tucꞌix balun ttxlaj t-ximlal. 25 E icꞌ junjun xjal ex o cyil aju t-ximlal palch cub tuj be, ex aju balun axtok waꞌl tcub ttxlaj. Tejtzun cypon tuj tnam jatum najltok t-sanjel Dios tij xjal, xi cymaꞌn te aju otok cyil. 26 Tejtzun tbinte t-sanjel Dios aju otok tzꞌajtz kꞌinte te, tma: Atzunju t-sanjel Dios lu aju mintiꞌ xi tniman aju otok tzaj tmaꞌn Dios te. Cyjaꞌtzun ma txi tkꞌoꞌn Kman te jun balun tuꞌn tbaj tzakun tuꞌn ex tuꞌn tcub byoꞌn tuꞌn, ic tzaꞌnx o tzaj tmaꞌn Kman te.

27 Ex xi tmaꞌn cye tcyꞌajal tuꞌn toc cykꞌoꞌn t-siy tbur, ex o bant cyuꞌn icju. 28 Xiꞌtzun t-sanjel Dios tij xjal, ex oc noj tiꞌj t-ximlal cyimni palch cub tuj be, axtok waꞌl tcub bur tucꞌix balun ttxlaj. Mintiꞌ xi tchyoꞌn balun t-ximlal cyimni ex mintiꞌ tbincha jun mya baꞌn tiꞌj bur. 29 Jaw tiꞌn t-sanjel Dios tij xjal t-ximlal t-sanjel Dios tzajni tuj Judá, jax tkꞌoꞌn tibaj bur ex aj tiꞌn tucꞌil tuꞌn tpon tuj tnam, tuꞌntzun tbisun tiꞌj ex tuꞌn tcuꞌx tmakuꞌn. 30 Ocx tmakuꞌn tuj tex tpantyón, oc ten okꞌel tiꞌj ex tma: Ay wermaniye.

31 Tocxlenxi tmakuꞌn, xi tmaꞌn cye tcyꞌajal:

—Oc ncyim weye, bix chin ocx cymakuꞌne tujx ju pantyón jatum ma tzꞌocx nmakuꞌne aju xinak t-sanjel Dios. Bix cub cykꞌoꞌne nximlale junx cyucꞌil ke tbakil, 32 porque ax toc cjapunel aju o tzaj tmaꞌn Kman te, tej tmante tiꞌj altar at tuj Betel ex cyiꞌj cycyakil ke ja te cꞌulbil cye ke xjal mya nimal Dios ke, akeju ateꞌ cyuj ke tnam te Samaria, chi tij xjal.

33 Masque o til Jeroboam tcyakil jlu, pero mintiꞌ e cyaj tcolin ke tbinchben mya baꞌn; nok oꞌcx e oc tkꞌoꞌn juntl maj nok alcyexcu xjal te pal tuꞌn cyajben cyuj ke ja te cꞌulbil cye xjal mya nimal Dios ke. Ka at jun xjal taj tuꞌn toc te pal, biꞌx in baj xjansaꞌn tuꞌn Jeroboam, tuꞌntzun tajben cyuj ke ja te cycꞌulbil xjal mya nimal Dios ke. 34 Tuꞌntzun jlu e binchan ke tiyjil Jeroboam il, ex tuꞌntzunju e naj te jumajx.