4 —Aju tley ktzan tmana cyuwxix cub tkꞌoꞌn kibaje, atzun teya miꞌn cub tkꞌoꞌna akꞌuntl cyuwxix kibaje, ex kꞌin ela aju ley ponin taꞌw wen cub tkꞌoꞌn ktzan tmana kibaje; ka ma txi tnimana kyole, octzun ko ajbele teya, che chi.

5 Xitzun ttzakꞌweꞌn Roboam:

—Cyxiꞌye, ex bix che ule wucꞌile juntl maj tujxi ox kꞌij, chi Roboam.

E ajtzun ke xjal. 6 Xi tkanin rey Roboam jun tumlal cye ke tij xjal, akeju otok che ajben te Salomón aju ktzan tman tej itzꞌxtok, ex tma:

—¿Alcye nconseje ctzajel cykꞌoꞌne tuꞌn t-xi ntzakꞌweꞌne cye ke xjal lu?

7 Atzun cye tij xjal xi cymaꞌn te:

—Ka ma takꞌ tiba tuꞌn tajbena cye xjal lu, ex ka ma txi tkꞌoꞌna jun mejor tzakꞌwebl cye, octzun che ajbel teya te jumajx.

8 Pero ate Roboam mintiꞌ xi tniman cyconsej ke tij xjal, xiꞌ kanil tconsej cyucꞌil ke cuꞌxun akeju junx e chꞌiy tucꞌil ex in che ajben te, 9 chi cyjaꞌ:

—¿Alcye nconseje ctzajel cykꞌoꞌne tuꞌn t-xi ntzakꞌweꞌne cye xjal lu? Porque ma cykani weye tuꞌn miꞌn tcub nkꞌoꞌntle akꞌuntl cyuwxix cyibaj, ic tzaꞌn ju akꞌuntl cub tkꞌoꞌn ktzan nmane.

10 Atzun cye cuꞌxun, akeju junx e tzaj chꞌiy tucꞌil, xi cytzakꞌweꞌn:

—Kꞌmanxa cye xjal lu, akeju ma tzaj cykanin teya tuꞌn miꞌntl tcub tkꞌoꞌna akꞌuntl cyuwxix cyibaj ic tzaꞌn cub tkꞌoꞌn ktzan tmana, atzun teya kꞌmanxa cye cyjaꞌ: Ka cyuwxix o cawin ktzan nmane, atzun weye masxix cꞌicꞌel wuꞌne ic tzaꞌn te; 11 cyuw tcawbil ktzan nmane cub tkꞌoꞌn cyibaje, atzun weye cꞌicꞌel mastl wuꞌne ic tzaꞌn te; xi tjatoꞌn tiꞌj cycꞌuꞌje tuꞌn asyal, atzun weye cxel njatoꞌne tiꞌj cycꞌuꞌje tuꞌn tzꞌuꞌm xpaltxꞌimaj tocx cꞌuxbil ttxaꞌn, chicuya cye, che chi cuꞌxun.

12 Tujtzun toxin kꞌij xiꞌ juntl maj Jeroboam cyucꞌix cycyakil tnam xjal aj Israel, tuꞌn cyyolin tucꞌil Roboam ic tzaꞌnx otok tma cye. 13 Atzunte rey xi tmaꞌn jun yol cyuwxix cye xjal, porque mintiꞌ xi tniman aju consej otok tzaj cykꞌoꞌn ke tij xjal te, 14 ex ax yol xi tmaꞌn ic tzaꞌn consej otok tzaj cykꞌoꞌn cuꞌxun te, ex chi xi tmaꞌn cyjaꞌ: Cub kꞌoꞌn akꞌuntl cyuwxix cyibaje tuꞌn ktzan nmane, atzun weye cbel nkꞌoꞌne mas cyuwxix wen; o txi jatoꞌn cyasyale tuꞌn ktzan nmane, atzun weye cxel njatoꞌne cyasyale tuꞌn tzꞌuꞌm xpaltxꞌimaj tocx cꞌuxbil ttxaꞌn, chi rey. 15 Mintiꞌ xi tniman rey cyyol xjal porque otok bant tiꞌj tuꞌn Kman icju, tuꞌntzun tjapun aju yol otok txi ttziyan te Jeroboam aju tcyꞌajal Nabat, tej ttzaj kꞌmaꞌn te tuꞌn Ahías aju aj Silo. 16 Tejtzun cyqueꞌyinte cycyakil xjal aj Israel mintiꞌ xi niman cyyol tuꞌn rey, xi cymaꞌn te:

Texju or lu e aj meltzꞌaj aj Israel cyja.

17 Atzun ke aj Israel akeju najl cyuj ke tnam ateꞌ tuj Judá, cucx e cyaj ten tjakꞌ tcawbil rey Roboam. 18 Tej t-xi t-samaꞌn Roboam ju xjal Adoram tbi, aju toc te nejenel tiꞌj akꞌuntl lajwers in che oc kꞌoꞌn xjal tiꞌj, cycyakil aj Israel e oc ten xoꞌl abj tiꞌj, ex biꞌx cyim cyuꞌn. Jaxtzun naj rey Roboam tuj tcarwaj ex xi ok tuj Jerusalén. 19 Cyjaꞌtzun tten e jeꞌtz aj Israel tjakꞌ cycawbil ke tiyjil David, ex cucx cyten jaꞌlo.

20 Tej cybinte aj Israel ka otok tzul meltzꞌaj Jeroboam tuj ttanmi, xiꞌ mandar tiꞌj tuꞌn tul cyucꞌil ex oc cykꞌoꞌn te rey cye cycyakil aj Israel. Misicyer jun cꞌloj xjal cucx tuꞌn t-xi tkꞌoꞌn tib tjakꞌ cycawbil tiyjil David, nok oꞌcx jun cꞌloj, aju tiyjil Judá.

21 Tejtzun tpon Roboam tuj Jerusalén e baj tchmoꞌn jun syent tucꞌil 80 mil soldad, akeju scꞌoꞌmaj cyxol cycyakil tiyjil Judá ex cyxol ke tiyjil Benjamín, tuꞌn cykꞌojin cyiꞌj aj Israel, ex tuꞌn tcawin juntl maj Roboam cyibaj. 22 Pero o yolin Dios tucꞌil Semaías aju t-sanjel, ex xi tmaꞌn te cyjaꞌ: 23 Kꞌmanxa te Roboam aju rey te Judá, aju tcyꞌajal Salomón, ex kꞌmanxa cye cycyakil tiyjil Judá ex cye tiyjil Benjamín ex cye mastl xjal: 24 Chitzun Kman cyjaꞌ: Miꞌn cheꞌxe kꞌojlel cyiꞌj aj Israel akeju cyermaniye. Baꞌn tuꞌn cyaj meltzꞌaj cycyakil xjal cyja, porque wuꞌne ma che el npaꞌne ke aj Israel cyiꞌje.

Tejtzun cybinte aju yol tzaj tmaꞌn Kman, e ajtzun meltzꞌaj cyja ic tzaꞌnx otok tma Kman cye.

25 Jaw tbinchaꞌn Jeroboam juntl maj muro tiꞌj tnam Siquem ex baj tcyuwsaꞌn, aju max taꞌ tuj tiwitz txꞌotxꞌ te Efraín, ex o najan tuj. Ax icx jaw tbinchaꞌn juntl maj muro tiꞌj tnam Penuel ex baj tcyuwsaꞌn. 26 Pero cub t-ximan Jeroboam cyjaꞌ: Mya yaj jacu che cawin juntl maj ke tiyjil David cyibaj aj Israel. 27 Ka cucx ma cheꞌx xjal tuj Jerusalén kꞌol chojbil tuj tja Kman, jaculo keꞌ juntl maj cycꞌuꞌj tiꞌj Roboam aju rey te Judá tuꞌn cyten juntl maj tucꞌil, ex jaculo chin cub byoꞌne cyuꞌn, chi Jeroboam.

28 Tbajlenxi tkanin Jeroboam tconsej cye ke xjal, baj tbinchaꞌn cabe tilbilal tal wacẍ kꞌan pwak cytxꞌotxꞌil, ex xi tmaꞌn cye tnam xjal: Akeye aj Israel, ya miꞌn cheꞌxtle cꞌulul tuj Jerusalén. Lu ke cydiose lu, aju etz kꞌinte cyeye tuj Ejipt. 29 Cubtzun tkꞌoꞌn jun tilbilal wacẍ tuj tnam Betel ex juntl tuj tnam Dan. 30 Cyuꞌntzun ke tilbilal lu e binchan aj Israel il, porque in cheꞌxtok ke xjal tuj Betel ex max tuj Dan tuꞌn cycꞌulun cywitz ke tilbilal. 31 Ax icx e jaw tbinchaꞌn ke ja te cꞌulbil cywiꞌ ke witz, ex e jaw t-scꞌoꞌn ke pal cyxol mastl xjal mya aj Leví ke. 32 Ax icx cub xeꞌt jun ninkꞌij tuꞌn maꞌ toclen, tuj olaj tajlal kꞌij te twajxakin xjaw, ic tzaꞌnx jun ninkꞌij in icꞌset tuj Judá, ex ax Jeroboam in xi kꞌonte chojbil twi altar. Atzun jlu o bant tuꞌn tuj Betel, xi tkꞌoꞌn chojbil cye ke tilbilal tal wacẍ akeju otok che baj tbinchaꞌn, ex e oc tkꞌoꞌn ke pal tuꞌn cyten cyuj ke ja te cꞌulbil. 33 Cyjaꞌtzun, tuj olaj tajlal kꞌij te twajxakin xjaw, xi tkꞌoꞌn Jeroboam chojbil twi altar aju otok jaw tbinchaꞌn tuj Betel. Atzun xjaw lu oc te ninkꞌij aju tuꞌnx Jeroboam cub t-ximan tuꞌn tbinchet, ex xi tmaꞌn cye aj Israel ka maꞌ toclen ju ninkꞌij te cye, ex jax jatum taꞌ ju altar tuꞌn tcub tpatun storac.