7 Jaw tbinchaꞌn Salomón jun ja twi witz tcub tuj tjawitz kꞌij te Jerusalén, ex ajben te cꞌulbil te Quemos aju tilbilal puro icꞌbilxix aju cydios aj Moab, ex jun te Moloc aju tilbilal puro icꞌbilxix aju cydios aj Amón. 8 Ax icx o tbincha cye cycyakil ke t-xuꞌjil stranjer xjal ke, akeju in cheꞌx kꞌonte storac ex chojbil cye ke cydios. 9 Atzunte Kman aju Cydios aj Israel tzaj tkꞌoj tiꞌj Salomón, porque otok tzꞌel tpaꞌn tib tiꞌj masque otok cub tyecꞌun tib cab maj twitz, 10 ex otok tma te tuꞌn miꞌn tcꞌulun cywitz txkantl dios. Masque icju, pero mintiꞌ xi tbiꞌn Salomón aju otok tma Kman te. 11 Cyjaꞌtzun tzaj tmaꞌn Kman te Salomón: Tuꞌnju ma tbinchaya icju, mintiꞌ ma japun tuꞌna aju yol cyaj bant tiꞌj wuꞌne tucꞌila, ax icx mintiꞌ ma che japun tuꞌna ke ley xi nmaꞌne teya, cꞌelel wiꞌne cawbil tuj tkꞌaba ex cxel nkꞌoꞌne te jun cye keju in che ajben teya. 12 Masque icju, nok tuꞌnju at ncꞌujlalile tiꞌj David aju ktzan tmana, mlay nbinchaye jlu acux itzꞌxa; pero cꞌelel wiꞌne cawbil tuj tkꞌab tcyꞌajala. 13 Mlay tzꞌel wiꞌne tcyakil cawbil tuj tkꞌab tcyꞌajala; cyjel nkꞌoꞌne jun cꞌloj cyiyjil aj Israel tuj tcwent, nok tuꞌnju at ncꞌujlalile tiꞌj ktzan nmajene David ex tiꞌj tnam Jerusalén, aju tnam o jaw nscꞌoꞌne, chi Dios te Salomón.

14 Ex tuꞌn Dios o ten jun aj kꞌoj tiꞌj Salomón, Hadad tbi, aju aj Edom ex cyiyjil ke rey te Edom. 15 Tej tcub cyiꞌj aj Edom tuꞌn David, xiꞌ Joab aju nejenel cye soldad makulte cye keju otok che cyim tuj kꞌoj, ex e cub tbyoꞌn cycyakil xinak aj Edom; 16 kak xjaw cyaj ten Joab ma chixin, cyucꞌix cycyakil soldad aj Israel, tejxi cynaj cycyakil ke xinak aj Edom cyuꞌn. 17 Atzunte Hadad matok cꞌwaꞌlx, xi ok tuj Ejipt cyucꞌil junjun aj Edom, akeju in che ajbentok te tman. 18 E jeꞌx tuj Madián ex e pon tuj Parán, atzun xi cyiꞌn junjun xinak tuꞌn cyxiꞌ cyucꞌil. E pon tuj Ejipt ex e jeꞌx tucꞌil Faraón aju rey te Ejipt, atzunte rey xi tkꞌoꞌn cyja, cywa, ex cytxꞌotxꞌ.

19 Atzunte Hadad baꞌn ela tmod tuj twitz Faraón, cyjaꞌtzun xi tkꞌoꞌn Faraón titzꞌin Tahpenes aju t-xuꞌjil, tuꞌn toc te t-xuꞌjil Hadad. 20 Tzajtzun jun tcyꞌajal Hadad tiꞌj titzꞌin Tahpenes, Genubat tbi oc. Ate cꞌwaꞌl lu ax o chꞌiy tuj tcwent Tahpenes tuj tja rey Faraón, junx cyucꞌil keju tex tal. 21 Tej tbinte Hadad max tuj Ejipt ka otok cyim David, ax icx otok cyim Joab aju nejenel cye soldad, xitzun tmaꞌn Hadad te Faraón cyjaꞌ:

—Kꞌontza ambil weye tuꞌn waj meltzꞌaje tuj ntanmiye.

22 Atzunte Faraón xi ttzakꞌweꞌn:

—¿Tikuꞌn tajbila tuꞌn taj meltzꞌaja tuj ttanmiya? ¿Atpe jun tiꞌxti atx taj teya wucꞌile?

Xi ttzakꞌweꞌn Hadad:

—Mintiꞌ jun tiꞌxti atx taj weye, pero in chin cubsane twitza tuꞌn ttzaj tkꞌoꞌna ambil tuꞌn waj meltzꞌaje.

23 Ax icx tuꞌn Dios o ten juntl aj kꞌoj tiꞌj Salomón, Rezón tbi, aju tcyꞌajal Eliada. Otok tzꞌel ok Rezón tiꞌj tpatrón Hadad-ezer tbi, aju rey te Soba. 24 Tej cycub tbyoꞌn David ke xjal tuj Soba, baj tchmoꞌn Rezón junjun xinak ex a oc te nejenel cye tuꞌn cykꞌojin. Xiꞌ Rezón tuj Damasco, atzun o ten ex oc kꞌoꞌn te rey. 25 Tuj tcyakil tankꞌibl Salomón oc Rezón te aj kꞌoj tiꞌj, ic tzaꞌn in tbinchaꞌntok Hadad, porque nimxix o icꞌun cyiꞌj aj Israel. Cyjaꞌtzun tten, oc Rezón te rey tuj Siria.

26 Ax icx te Jeroboam, aju attok toclen ttxlaj Salomón, jaw tiꞌn tib tuꞌn tkꞌojin tiꞌj rey. Ate Jeroboam tcyꞌajal Nabat ex tiyjil Efraín, ex aju ttanmi Sereda tbi. Aju ttxuꞌ, Zerúa tbi ex meba xuꞌj. 27 Aju t-xilen tkꞌoj Jeroboam tiꞌj rey atzun jlu: In baj tnojsaꞌntok Salomón ke jul tuꞌn toc te chkꞌajlaj, ex nibantok tjaw ttzꞌaksaꞌn ju muro tiꞌjele tnam aju toc tbi Ttanmi David, 28 ex ate Jeroboam at tipun ex tkꞌon tib tuj akꞌuntl. Tejtzun tqueꞌyinte Salomón aju cuꞌxun lu puro secꞌ tnabl, oc tkꞌoꞌn te nejenel tiꞌj akꞌuntl in bant cyuꞌn cycabil cꞌloj tiyjil José.

29 Tujtzun tkꞌijlalil lu, at jun kꞌij ex Jeroboam tiꞌjxi tnam Jerusalén, ex oc tcꞌulban tib tuj be tucꞌil Ahías aju aj Silo, aju t-sanjel Dios, toc jun t-ẍjoꞌw acꞌaj, ex cyjunalx ateꞌtok tuj cojbil. 30 Eltzun tiꞌn Ahías aju t-ẍjoꞌw toc tiꞌj, ex cub t-sbitꞌun; te cablaj piẍ ela tuꞌn, 31 ex xi tmaꞌn te Jeroboam cyjaꞌ: Kꞌinx laj piẍ teya, porque ate Kman aju Cydios aj Israel in tmaꞌn cyjaꞌ: Cꞌelel wiꞌne cawbil tuj tkꞌab Salomón, ex cxel nkꞌoꞌne laj cꞌloj cyiyjil aj Israel teya. 32 Atzun te Salomón, nok jun cꞌlojx cyjel nkꞌoꞌne nok tuꞌn tlaj nmajene David, ex nok tuꞌn tlaj tnam Jerusalén, aju tnam scꞌoꞌmaj wuꞌne cyxol cycyakil cꞌloj cyiyjil aj Israel. 33 Porque ma chin el icꞌune cyuꞌn, ex ma che oc ten cꞌulul twitz tilbilal xuꞌj dios Astoret aju cydios aj Sidón, ex twitz Quemos aju cydios aj Moab, ex twitz Milcom aju cydios aj Amón. Mya baꞌn ma tzꞌeꞌla cybinchben tuj nwitze, ex mintiꞌ ma che japun ke nleye ex ke nmandamyente cyuꞌn, ic tzaꞌn te David aju ktzan tman Salomón o japun tuꞌn. 34 Pero miꞌn tzꞌel baj wiꞌne tcyakil tcawbil, cucx ctel toclen te rey, ex maxi cꞌelel toclen ocxi tcyim, nok tuꞌn tlaj nmajene David aju jaw nscꞌoꞌne, ex o che japun ke nmandamyente ex ke nleye tuꞌn. 35 Cꞌelel wiꞌne cawbil tuj tkꞌab tcyꞌajal, ex cxel nkꞌoꞌne laj cꞌloj cyiyjil aj Israel teya. 36 Nok jun cꞌloj cyjel nkꞌoꞌne te tcyꞌajal Salomón, tuꞌn miꞌn tcub yupj tiyjil David tuj Jerusalén aju tnam jaw nscꞌoꞌne tuꞌn ttzaj naꞌn nbiye tuj. 37 Ex aya cꞌoquel te rey wuꞌne tuꞌn tcawina tibaj tcyakil nok nicꞌpunx taja, ex tuꞌn toca te cyrey aj Israel. 38 Ka ma japun tuꞌna tcyakilju cxel nmaꞌne teya, ex ka baꞌn ma tzꞌeꞌla ke tbinchbena tuj nwitze, ex ka ma che japun ke nleye ex ke nmandamyente tuꞌna, ic tzaꞌn o japun tuꞌn David aju nmajene, chin teltzune tucꞌila, ex oc tcyima, cucx che jawil nscꞌoꞌne ke tiyjila tuꞌn cyoc te rey, ic tzaꞌn cyaj bant tiꞌj wuꞌne tucꞌil David; ex che tel ke aj Israel tjakꞌ tcawbila. 39 Atzun ke mastl tiyjil David, cbel nkꞌoꞌne cycastiw nok tuꞌn tlaj il ma tbincha Salomón, pero mya te jumajx, chi Dios teya, chitzun Ahías xi tmaꞌn te Jeroboam.

40 Tuꞌntzun jlu, oc tilil tuꞌn Salomón tuꞌn tcub byoꞌn Jeroboam tuꞌn; pero xi ok Jeroboam tuj Ejipt, o pon tucꞌil Sisac aju rey te Ejipt, ex atzun o cyaj ten ma chixin tejxi tcyim Salomón.

41 Aju chꞌintl txꞌolbaben tiꞌj Salomón ex ju tnabl, tucꞌix tcyakilju o tbincha, atzun tzꞌiban tuj uꞌj jatum taꞌ tcyakilju txꞌolbaben tiꞌj takꞌunben Salomón. 42 O ten Salomón te rey tuj tnam Jerusalén 40 abkꞌi, ex o cawin cyibaj cycyakil aj Israel. 43 Tej tcyim, atzun cuꞌx makuꞌn tuj tnam toc tbi Ttanmi David aju ktzan tman. Ex a Roboam aju tcyꞌajal cyaj ten te rey te t-xel.