Aju xuꞌj toc te rey tuj txꞌotxꞌ Sabá pon visitaril te rey Salomón
10
Aju xuꞌj toc te rey tuj txꞌotxꞌ Sabá o tbi tkanil tiꞌj Salomón tuꞌnju otok tzaj kꞌoꞌn nim tnabl tuꞌn Kman, tzajtzun tuꞌn tul tuj Jerusalén tuꞌn toc Salomón tuj xjel cyuwxix tuꞌn. 2 Nim txkan xjal ucꞌin tuꞌn, cyucꞌix ke chej camey ikan perjum cyuꞌn, tucꞌix nim tajlal ttxꞌotxꞌil kꞌan pwak, cyucꞌix ke tal abj tbanilxix. Tejtzun tpon twitz Salomón, xi tkanin tcyakilju ximamaj tuꞌn. 3 O tzakꞌwet tcyakil xjel tuꞌn Salomón. Mi jun xjel mintiꞌwt tzakꞌwet tuꞌn. 4 Aju xuꞌj toc te rey tuj txꞌotxꞌ Sabá, tej tqueꞌyinte aju tnabl Salomón ex aju tex tja otok jaw tbinchaꞌn, 5 ex aju tbanil wabj tcub twi tmes, ex ke lugar jatum in che ocx ten ke xjal maꞌ cyoclen ateꞌc ttxlaj, ex tmodiyil tzaꞌn tten in che ajben te rey ex aju cyxbalun ke tmajen ex ke kꞌol tcꞌa, ex ke alumaj in cub cypatun tuj tja Dios; tuꞌn tcyakil jlu, biꞌx o naj tnabl, 6 ex xi tmaꞌn te rey: Aju tkanil o nbiye tuj ntanmiye tiꞌj ju in tbinchaꞌna ex tiꞌj tnabla, ax toc ke jlu; 7 pero maxitzun ma txi wocslaꞌne tejxi ẍin ule tzalu, ex tejxi xwile tuꞌn nwitze. Ax toc nok chꞌin aju o tzaj kꞌmaꞌn weye, porque mas nim tnabla ex ju tkꞌinumabla at ic tzaꞌn o nbiye. 8 Nimlo tzalajbil cye ke xinak ateꞌ tucꞌila, ex nimlo tzalajbil in cynaꞌn ke ajbel teya, akeju ax ateꞌ ttxlaja in che bin tiꞌj tyola nim tnabl. 9 Nimanxwit tbi Kman aju Tdiosa, tuꞌnju in tzalaj tiꞌja ex ma tzꞌoc kꞌoꞌna te cawil cye aj Israel. Tuꞌnju tcꞌujlalil Kman cucx tten cyiꞌj aj Israel ma tzꞌoc kꞌoꞌna te rey tuꞌntzun tcawina tujxix tumel ex tzꞌaklxix, chi xuꞌj.10 Xitzun tkꞌoꞌn xuꞌj ttxꞌotxꞌil kꞌan pwak te rey Salomón, chꞌixmi jun syent quintal talil, tucꞌix nimxix perjum ex cyucꞌix ke tal abj tbanilxix. Bajxtok pon txkan perjum cyucꞌil aj Israel ic tzaꞌn ju pon te oyaj te Salomón tuꞌnju xuꞌj toc te rey tuj txꞌotxꞌ Sabá.
11 Ax icx tuj txꞌotxꞌ Ofir otok tzaj kꞌiꞌn nimxix ttxꞌotxꞌil kꞌan pwak. A jlu ul cyikan ke nintz barc te rey Hiram; tucꞌix txkan tzeꞌ sándalo tzaj cyiꞌn tujx lugar ma chixin, cyucꞌix ke tal abj tbanilxix. 12 Tiꞌj ju tzeꞌ sándalo o tbincha Salomón jun peꞌn tiꞌj tja Dios, tucꞌix tiꞌj ju tex tja, ex e bant ke chnab arpa tuꞌn tiꞌj tzeꞌ lu, ax icx e bant juntl wik chnab salterio cybi ic che queꞌyin ic tzaꞌn quitar, tuꞌn cyajben cye ke chimbal. Bajxtok pon kꞌiꞌn txkan tzeꞌ sándalo ic tzaꞌn jlu, ex bajx pon kꞌiꞌn juntl maj jaꞌlo. 13 Atzunte rey Salomón xi tkꞌoꞌn teju xuꞌj rey tuj txꞌotxꞌ Sabá tcyakilju o pon tcꞌuꞌj tiꞌj ex el ttziꞌ tiꞌj, ex parttzun aju te Salomón xi toyin tuꞌn tex tgan. Te tibajxi tcyakil jlu, ajtzun xuꞌj tuj ttanmi cyucꞌix ke xjal ajbel te.
El tkanil tiꞌj Salomón ex tiꞌj tkꞌinumabl
14 Aju tajlal kꞌan pwak o tcꞌam Salomón tuj junjun abkꞌi, jweꞌ syent quintal, 15 ex mintiꞌ oc tajlal aju in chjet cyuꞌn ke comersyant ex cyuꞌn ke cꞌayil, cyuꞌn cycyakil ke rey tuj txꞌotxꞌ Arabia, ex cyuꞌn gobernador tuj junjun partament te Israel. 16 Xi tmaꞌn rey Salomón tuꞌn cybaj binchaꞌn cab syent makbil nmak ke, kꞌan pwak cytxꞌotxꞌil, ic che queꞌyin ic tzaꞌn ke makbil in che ajben cye soldad tuj kꞌoj, teyle junjun chꞌixmi xi tiꞌn wajxak libr kꞌan pwak; tuꞌn martiy e baj txꞌinoꞌn. 17 Ax icx xi tmaꞌn tuꞌn cybaj binchaꞌn juntl ox syent makbil tal chꞌin ke, ex teyle junjun chꞌixmi xi tiꞌn cyaje libr kꞌan pwak, ax tuꞌn martiy e baj txꞌinoꞌn, ex e ocx tkꞌoꞌn cycyakil ke makbil lu tuj ja toc tbi “Tjakꞌ Tkan Tzeꞌ Líbano”. 18 Ax icx xi tmaꞌn tuꞌn tbaj binchaꞌn jun nintz kꞌukbil jatum tuꞌn tcub keꞌ cawil, marfil ttxꞌotxꞌil, ex xi tmaꞌn tuꞌn tbaj loꞌtzin tiꞌj tuꞌn kꞌan pwak tbanilxix. 19 Aju kꞌukbil lu at kak grad te; ex aju ttzal tiꞌj seꞌwnin tten, ex at cytembil kꞌabaj cycabil pacꞌ ttxlaj kꞌukbil, ex cytxlajtzun ke cabe cytembil kꞌabaj lu at jun tilbilal balun waꞌl tcub ttxlaj junjun pacꞌ. 20 Ax icx waꞌl cycub cablajtl tilbilal balun, junjun te junjun pacꞌ ttxlajele kak grad. Bajxtok binchet icju tuꞌn juntl rey cyuj mastl nasyon. 21 Ax icx cycyakil tcꞌabl rey kꞌan pwak cytxꞌotxꞌil, ax icx cycyakil mastl macbil in che ajben tuj ja toc tbi “Tjakꞌ Tkan Tzeꞌ Líbano”. Mi jun cyxol ke jlu sak pwak ttxꞌotxꞌil, porque aju sak pwak tuj tkꞌijlalil Salomón myaxix wiꞌyil. 22 Ex attok txkan nmak barc te rey in che ul ajtok jun maj tuj ox abkꞌi junx cyucꞌil ke barc te rey Hiram, in ul cyiꞌn kꞌan pwak, sak pwak, marfil, ex ke xmaẍ ex jun wik chyuꞌj pavo real cybi.
23 Ate rey Salomón oc te mas maꞌ toclen cywitz cycyakil mastl rey twitz txꞌotxꞌ tuꞌnju o ten nim tkꞌinumabl, ex tuꞌnju at nim tnabl. 24 Cycyakil xjal o cyajbe tuꞌn cyqueꞌyinte twitz Salomón, ex tuꞌn cybinte tiꞌj tnabl otok tzaj tkꞌoꞌn Dios. 25 Ex cycyakil abkꞌi in pon cyiꞌn xjal oyaj te Salomón; ke tiꞌxti sak pwak cytxꞌotxꞌil, ex ke tiꞌxti kꞌan pwak cytxꞌotxꞌil, ke xbalun, ke macbil in che ajben tuj kꞌoj, ke tcꞌocꞌjal, ke chej cabay ex ke mul.
Oc ten Salomón negosyaril cyiꞌj carwaj ex cyiꞌj ke chej
26 Baj tchmon Salomón ke carwaj ex ke chej cabay. Attok jun mil tucꞌil cyaje syent tcarwaj ex cablaj mil tchej. Ocx tkꞌoꞌn ke jlu tuꞌn cyten cyuj ke cwartel jatum ateꞌcx ke carwaj in che ajben tuj kꞌoj ex tuj lugar nikayin ttxlaj rey tuj Jerusalén. 27 O chmet nimxix sak pwak tucꞌil Salomón tuj Jerusalén mer ic tzaꞌn abj; ex nim tzeꞌ wiꞌten o chmet mer ic tzaꞌn tkan higo in tzaj chꞌiy tuj cꞌul tuj chkꞌajlaj. 28 Ke tchej Salomón atzun in che tzaj kꞌiꞌn tuj Ejipt ex tuj Cilicia, porque ke comersyant te Salomón in cheꞌx aj lakꞌolte ma chixin. 29 Oc ttzaj lakꞌoꞌn jun carwaj tuj Ejipt, kak syent sak pwak twiꞌ, atzun jun chej, jun syent tucꞌil 50. Ex cycyakil ke rey cye aj Hetey ex ke rey cye aj Siria in xi cylakꞌoꞌn ke jlu cyucꞌil ke tmajen Salomón.