Aju xuꞌj toc te rey tuj txꞌotxꞌ Sabá pon visitaril rey Salomón
9
Aju xuꞌj toc te rey tuj txꞌotxꞌ Sabá o tbi tkanil tiꞌj rey Salomón ka at nim tnabl. Tzajtzun tuꞌn tul tuj Jerusalén tuꞌn cyxi tkanin ke xjel cyuwxix te Salomón, ex nimxix txkan xjal ucꞌin tuꞌn, cyucꞌix ke chej camey ikan perjum cyuꞌn, tucꞌix nim tajlal kꞌan pwak ex ke tal abj puro tbanilxix. Tejtzun tul twitz rey Salomón xi tkanin tcyakilju ximamaj tuꞌn. 2 Xi ttzakꞌweꞌn Salomón cycyakil ke t-xjel, mi jun xjel mintiꞌwt tzakꞌwet tuꞌn Salomón. 3 Atzunte xuꞌj aju toc te rey tuj txꞌotxꞌ Sabá, tej tqueꞌyinte tnabl Salomón ex ju tex tja otok jaw tbinchaꞌn, 4 ju tbanil tchiꞌ tcub twiꞌ tmes, ke lugar jatum in che ocx ten ke xjal maꞌ cyoclen ateꞌc ttxlaj, ex aju tmodiyil tzaꞌn tten in che ajben tmajen ex ju cyxbalun tbanilxix toc, ex ke kꞌol tcꞌa ex ju cyxbalun tbanilxix toc, ex ke grad tuꞌn tjapun twitz tja Dios; tuꞌn tcyakil jlu biꞌx o naj tnabl xuꞌj, 5 ex xi tmaꞌn te rey cyjaꞌ: Aju tkanil o nbiye max tuj ntanmiye tiꞌj tcyakilju in tbinchaꞌna ex tiꞌj tnabla, ax toc ke jlu; 6 mintiꞌ xi nnimane nej, maxitzun ma txi nnimane jaꞌlo tejxi ma chin ule tzalu ex ma wile tuꞌn nwitze. Ax toc nok chꞌin tzaj kꞌmaꞌn weye tiꞌj tnabla, porque mas nim tnabla at twitzju o nbiye. 7 Nimlo tzalajbil cye ke xjal ateꞌ tucꞌila, ex nimlo tzalajbil cye ke ajbel teya, akeju ax ateꞌ ttxlaja ex in che bin tiꞌj tyola nimxix tnabl. 8 Nimanxwit tbi Kman aju Tdiosa tuꞌnju in tzalaj tiꞌja, ex ma tzꞌoc kꞌoꞌna tuꞌn te cawil cyibaj aj Israel. Ex tuꞌnju tcꞌujlalil Kman cyiꞌj aj Israel tajbil cucx tuꞌn cyten ke te jumajx, cyjaꞌtzun ma tzꞌoc kꞌoꞌna te rey cyibaj, tuꞌntzun tcawina tuj tumelxix ex tzꞌaklxix, chi xuꞌj rey.9 Xitzun tkꞌoꞌn xuꞌj kꞌan pwak te rey Salomón, balo 90 quintal, tucꞌix nim perjum ex cyucꞌix ke tal abj tbanilxix. Bajxtok pon txkan perjum cyucꞌil aj Israel ic tzaꞌnju xi kꞌoꞌn te rey Salomón tuꞌnju xuꞌj toc te rey tuj txꞌotxꞌ Sabá.
10 Ke tmajen rey Hiram cyucꞌix ke tmajen rey Salomón otok tzul cyiꞌn kꞌan pwak tzaj cyiꞌn tuj txꞌotxꞌ Ofir, ax icx tzaj cyiꞌn ma chixin txkan tzeꞌ sándalo tbi, at tcꞌocꞌjal, cyucꞌix ke tal abj tbanilxix. 11 Tiꞌj tzeꞌ sándalo o tbincha Salomón ke grad jatum tuꞌn cyjapun xjal twitz tja Dios, tucꞌix tiꞌj tja rey, ax icx e bant ke chnab arpa ex ke quitar tiꞌj tzeꞌ sándalo, tuꞌn cyajben cyuꞌn keju baꞌn che chimban. Bajxtok pon kꞌiꞌn txkan tzeꞌ sándalo ic tzaꞌn jlu tuj txꞌotxꞌ Judá. 12 Xi tkꞌoꞌn rey Salomón te xuꞌj rey tuj txꞌotxꞌ Sabá tcyakilju o pon tcꞌuꞌj xuꞌj tiꞌj ex tcyakilju xi tkanin, ex mas nim oyaj xi tkꞌoꞌn Salomón te xuꞌj rey ic tzaꞌnju otok tzul tiꞌn. Te tibajxi jlu ajtzun meltzꞌaj xuꞌj rey tuj ttanmi cyucꞌix ke xjal ajbel te.
El tkanil tiꞌj tnabl Salomón ex tiꞌj tkꞌinumabl
13 Tcyakil tajlal kꞌan pwak o tcꞌam Salomón tuj junjun abkꞌi balo jweꞌ syent quintal, 14 ex mintiꞌ oc tajlal aju in tzaj cychjoꞌn ke comersyant, ex aju in tzaj cychjoꞌn ke xcꞌaꞌmil cꞌaxjel. Ax icx cycyakil ke rey tuj txꞌotxꞌ Arabia ex ke gobernador te junjun tnam, nnuꞌl cyiꞌn kꞌan pwak ex sak pwak tucꞌil rey Salomón. 15 Xi tmaꞌn rey Salomón tuꞌn cybaj binchet cab syent makbil kꞌan pwak cytxꞌotxꞌil ex nmak ke, teyle junjun chꞌixmi xi tiꞌn wajxak libr kꞌan pwak, ex tuꞌn martiy e baj txꞌinoꞌn. 16 Ax icx xi tmaꞌn tuꞌn cybaj binchet ox syent makbil tal chꞌin ke, ex teyle junjun chꞌixmi xi tiꞌn cyaje libr kꞌan pwak; ax tuꞌn martiy e baj txꞌinoꞌn, ex e ocx tkꞌoꞌn cycyakil ke makbil lu tuj tja rey, aju toc tbi Tjakꞌ Tkan Tzeꞌ Líbano. 17 Ax icx xi tmaꞌn tuꞌn tbaj binchet jun nintz kꞌukbil jatum tuꞌn tcub keꞌ cawil, marfil ttxꞌotxꞌil, ex xi tmaꞌn tuꞌn tbaj loꞌtzin tiꞌj tuꞌn kꞌan pwak tbanilxix. 18 Aju kꞌukbil at kak grad te ex jun waꞌlbil jatum tuꞌn cycub ten tkan, kꞌan pwak ttxꞌotxꞌil, ex at cytembil kꞌabaj cycabil pacꞌ te kꞌukbil, ex ttxlajtzun ke cabe ttembil kꞌabaj lu at jun tilbilal balun junjun pacꞌ, waꞌl cycub ke ttxlaj. 19 Ax icx waꞌl cub cablaj tilbilal balun, junjun te junjun pacꞌ cytxlajile ke grad. Bajxtok binchet jlu icju tuꞌn juntl rey cyuj ke mastl nasyon. 20 Ax icx tcyakil tcꞌabl rey kꞌan pwak cytxꞌotxꞌil ex cycyakil mastl macbil in che ajben tuj tja rey, aju toc tbi Tjakꞌ Tkan Tzeꞌ Líbano. Mi jun cyxol ke jlu sak pwak ttxꞌotxꞌil, porque aju sak pwak tuj tkꞌijlalil Salomón myaxix wiꞌyil. 21 Ex attok txkan tbarc rey in cheꞌx aj tuj tnam Tarsis cyucꞌix ke tmajen rey Hiram; in che ul aj jun maj tuj ox abkꞌi, ex in tzaj cyiꞌn kꞌan pwak, sak pwak, marfil, xmaẍ ex ke chyuꞌj pavo real cybi.
22 Mas nim tkꞌinumabl rey Salomón ex mas nim tnabl o ten cywitz cycyakil mastl rey e ten twitz txꞌotxꞌ. 23 Cycyakil ke rey twitz txꞌotxꞌ o cyajbe tuꞌn cyqueꞌyinte twitz Salomón ex tuꞌn cybinte tiꞌj tnabl otok tzaj tkꞌoꞌn Dios, 24 ex cycyakil abkꞌi in pon cyiꞌn oyaj te Salomón: At macbil sak pwak ttxꞌotxꞌil, at kꞌan pwak ttxꞌotxꞌil, at xbalun, at macbil in che ajben tuj kꞌoj, at t-samel chibj at tcꞌocꞌjal, at chej cabay ex at chej mul.
Oc ten Salomón xcꞌaꞌmil cyiꞌj carwaj ex cyiꞌj chej cabay
25 O bant cyaje mil ja tuꞌn Salomón jatum tuꞌn cyten ke tchej cabay ex ke tcarwaj in che ajben tuj kꞌoj, ex attok cablaj mil xjal baꞌn che chejin. Ake jlu e ocx tkꞌoꞌn tuꞌn cyten cyuj ke cwartel jatum ateꞌ ke carwaj in che ajben tuj kꞌoj ex tuj lugar nikayin ttxlaj tuj Jerusalén. 26 O cawin rey Salomón cyibaj cycyakil ke rey tzajx keꞌ ttzi nima Éufrates ex pon baj tiꞌj cytxꞌotxꞌ aj Filistey, ex max jatum ulni baj ttxaꞌn cytxꞌotxꞌ aj Ejipt. 27 Ex o chmet nimxix sak pwak tucꞌil rey Salomón tuj Jerusalén mer ic tzaꞌn abj, ex o chmet nim tzeꞌ wiꞌten ic tzaꞌn tkan higo in tzaj chꞌiy tjakꞌ cꞌul tuj chkꞌajlaj t-xe witz. 28 Ke tchej Salomón, atzun in che tzaj kꞌiꞌn tuj Ejipt ex cyuj cycyakil mastl nasyon.
Tej tcyim Salomón
29 Aju mastl txꞌolbaben tiꞌj Salomón, atxix tej ttzyet tcawin ex tejxi tcyim, atzun tzꞌiban cyuj ke uꞌj cub ttzꞌiban Natán aju t-sanjel Dios, ex tuj uꞌj jatum tzꞌiban tkanil kꞌmanjtz tuꞌn Ahías aju aj Silo, ax icx tuj uꞌj jatum tzꞌiban ke yol tzaj tyecꞌun Dios te Iddo tiꞌj Jeroboam aju tcyꞌajal Nabat. 30 O cawin Salomón 40 abkꞌi cyibaj cycyakil aj Israel tuj Jerusalén, 31 ex tejtzun tcyim, cuꞌx makuꞌn tuj lugar toc tbi Ttanmi David aju ktzan tman, ex a Roboam aju tcyꞌajal cyaj ten te rey te t-xel.