3 Te tibajxi jlu cub be tuꞌn Salomón tuꞌn toc tzokpaj tiꞌj tnam Hamat, aju at tuj txꞌotxꞌ Soba, cub tiꞌj tuꞌn ex oc te tajwil txꞌotxꞌ. 4 Ax icx jaw tbinchaꞌn juntl maj tnam Tadmor tuj lugar tzkij txꞌotxꞌ, cyucꞌix cycyakil tnam ateꞌ tiꞌjele tnam Hamat, jatum in cheꞌx cꞌuꞌt ke twitz awal. 5 Ax icx jaw tbinchaꞌn juntl maj tnam Bet-horón te jawni ex ju tnam Bet-horón te cubni, akeju tnam lu oc tkꞌoꞌn muro cyiꞌj, ax icx e oc tkꞌoꞌn ke cypwertil cyucꞌix ke tranc cyiꞌj. 6 Ax icx jaw tbinchaꞌn juntl maj tnam Baalat ex ke mastl tnam jatum in cheꞌx cꞌuꞌt ke twitz awal, ex e baj tbinchaꞌn cycyakil ke cwartel jatum in che ocx ten ke carwaj in che ajben tuj kꞌoj, cyucꞌix ke cwartel cye ke soldad in che bet cyibaj chej, ex baj tbinchaꞌn tcyakilju tajbiltok tuꞌn tbant tuj Jerusalén, tuj tiwitz txꞌotxꞌ Líbano ex tuj tcyakil txꞌotxꞌ attok tjakꞌ tcawbil. 7 Atzun ke aj Hetey, aj Amorrey, aj Peresey, aj Hevey ex aj Jebusey, akeju mya aj Israel ke, 8 ake jlu cyiyjil keju e cyaj ankꞌin ex mintiꞌ e cub byoꞌn cyuꞌn aj Israel nok oꞌcx ax e cyaj ten cyxol, atzun ke jlu oc tkꞌoꞌn Salomón il cyiꞌj tuꞌn cyakꞌnan tiꞌj takꞌun, ax icx in bant cyiꞌj jaꞌlo. 9 Pero mi jun aj Israel oc tkꞌoꞌn Salomón tuꞌn toc te tmajen, nok oꞌcx e oc tkꞌoꞌn te soldad, te nejenel cye soldad, ex te nejenel cye soldad cyocx cyuj carwaj in che ajben tuj kꞌoj ex te nejenel cye soldad cyjax cyibaj chej. 10 Atzun ke caporal, akeju cyaj kꞌoꞌn akꞌuntl tuj cycwent tuꞌn rey Salomón, attok cab syent tucꞌ 50 cybaj.

11 Tzaj tiꞌn Salomón tmeꞌjel Faraón tuj tnam toc tbi Ttanmi David, ex pon tiꞌn tuj ja otok jaw tbinchaꞌn tuꞌn tajben te, porque tma: Aju nxuꞌjile mlay najan tuj tja David aju ktzan rey cye aj Israel, porque aju lugar jatum o tzꞌocx ten ju cax cꞌubl tley Dios, xjansaꞌmaj.

12 Ex cucx in xi tkꞌoꞌntok Salomón ke oyaj patun in che cub tibaj altar te Kman, aju altar tuꞌnx Salomón otok baj tbinchaꞌn twitz tja Dios, 13 in xi tkꞌoꞌn cyuj ke kꞌij banin tiꞌj ic tzaꞌnx tzꞌiban tuj tley Moisés, ex atzun ke kꞌij lu: Ke kꞌij te ojlabl, ke ninkꞌij oc ttzaj queꞌyin juntl acꞌaj xjaw ex ke ox kꞌij ninkꞌij in che cub icꞌset tuj junjun abkꞌi: Aju ninkꞌij oc cywaꞌn xjal pan mintiꞌ t-samel tuj tuꞌn tjaw mal tcꞌuꞌj, ju ninkꞌij oc tjapun wuk seman tbajlenxi xjan kꞌij, ex ju ninkꞌij oc cybant ke tal ja t-xak tzeꞌyin cywiꞌ.

14 Ex baj tpaꞌn Salomón ke pal tuj cꞌlojin tuꞌn cyajben tuj takꞌun Dios ic tzaꞌn banimaj tiꞌj tuꞌn David aju ktzan tman, ax icx ke aj Leví xi kꞌoꞌn cyoclen tuꞌn cybitzan ex tuꞌn cyonin cyucꞌil ke pal tiꞌj nok alcye tuꞌn tbant junjun kꞌij. Ax icx e baj paꞌn tuj cꞌlojin ke cwentil ttzi ja, tuꞌn cycub ten ttzi junjun pwert, porque cyjaꞌtzun tten kꞌmaꞌmaj tuꞌn David aju tmajen Dios. 15 Cyjaꞌtzun, mintiꞌ el cypaꞌn cyib ke pal ex ke aj Leví tiꞌj ju cyaj tmaꞌn rey David, ax icx ke cwentil jatum cꞌuꞌn ju kꞌinumabl. 16 Cyjaꞌtzun, tcyakilju cub t-ximan Salomón tuꞌn tbant o japun tuꞌn, tzyet takꞌnan tiꞌj atxix tuj kꞌij tej cycub keꞌ t-simyentil tja Dios, ex tejxi tbaj bant tcyakil.

17 Xiꞌtzun Salomón tuj tnam Ezión-geber ex tuj Elat, akeju tnam ateꞌ ttziꞌyile mar tuj cytxꞌotxꞌ aj Edom. 18 Atzunte rey Hiram tzaj t-samaꞌn txkan barc cyucꞌix ke xjal maꞌ cyoclen ttxlaj, cyucꞌix ke xinak yucul barc in che ajben te ex at cynabl tuꞌn cyyucun barc. Atzun ke jlu e jeꞌx junx cyucꞌil ke xjal maꞌ cyoclen ttxlaj rey Salomón, ex e pon tuj tnam Ofir, atzun tzaj cyiꞌn ox syent tucꞌil 40 quintal kꞌan pwak ex ul cyiꞌn tucꞌil rey Salomón.