Cyaj bant tiꞌj jun yol tuꞌn Dios tucꞌil Salomón
9
Tej tbaj bant tja Kman tuꞌn Salomón, tucꞌix ju tex tja ex tucꞌix tcyakilju ximamaj tuꞌn, 2 cub tyecꞌun tib Kman twitz Salomón tcabmajin, ic tzaꞌn tej tcub tyecꞌun tib tuj lugar Gabaón, 3 ex tzaj tmaꞌn te: Ma nbiye aju tcubsbila ex aju ma tzaj tkanina weye, ex ma cub ncyꞌiwlaꞌne aju ja lu aju ma jaw tbinchaꞌna, jatum tuꞌn ttzaj naꞌn nbiye tuj te jumajx. Cucx cꞌoquel ncwentine aju ja lu, ex cucx tzul nnaꞌne. 4 Atzun jaꞌlo, ka ma beta tuj tumelxix nwitze ex mintiꞌ tpaltila, ic tzaꞌn o tbincha David aju ktzan tmana, ex ka ma japun tuꞌna tcyakilju o txi nmaꞌne teya, ex ka ma cheꞌx tnimana ke nleye ex ke nxnakꞌtzbile, 5 akine chin cyuwsalte tcawbila te jumajx cyxol aj Israel, ic tzaꞌn o txi ntziyane te David aju ktzan tmana, tej t-xi nmaꞌne te ka ax cyxol ke tiyjil cucx tuꞌn cyjaw nscꞌoꞌne ke xjal tuꞌn cyoc te cawil cyibaj aj Israel. 6 Pero ka akeye, ex ka ake cycꞌwaꞌle ma tzꞌel cypaꞌn cyibe wiꞌje, ex ka miꞌn ẍe japun ke nmandamyente ex ke nleye cyuꞌne, aju o txi nmaꞌne cyeye, ex ka ma che cꞌulune cywitz junxitl dios, ex ka ma che ajbene cye, 7 akine chin elex lajonte cye aj Israel tuj txꞌotxꞌ o txi nkꞌoꞌne te cyetzbil, ex aju ja ma baj ncyꞌiwlaꞌne cyjel ncoline, ex ke aj Israel che oquel xmayin cyuꞌn cycyakil nasyon ex che elel icꞌun. 8 Ex aju ja lu cbel kꞌuchj, ex cycyakil xjal che icꞌel bet ttxlaj ttxꞌakan ja che jawil labin tiꞌj ex che oquel ten xmayil tiꞌj ex oc cymaꞌ: ¿Tikuꞌn ma tbincha Dios icju tiꞌj tnam lu ex tiꞌj ja lu? 9 Ex ctzajel tzakꞌweꞌn cye: Tuꞌnju ma tzꞌel cypaꞌn cyib tiꞌj Cydios aju etz kꞌinte cye cyxeꞌchel tuj Ejipt, ex tuꞌnju ma che oc ten cꞌulul cywitz junxitl dios ex ma che ajben cye; tuꞌntzun tlaj tcyakil jlu ma tzaj tkꞌoꞌn Dios jun nintz mya baꞌn cyibaj, che chilo xjal, chi Dios.Txkantl akꞌuntl e bant tuꞌn Salomón
10 Winkin abkꞌi xi tiꞌn tuꞌn tbant cabe ja tuꞌn Salomón, aju tja Dios ex tucꞌix ju tex tja, 11 ex tbajlenxi jlu xi tkꞌoꞌn Salomón winkin tnam ateꞌ tuj Galiley te Hiram aju rey te tnam Tiro, te cyxel ke tzeꞌ wiꞌten, ke tzeꞌ tzaj, ex tcyakil kꞌan pwak aju otok tzaj tkꞌoꞌn Hiram te. 12 Tejtzun t-xiꞌ Hiram queꞌyil cye ke tnam akeju otok che tzaj tkꞌoꞌn Salomón te, mintiꞌ o tzalaj cyiꞌj, 13 ex tma: ¿Erman, maj atzun ke tnam lu ma che tzaj tkꞌoꞌna weye? Chi Hiram. Cyjaꞌtzun aju lugar jatum ateꞌ ke tnam lu oc tkꞌoꞌn tbi Cabul, ex axtzun tbi toc jaꞌlo. 14 Aju kꞌan pwak xi tkꞌoꞌn Hiram te rey Salomón, japun jun tajlal te 87 quintal.
15 Atzun ke akꞌuntl lu oc tkꞌoꞌn rey Salomón lajwers tiꞌj tuꞌn tbant cyuꞌn ke xjal mya aj Israel ke tej tbant tja Kman, tucꞌix tja rey, tucꞌix tuꞌn tnojset jul tuꞌn toc te chkꞌajlaj, ex xi tbinchaꞌn ju muro tocsaꞌn tiꞌj Jerusalén, ex e jaw tbinchaꞌn juntl maj ke tnam Hazor, Meguido ex Gezer. 16 Otok tzyet tnam Gezer tuꞌn Faraón aju rey tuj Ejipt, cub tpatun ex e cub tbyoꞌn cycyakil aj Canaán najlketok tuj tnam, ex xitzun tkꞌoꞌn te jun oyaj te tmeꞌjel tej tmojeꞌ tmeꞌjel tucꞌil Salomón. 17 Jawtzun tbinchaꞌn Salomón juntl maj ju tnam Gezer, tucꞌix ju tnam Bet-horón aju tcub cubni, 18 cyucꞌix ke tnam Baalat ex Tamar, akeju ateꞌ tuj lugar tzkij txꞌotxꞌ te Judá. 19 Ax icx jaw tbinchaꞌn juntl maj cycyakil tnam jatum in xi cꞌuꞌt twitz awal, ax icx ke cwartel jatum in che ocx ten ke carwaj in che ajben tuj kꞌoj, cyucꞌix ke cwartel cye soldad in che bet cyibaj chej, ex tcyakil aju tajbiltok tuꞌn tbant tuj Jerusalén, tuj tiwitz txꞌotxꞌ Líbano ex tuj tcyakil txꞌotxꞌ attok tjakꞌ tcawbil. 20 Atzun ke xjal najlke cyuj, akeju aj Amorrey, ke aj Hetey, ke aj Ferezey, ke aj Hevey ex ke aj Jebusey, akeju e cyaj ankꞌin, ake jlu mya aj Israel ke, 21 akeju cyiyjil e cyaj ten te tibajxi tuj txꞌotxꞌ ex mintiꞌ e naj cyuꞌn aj Israel, atzun ke jlu e oc lajwersin tiꞌj akꞌuntl tuꞌn Salomón, ax icx in bant cyiꞌj jaꞌlo. 22 Pero mintiꞌ e oc tkꞌoꞌn ke aj Israel akꞌnal tiꞌj akꞌuntl lajwers in bant, nok oꞌcx e oc tkꞌoꞌn te soldad, ex at xi tkꞌoꞌn cyoclen tuꞌn cyten ttxlaj, ex at e oc te nejenel cye soldad ex te nejenel cye soldad cyocx cyuj carwaj in che ajben tuj kꞌoj ex cye ke soldad cyjax cyibaj chej. 23 Ax icx oc tkꞌoꞌn jweꞌ syent tucꞌ 50 te caporal; tuj cycwenttzun ke jlu cyaj tkꞌoꞌn Salomón akꞌuntl, ex atzun ke jlu in che kꞌmante cye xjal nok alcye akꞌuntl tuꞌn tbant.
24 Aju tmeꞌjel Faraón etz tuj tnam Ttanmi David tbi ex xiꞌ najal tuj ja otok jaw tbinchaꞌn Salomón te te. Cuꞌxtzun tnojsaꞌn Salomón jul tuꞌn toc te chkꞌajlaj.
25 Tbajlenxi bant tja Dios, ox maj tuj abkꞌi in xi tkꞌoꞌn Salomón ke oyaj patun in che cub, cyucꞌix ke chojbil te mojbabl tibil in cub tkꞌoꞌn tibaj altar aju otok jaw tbinchaꞌn te Kman, ax icx in cub tpatun storac twitz Kman.
26 Ax icx cub tbinchaꞌn rey Salomón ke barc tuj lugar Ezión-geber, aju tcub junx tucꞌil tnam Elat tuj cytxꞌotxꞌ aj Edom, aju taꞌ ttziꞌ ju mar Cyak Queꞌyin. 27 Xi t-samaꞌn Hiram ke xjal at cynabl tuꞌn cyyucun barc, tuꞌn cyxiꞌ tuj barc junx cyucꞌil xjal at cyoclen ttxlaj Salomón. 28 E pon tuj ju lugar Ofir tbi, ex atzun tzaj cyiꞌn ox syent tucꞌ laj quintal kꞌan pwak, ex ul cyiꞌn tuꞌn tpon tucꞌil rey Salomón.