Aju cax cꞌubl tley Dios pon kꞌiꞌn tuj tja Dios
8
E octzun tchmoꞌn Salomón ke tij xjal cyxol aj Israel tuꞌn cyul tucꞌil tuj Jerusalén, cyucꞌix cycyakil ke nejenel cyxol cycyakil cꞌloj cyiyjil aj Israel, ex cyucꞌix ke nejenel cyxol cycyakil cꞌloj aj Israel at cyxilen cyxolx, tuꞌn t-xi kꞌibaj ju cax cꞌubl tley Dios tuj Sión aju toc tbi Ttanmi David. 2 Tej tul canun ju ninkꞌij maꞌ t-xilen tuj xjaw Etanim tbi, aju twukin xjaw te abkꞌi, atzun kꞌij oc cychmon cyib cycyakil aj Israel tucꞌil rey Salomón. 3 E pon cycyakil cytijil xjal cyxol aj Israel, ex ake pal e tzaj kꞌinte cax, 4 ex icꞌ cyiꞌn aju cax, tucꞌix ja xbalun te mojbabl tibil tucꞌil Dios, cyucꞌix cycyakil ke macbil xjansaꞌmaj at tuj, tuꞌn tpon cyiꞌn twitz tja Dios, ex ake pal cyucꞌix ke aj Leví e tzaj kꞌinte cye. 5 Ate rey Salomón, cyucꞌix cycyakil tnam xjal aj Israel otok tzꞌoc cychmon cyib tucꞌil, e cub ten twitz cax ex e cub cybyoꞌn ke ẍneꞌl ex ke wacẍ, tuꞌn t-xi cykꞌoꞌn te oyaj te Dios. Cycyakil alumaj lu mintiꞌ bant cyajlanjtz tuꞌnju nimxix. 6 Te tibajxitzun jlu, xi cyiꞌn ke pal aju cax cꞌubl tley Dios, ex pon cyiꞌn tuj tja Dios tuj ju Lugar Mas Xjanxix, ocx cykꞌoꞌn tjakꞌ cyxicꞌ ke tilbilal querubín. 7 Ke tilbilal querubín lu, licꞌun tten cyxicꞌ tibaj lugar jatum tcub cax ex cyibaj ke tzeꞌ tcub te tal. 8 Pero ke tzeꞌ tcub te tal matij cywaꞌl ke, cyjaꞌtzun kꞌanchaꞌl ke cytxaꞌn max tuj Lugar Xjan tcub twitz ju Lugar Mas Xjanxix, masque miꞌn kꞌanchaꞌl ke max ttxaꞌn peꞌn; ex cyjaꞌxtzun cyten jaꞌlo. 9 Tuj cax lu, oꞌcx keju cabe tzꞌlom abj at, akeju e cuꞌx tkꞌoꞌn Moisés tuj tej cyten aj Israel tuj lugar Horeb; akeju cabe tzꞌlom abj lu, atzun tzꞌiban ju yol cywitz, aju cyaj bant tiꞌj tuꞌn Kman cyucꞌil aj Israel tej cyetz tuj Ejipt.10 Tej cyetz ke pal tuj Lugar Xjan, cub ten txkan muj tuj tja Dios. 11 Ex tuꞌn tlaj muj lu, mintiꞌ e cyaj ten ke pal tuꞌn cyajben tuj tja Dios, porque otok noj tuj tja Kman tuꞌn t-spicꞌumal.
Cub ticꞌsaꞌn Salomón tkꞌijlalil tja Dios tuꞌn tajben
12 Atzunte Salomón tma cyjaꞌ:
Aya Nman Dios, o tmaya ka atzun tuꞌn ttena tuj txkan kꞌek muj.
13 Pero ma jaw nbinchaꞌne jun tjaya tbanilxix tuꞌn ttena tuj, ex atzun tuꞌn ttena tuj te jumajx.
14 Ajtzun meltzꞌaj twitz rey cyucꞌil cycyakil xjal aj Israel akeju waꞌlkeꞌtok, ex xi tkanin te Dios tuꞌn cycub cyꞌiwlaꞌn, 15 ex chi cyjaꞌ: Nimanxwit tbi Kman aju Cydios aj Israel, porque ma japun tyol aju tzaj ttziyan te David aju ktzan nmane, tej ttzaj tmaꞌn cyjaꞌ: 16 Atxix tej cyetz wiꞌne ke aj Israel tuj Ejipt, akeju etzan wuꞌne, mi jun tnam otok jaw nscꞌoꞌne cyxol cycyakil cꞌloj cyiyjil aj Israel tuꞌn tjaw binchet jun njaye jatum tuꞌn ttzaj naꞌn nbiye tuj, pero a David jaw nscꞌoꞌne tuꞌn tcawin cyibaj ke xjal aj Israel, akeju etzan wuꞌne, chi Dios. 17 A ktzan nmane David o tajbe tuꞌn tjaw tbinchaꞌn jun ja te nimbil tbi Kman aju Cydios aj Israel. 18 Atzunte Kman tzaj tmaꞌn te: Aju t-ximbetza tuꞌn tjaw tbinchaꞌna jun njaye, baꞌn jlu; 19 pero mya aya cjawil binchante; aju tcyꞌajala tzul itzꞌj, atzunju cjawil binchante njaye, chi Dios.
20 Ex matzun japun tyol Kman aju tzaj ttziyan, ic tzaꞌnx o tma. Ma chin oque te rey te t-xel David aju ktzan nmane, in chin cawine cyibaj aj Israel, ex ma jaw nbinchaꞌne tja Kman aju Cydios aj Israel, tuꞌn tajben te nimbil tbi. 21 Ax icx ma tzꞌel npaꞌne jun lugar tuj ja lu jatum tuꞌn tten cax cꞌubl tley Dios, aju cyaj bant tiꞌj tuꞌn cyucꞌil kxeꞌchel atxix tej cyetz tiꞌn tuj Ejipt, chi Salomón.
22 Cubtzun ten Salomón twitz altar te Kman, ex cywitz cycyakil xjal aj Israel jaw tkꞌoꞌn tkꞌab twitz cyaꞌj, 23 ex tma: Aya Kman aju Cydios aj Israel: Mintiꞌ juntl Dios at tuj cyaꞌj ex mi twitz txꞌotxꞌ jacu pon ic tzaꞌn teya, in japun tyola aju in tzaj ttziyana, ex in tzaj tkꞌoꞌna t-xtalbila cye ke xjal in che ajben teya tuꞌn tcyakil cycꞌuꞌj; 24 porque ma japun tuꞌna aju tzaj ttziyana te tmajena David aju ktzan nmane, aya o kꞌmante ju yol lu, ex tuꞌnxa ma binchet ic tzaꞌn ma bant tuj kꞌij lu. 25 Cyjaꞌtzun Nman, aya Cydios aj Israel, ax icx baꞌn tuꞌn tjapun tuꞌna aju tzaj ttziyana te tmajena David aju ktzan nmane, chitzuna te: Ke tiyjila cucx che oquel te rey tuꞌn cycawin cyibaj aj Israel ka ma che bet tuj tumelxix nwitze, ic tzaꞌn teya ma beta baꞌn, chiya te. 26 Cyjaꞌtzun, aya Cydios aj Israel, japunx tuꞌna aju yol tzaj ttziyana te ktzan nmane David, aju ajbel teya.
27 ¿Axpelo toc jacu najan Dios twitz txꞌotxꞌ? Ic tzaꞌn ju cyaꞌj maꞌxix wen ex mintiꞌ in canun tuꞌn tten Dios tuj, pyortzun teju ja lu, aju ma jaw nbinchaꞌne, mlaylo canun tuꞌn tten Dios tuj. 28 Cyjaꞌtzun Nman Dios, tzakꞌwentza aju ncubsbile ex aju nkanbetze, akine tmajena, ex bintza tkꞌajkꞌajel nwiꞌye ex ke nyole in xi nmaꞌne teya jaꞌlo. 29 Cucx queꞌyintza aju ja lu kꞌijl ex konicꞌan, aju o tmaya ax tuꞌn ttena tuj. Bintza ncubsbile aju in xi nkanine teya tuj lugar lu, akine tmajena. 30 Bintza ke nkanbetze ex ke cykanbetz xjal aj Israel oc ttzaj knaꞌne tbiya tuj lugar lu. Bintza max tuj cyaꞌj jatum najliya, ex najsama kile.
31 Ka at jun xjal ma tbincha jun mya baꞌn tiꞌj tucꞌil, ex ka ma tzꞌoc lajwersin tuꞌn t-xi tmaꞌn jun yol ax toc twitz t-altara tuj tjaya lu, 32 bintza max tuj cyaꞌj ex binchanxa cyiꞌj ke tmajena. Kꞌoncuya t-sentens ju xjal at til tuꞌnju tbinchben mya baꞌn, ex atzunju xjal mintiꞌ til, binchanxa tiꞌj tuꞌn tclet tuꞌnju mintiꞌ til.
33 Ka ma cub cyiꞌj aj Israel akeju etzan tuꞌna, cyuꞌn ke aj kꞌoj cyiꞌj, tuꞌnju otok che binchan il twitza, ex ka ma tzꞌajtz tiꞌj cyanmi, ex ka ma jaw cynimsaꞌn tbiya, ex ka ma che cubsaꞌn twitza tuj ju ja lu, 34 che tbintza ke max tuj cyaꞌj ex najsancuya cyil, ex binchama tuꞌn cyul meltzꞌaj juntl maj tuj tnam aju xi tkꞌoꞌna cye ke cyxeꞌchel.
35 Ka ma tzaj jun nintz coresma, ex ka mintiꞌ ma tzaj jbal tuꞌnju otok che binchan xjal il twitza, ex ka ma che oc ten cubsal twitza tuj lugar lu, ex ka ma jaw cynimsaꞌn tbiya, ex ka ma tzꞌajtz tiꞌj cyanmi tuꞌn tlaj cycastiw otok tzaj tuꞌna, 36 che tbintza max tuj cyaꞌj ex najsama cyil ke tmajena, akeju xjal aj Israel etzan tuꞌna, ex yecꞌunxa aju be baꞌn cye tuꞌntzun cybet tuj. Bixtzun tzaj tkꞌoꞌna jbal tibaj txꞌotxꞌ aju xi tkꞌoꞌna te cyetzbil ke xjal etzan tuꞌna.
37 Ka ma tzaj weꞌyaj ex ka txꞌuꞌj yabil tuj tnam lu, ex ka ma che tzkij ke awal tuꞌn taꞌw cyak, ex ka ma naj awal tuꞌn soj ex ka cyuꞌn ẍplon; ex ka ma baj cytxolban cyib aj kꞌoj tiꞌj ktanmiye tuꞌn cyoc tzokpaj kiꞌje, ex ka ma tzaj nok alcyex juntl tiꞌxti mya baꞌn, ex ka yabil, 38 bix tzaj tbiꞌna tcyakil ju kcubsbile teya ex kkanbetze, nok tuꞌn alcyex jun keye, ex ka cyuꞌn cycyakil aj Israel akeju etzan tuꞌna, oc cyqueꞌyinte aju mya baꞌn oc ttzaj cyiꞌj ex ka cꞌixcꞌoj, ex oc tjaw cyiꞌn cykꞌab twitz cyaꞌj tuj ju ja lu, 39 bix che tzaj tbiꞌna max tuj cyaꞌj tuj lugar jatum najliya, bix cub tnajsana cyil, ex bix tbinchaya cyiꞌj nok alcye baꞌn tuj twitza, ic tzaꞌnx tbinchben teyle junjun, porque oꞌcx aya ojtzkilte cyximbetz ex cyanmi xjal. 40 Cyjaꞌtzun oc che nimal teya acux najl ke tzalu twitz txꞌotxꞌ tzaj tkꞌoꞌna cye ke kxeꞌchele.
41 Ax icx ke stranjer xjal, akeju mya ax e itzꞌj cyxol ke xjal etzan tuꞌna, ka ma che tzaj tuj juntl tnam najchak oc tbinjtz tkanila cyuꞌn, 42 oc cyul naꞌl tbiya tuj ja lu nok tuꞌnju cbinjtzel ju tbiya maꞌxix t-xilen ex ju tipumala nimxix, 43 bix che tzaj tbiꞌna max tuj cyaꞌj max tuj lugar jatum najliya, ex bix tzaj tkꞌoꞌna tcyakil aju cxel cykanin teya, tuꞌntzun tel cynicꞌ tiꞌja cycyakil ke nasyon twitz txꞌotxꞌ, ex tuꞌn tnimanjtza cyuꞌn ic tzaꞌn in nimanjtza cyuꞌn aj Israel akeju etzan tuꞌna, ex tuꞌn tel cynicꞌ tiꞌj ka in naꞌnjtz tbiya tuj ja lu aju ma jaw nbinchaꞌne.
44 Oc cyex ke xjal kꞌojlel, akeju etzan tuꞌna, tuꞌn cykꞌojin cyiꞌj ke aj kꞌoj cyiꞌj nok jatum che xel t-samaꞌna, ex ka ma tzaj cynaꞌn tbiya tumlal ju tnam aju ma jaw t-scꞌoꞌna ex tumlal ju ja ma jaw nbinchaꞌne te nimbil teya, 45 bix tzaj tbiꞌna max tuj cyaꞌj, aju cynaꞌj Dios ex ju cycubsbil, ex bix txi tbinchaꞌna cyiꞌj.
46 Ex ka ma che binchan il twitza, porque mi aꞌl jun xjal mintiꞌ in binchan il, ex ka ma tzaj tkꞌoja cyiꞌj, ex ka ma cheꞌx tkꞌoꞌna tuj cykꞌab ke aj kꞌoj cyiꞌj tuꞌn cyxi kꞌiꞌn pres, ex ka ma cheꞌx tzyuꞌn tuꞌn cypon tuj cytanmi ke aj kꞌoj, ka najchak ma che pon kꞌiꞌn ex ka nikayin, 47 ex ka ma tzꞌajtz tiꞌj cyanmi jatum otok che pon kꞌiꞌn, ex ka ma che oc ten cubsal cywitz teya, ex ka ma tzꞌel cynicꞌ tiꞌj ka otok che binchan il ex otok che binchan mya baꞌn, 48 ex ka ma che ajtz meltzꞌaj tucꞌila tuꞌn tcyakil cyanmi ex tuꞌn tcyakil cycꞌuꞌj tuj cytanmi ke aj kꞌoj cyiꞌj, jatum otok che pon kꞌiꞌn, ex ka ma che cubsan twitza tumlal ju txꞌotxꞌ lu aju xi tkꞌoꞌna cye cyxeꞌchel, ex tumlal ju tnam aju ma jaw t-scꞌoꞌna, ex tumlal ju ja ma jaw nbinchaꞌne te nimbil teya, 49 bix tzaj tbiꞌna max tuj cyaꞌj tuj lugar jatum najliya aju cynaꞌj Dios ex ju cykanbetz, ex bix txi tbinchana cyiꞌj, 50 bix cub tnajsana cyil ke xjal etzan tuꞌna, aju otok cybincha twitza, tuꞌnju miban che niman. Bix yolina tuj cyanmi ke aj kꞌoj tuꞌn ttzaj kꞌakꞌan cycꞌuꞌj cyiꞌj aj Israel, akeju otok cheꞌx kꞌiꞌn pres. 51 Porque ke xjal lu etzan ke tuꞌna ex tuj tcwenta ateꞌ; aya etz kꞌinte cye tuj Ejipt jatum in che yajlanjtztok wen, mer ic tzaꞌn tuj jun jorni jatum nnoꞌcx kꞌot cꞌuxbil tuꞌn tcub ulj.
52 Nman Dios, bintza ncubsbile aju ma txi nkanine teya, akine tmajena, ex bintza cykanbetz ke xjal etzan tuꞌna. Aya Dios, ko tbintza oc tjaw tkꞌajkꞌajel kwiꞌye. 53 Porque aya Nman Dios el tpaꞌna ke xjal lu tuꞌn cyoc te jun tnam etzan tuꞌna cyxol cycyakil tnam twitz txꞌotxꞌ; ic tzaꞌn o tmaya te Moisés aju ajbel teya, tej cyetz tiꞌna ke kxeꞌchele tuj Ejipt, chi Salomón.
54 Tej in naꞌntok Salomón Dios, ẍmejl tten twitz altar ex cyjaw ke tkꞌab twitz cyaꞌj. Tejtzun tbaj twi tnaꞌj Dios ex ju tkanbetz te Kman, 55 jawtzun weꞌ ex e cub tcyꞌiwlaꞌn cycyakil xjal aj Israel, jaw tkꞌajkꞌajel twiꞌ cyuw ex tma: 56 Nimanxwit tbi Kman tuꞌnju ma che ten aj Israel tuj txubtxaj tuꞌn, akeju etzan tuꞌn, ic tzaꞌnx tcyakil tzaj ttziyan; tcyakil tyol ma japun aju tzaj ttziyan cye aj Israel, aju tzaj tmaꞌn te Moisés aju tmajen.
57 Atzun jaꞌlo, awt Kman aju Kdios ten kucꞌil ic tzaꞌn o ten cyucꞌil ke kxeꞌchel. Miwt ko cyaj tcolin, ex miwt ko cyaj tkꞌoꞌn; 58 nok oꞌcx tuꞌn ttzaj tkꞌoꞌn kgan tuꞌn kajben te, cucx tuꞌn kbinchante aju tajbil ex tuꞌn cyjapun ke tmandamyent kuꞌn, ex ke tley ex ke t-xnakꞌtzbil, akeju e tzaj tmaꞌn cye kxeꞌchel tuꞌn tjapun cyuꞌn. 59 Aju nkanbetze ma txi nkanine te Kman, cucxwit tzaj tnaꞌn kꞌijl ex konicꞌan, tuꞌn tcolin wiꞌje tuj tcyakil mya baꞌn, ax icx cyiꞌj aj Israel akeju etzan tuꞌn, tuꞌn tjapun tuꞌn nok alcye il tiꞌj tuj junjun kꞌij, 60 tuꞌntzun tel cynicꞌ cycyakil nasyon twitz txꞌotxꞌ tiꞌj, ka ate Kman ax toc Dios te, ex mintiꞌ juntl. 61 Cyjaꞌtzun oꞌcx cykꞌoꞌnque cycꞌuꞌje axix toc tiꞌj Kman, ex che japunx ke tley cyuꞌne ex ke tmandamyent, ic tzaꞌn in bant jaꞌlo, chi Salomón baj tmaꞌn.
62 Te tibajxi jlu, ate rey cyucꞌix cycyakil aj Israel cub cypatun alumaj te chojbil te Kman. 63 Xi tkꞌoꞌn Salomón 22 mil wacẍ, tucꞌix jun syent tucꞌ winkin mil ẍneꞌl, te jun chojbil te mojbabl tibil.
Atzun jlu o bant tuꞌn rey cyucꞌix cycyakil aj Israel tej ticꞌset tkꞌijlal tja Kman. 64 Ax kꞌij lu baj t-xjansaꞌn rey aju tmij ttxaꞌn peꞌn, aju tcub twitz tja Kman, ex atzun e cub tpatun ke alumaj ex ke oyaj twitz awal, ex ju cysebyil ke alumaj otok che cub byoꞌn te chojbil te mojbabl tibil, porque mya matij aju altar kꞌan cꞌuxbil ttxꞌotxꞌil aju tcub nikayin twitz tja Kman, ex mintiꞌ canun tuꞌn cycub patit ke alumaj tibaj, ex ke oyaj twitz awal ex ju cysebyil ke alumaj otok che cub byoꞌn te chojbil te mojbabl tibil.
65 Tuj tkꞌijlalil lu, ate Salomón cyucꞌix cycyakil aj Israel, cub cyicꞌsaꞌn ju ninkꞌij cykꞌijlalil ke tal ja t-xak tzeꞌyin cywiꞌ, te nimbil te Kman, ax icx juntl ninkꞌij te wuk kꞌij; tuꞌn tcyakil jlu japun cyajlaj kꞌij icꞌsbil kꞌij, ex cycyakil xjal e ul baj, tzaꞌnx ke xjal xiꞌyni tuj tumlal tbankꞌab kꞌij jatum ponin baj cytxꞌotxꞌ aj Israel tiꞌj tnam Hamat, ax icx ke xjal xiꞌyni tuj tumlal tnayaj kꞌij, max ponin baj tiꞌj nima te Ejipt. 66 Tuj juntl kꞌij baj tkꞌolben tib Salomón cyucꞌil xjal, ax icx cye xjal xi cykꞌoꞌn chjonte te rey, ex e aj cyja in che tzalaj wen tuꞌn tcyakilju baꞌn otok tbincha Kman te David, aju ajbel te, ex cye cycyakil aj Israel akeju etzan tuꞌn.