3 Ajtztzun meltzꞌaj twitz rey cyucꞌil cycyakil xjal aj Israel, akeju waꞌlkeꞌtok, e cub tcyꞌiwlaꞌn, 4 ex tma: Nimanxwit tbi Kman aju Cydios aj Israel, porque ma japun aju tyol tzaj ttziyan te David aju ktzan nmane, tej tzaj tmaꞌn te cyjaꞌ: 5 Atxix tuj kꞌij tej cyetz wiꞌne ke aj Israel tuj Ejipt, akeju etzan wuꞌne, misicyer jun tnam otok jaw nscꞌoꞌne cyxol cycyakil cꞌloj cyiyjil aj Israel tuꞌn tjaw binchet jun njaye jatum tuꞌn ttzaj naꞌn nbiye tuj, ex mi jun xinak naꞌnxtok tjaw nscꞌoꞌne tuꞌn toc te nejenel cye tnam xjal aj Israel aju tnam etzan wuꞌne; 6 atzun jaꞌlo ma jaw nscꞌoꞌne tnam Jerusalén tuꞌn ttzaj naꞌn nbiye tuj, ex ma jaw nscꞌoꞌne David tuꞌn tcawin cyibaj aj Israel akeju etzan wuꞌne, chi Kman. 7 O tajbe David aju ktzan nmane tuꞌn tjaw tbinchaꞌn jun ja te nimbil tbi Kman aju Cydios aj Israel, 8 pero tzaj tmaꞌn Kman te cyjaꞌ: Aju t-ximbetza tuꞌn tjaw tbinchaꞌna jun njaye baꞌn jlu, 9 pero mya aya cjawil binchante; aju tcyꞌajala tzul itzꞌj, atzunju cjawil binchante jun njaye, chi Kman.

10 Ex matzun japun tyol Kman aju tzaj ttziyan. Ma chin oque te rey te t-xel David aju ktzan nmane, tuꞌn ncawine cyibaj aj Israel ic tzaꞌnx o tma, ex ma jaw nbinchaꞌne jun ja te nimbil tbi Kman aju Cydios aj Israel. 11 Ax icx ma tzꞌocx nkꞌoꞌne tuj ja lu aju cax jatum cꞌuꞌn tyol Kman cyaj bant tiꞌj tuꞌn cyucꞌil aj Israel.

12 Ex cub ten Salomón twitz altar te Kman, cywitz cycyakil xjal aj Israel, ex xi tnukpiꞌn tkꞌab. 13 Tjaxtok tibaj jun waꞌlbil binchamaj tuꞌn tiꞌj kꞌan cꞌuxbil, cab var tucꞌ mey tnukbil, ex cab var tucꞌ mey twitz, ex jun var tucꞌ mey twaꞌl, ex otok cub tkꞌoꞌn tuj tmij ttxaꞌn peꞌn twitz tja Dios. Cubtzun ẍmejeꞌ cywitz cycyakil xjal aj Israel, ex jaw tyecꞌun tkꞌab twitz cyaꞌj 14 ex tma: Aya Kman aju Cydios aj Israel: Misicyer juntl Dios tuj cyaꞌj ex mi twitz txꞌotxꞌ jacu pon ic tzaꞌn teya; in japun tyola aju in tzaj ttziyana ex in tzaj tkꞌoꞌna t-xtalbila cye ke xjal in che ajben teya tuꞌn tcyakil cycꞌuꞌj; 15 porque ma japun tuꞌna aju yol tzaj ttziyana te David aju ktzan nmane, tuꞌna tzaj tmaꞌna jlu, ex tuꞌnxa ma binchet, ic tzaꞌn ma bant tuj kꞌij jaꞌlo. 16 Cyjaꞌtzun aya Nman aju Cydios aj Israel, ax icx baꞌn tuꞌn tjapun tuꞌna aju tzaj ttziyana te tmajena David aju ktzan nmane. Chitzuna te: Ax cyxol tiyjila cucx che jawil nscꞌoꞌne ke xjal tuꞌn cyoc te rey cyibaj aj Israel, ka ma che bet tuj tumelxix nwitze ex ka ma japun nleye cyuꞌn, ic tzaꞌn teya ma japun tuꞌna, chitzuna te David. 17 Cyjaꞌtzun, aya Cydios aj Israel, japunx tuꞌna aju tyola tzaj ttziyana te ktzan nmane David aju ajbel teya.

18 Nman Dios, ¿axpelo toc jacu najana twitz txꞌotxꞌ cyucꞌil xjal? Mintiꞌlpe in canun cyaꞌj maꞌxix wen tuꞌn ttena tuj, pyortzunlo te ja lu, aju ma jaw nbinchaꞌne. 19 Cyjaꞌtzun aya Nman Dios, tzakꞌwentza ncubsbile ex nkanbetze; bintza tkꞌajkꞌajel nwiꞌye ex nnaꞌj Diose teya jaꞌlo, akine tmajena. 20 Cucx queꞌyintza ja lu kꞌijl ex konicꞌan, atzunju lugar o tmaya tuꞌn ttena tuj. Bintza nnaꞌj Diose tuj lugar lu, akine tmajena. 21 Bintza nkanbetze ex cykanbetz xjal aj Israel oc ttzaj knaꞌne tbiya tuj lugar lu. Bintza max tuj cyaꞌj tuj lugar jatum najliya, ex najsama kile. 22 Ka at jun xjal ma tbincha jun mya baꞌn tiꞌj tucꞌil, ex ka ma tzꞌoc kꞌoꞌn il tiꞌj tuꞌn t-xi tmaꞌn jun yol axix toc, oc tul twitz t-altara tuj tjaya 23 bintza max tuj cyaꞌj ex binchanxa cyiꞌj ke tmajena, kꞌoncuya t-sentens xjal at til, tuꞌnju otok tbincha mya baꞌn, ex atzunju xjal mintiꞌ til, binchanxa tiꞌj tuꞌn tclet, porque mintiꞌ otok tbincha mya baꞌn.

24 Ka ma cub cyiꞌj aj Israel, akeju etzan tuꞌna, cyuꞌn aj kꞌoj cyiꞌj, tuꞌnju otok che binchan il twitza, ex ka ma tzꞌajtz tiꞌj cyanmi, ka ma jaw cynimsaꞌn tbiya ex ka ma che cubsan twitza tuj ja lu, 25 che tbintza max tuj cyaꞌj, najsancuya cyil ex binchama tuꞌn cyul meltzꞌaj juntl maj tuj txꞌotxꞌ xi tkꞌoꞌna cye ex cye cyxeꞌchel.

26 Ka ma tzaj jun nintz coresma ex mintiꞌ ma tzaj jbal tuꞌn tlaj otok che binchan ke xjal il twitza, ex ka ma che oc ten cubsal twitza tuj lugar lu, ex ka ma jaw cynimsaꞌn tbiya, ex ka ma tzꞌel cypaꞌn cyib tiꞌj cyil tuꞌn tlaj cycastiw otok tzaj tuꞌna, 27 che tbintza max tuj cyaꞌj ex najsama cyil ke tmajena, akeju xjal aj Israel etzan tuꞌna, ex yecꞌunxa aju be baꞌn cye tuꞌntzun cybet tuj. Samantztzuna jbal tibaj txꞌotxꞌ aju xi tkꞌoꞌna te cyetzbil ke xjal etzan tuꞌna.

28 Oc ttzaj weꞌyaj tuj tnam, ex ka txꞌuꞌj yabil, ex ka ma che tzkij ke awal tuꞌn taꞌw cyak, ex ka ma naj awal tuꞌn soj ex ka cyuꞌn ẍplon; ex ka ma baj cytxolban cyib ke aj kꞌoj tiꞌj ktanmiye tuꞌn cyoc tzokpaj tiꞌj, ex ka ma tzaj nok alcyex juntl tiꞌxti mya baꞌn, ex ka yabil, 29-30 bix tzaj tbiꞌna tcyakil cycubsbil ex cykanbetz teya, nok tuꞌn alcyex jun cye ex ka cyuꞌn cycyakil aj Israel, akeju etzan tuꞌna. Oc cyqueꞌyinte aju mya baꞌn ex cꞌixcꞌoj otok tzaj cyiꞌj, ex oc tjaw cyiꞌn cykꞌab twitz cyaꞌj tuꞌn cycubsan twitza, oc ttzaj cyqueꞌyin tumlal ja lu, bix che tzaj tbiꞌna max tuj cyaꞌj tuj lugar jatum najliya, ex najsama cyil ex binchama cyiꞌj nok alcye baꞌn tuj twitza, ic tzaꞌn tbinchben teyle junjun, porque oꞌcx aya ojtzkilte cyximbetz xjal ex cyanmi. 31 Cyjaꞌtzun cjawil nimsaꞌn tbiya cyuꞌn ex cxel nimana cyuꞌn, acux itzꞌx ke twitz txꞌotxꞌ aju tzaj tkꞌoꞌna cye kxeꞌchele.

32 Ax icx ke stranjer xjal, akeju mya ax e itzꞌj cyxol xjal etzan tuꞌna, ka ma che tzaj tuj juntl tnam najchak tuꞌn cyul naꞌl tbiya tuj ja lu, tuꞌnju otok cybi ju tbiya maꞌxix t-xilen ex tipumala nimxix, 33 bix che tzaj tbiꞌna max tuj cyaꞌj, max tuj lugar jatum najliya, ex bix tzaj tkꞌoꞌna tcyakilju cxel cykanin teya, tuꞌntzun tel cynicꞌ cycyakil nasyon twitz txꞌotxꞌ tiꞌja, ex tuꞌntzun tnimanjtza cyuꞌn, ic tzaꞌn in nimanjtza cyuꞌn aj Israel, akeju etzan tuꞌna, ex tuꞌn tel cynicꞌ tiꞌj ka a in tzaj naꞌn tbiya tuj ja lu, aju ma jaw nbinchaꞌne.

34 Oc cyex ke xjal etzan tuꞌna kꞌojlel, tuꞌn cykꞌojin cyiꞌj ke aj kꞌoj cyiꞌj, nok jax jatum che xel t-samaꞌna, ex ka ma tzaj naꞌn tbiya cyuꞌn oc ttzaj cyqueꞌyin tumlal tnam aju ma jaw t-scꞌoꞌna, ex oc ttzaj cyqueꞌyin tumlal ja ma jaw nbinchaꞌne, 35 bix tzaj tbiꞌna max tuj cyaꞌj aju cycubsbil ex cykanbetz, ex bix colina cyiꞌj cywitz aj kꞌoj.

36 Ex ka ma che binchan il twitza, porque mi aꞌl jun xjal mintiꞌwt in binchan il, ex ka ma tzaj tkꞌoja cyiꞌj, ex ka ma cheꞌx tkꞌoꞌna tuj cykꞌab aj kꞌoj cyiꞌj tuꞌn cyxi kꞌiꞌn tuj juntl nasyon, ka najchak ex ka nikayin tuꞌn cypon kꞌiꞌn, 37 pero ka ma tzꞌajtz tiꞌj cyanmi jatum otok che pon kꞌiꞌn, ex ka ma che oc ten cubsal twitza, ex ka ma tzꞌel cynicꞌ tiꞌj ka otok che binchan il ex otok cybincha mya baꞌn, 38 ex ka ma tzꞌajtz tiꞌj cyanmi tuꞌn tcyakil cycꞌuꞌj tuj nasyon jatum otok che pon kꞌiꞌn, ex ka ma che oc ten cubsal twitza in tzaj cyqueꞌyin tumlal txꞌotxꞌ lu aju xi tkꞌoꞌna cye cyxeꞌchel, ex tumlal tnam aju ma jaw t-scꞌona, ex tumlal ja ma jaw nbinchaꞌne teya, 39 max tuj cyaꞌj tuj lugar jatum najliya, bix tzaj tbiꞌna aju cycubsbil ex cykanbetz teya, ex bix colina cyiꞌj cywitz aj kꞌoj, ex najsancuya cyil xjal etzan tuꞌna, akeju otok che binchan il twitza.

40 Jaꞌlo Nman Dios ko tqueꞌyintza ex bintza kcubsbile, aju cxel kmaꞌne teya tuj lugar lu.