4 Te tibajxi jlu, ate rey cyucꞌix cycyakil aj Israel xi cykꞌoꞌn chojbil te Kman. 5 Xi tkꞌoꞌn rey Salomón 22 mil wacẍ tucꞌix jun syent tucꞌil winkin mil ẍneꞌl te chojbil.

Atzun jlu o bant tuꞌn rey cyucꞌix cycyakil aj Israel tej ticꞌset tkꞌijlalil tja Kman.

6 Ke pal ax e cub ten tujx cylugar jatum in che ajben, ax icx ke aj Leví kꞌiꞌn ke chnab cyuꞌn, aju otok cyaj tbinchaꞌn rey David tuꞌn tajben tmoj bitz tej in bitzantok David cyucꞌil, ex aju bitz in tmaꞌn: Aju tcꞌujlalil Kman cucx tten te jumajx. Atzun ke pal in che kꞌajtzaꞌntok chun tajsaꞌn cywitz cywitz aj Leví, ex cycyakil aj Israel waꞌlkeꞌtok.

7 Ax icx baj t-xjansaꞌn Salomón tmij ttxaꞌn peꞌn tcub twitz tja Kman, ex atzun e cub tpatun ke alumaj tucꞌix cysebyil ke alumaj otok che cub byoꞌn te chojbil te mojbabl tibil, porque aju altar kꞌan cꞌuxbil ttxꞌotxꞌil aju otok baj tbinchaꞌn Salomón, mintiꞌ canun tuꞌn cycub patit ke alumaj tibaj ex ke oyaj twitz awal ex ju cysebyil ke alumaj.

8 Tuj tkꞌijlalil lu, ate Salomón cyucꞌix cycyakil aj Israel cub cyicꞌsaꞌn wuk kꞌij ninkꞌij, ex cycyakil xjal e ul baj, tzajx keꞌ jatum taꞌ tmojonil tnam Hamat ex pon baj max ttzi tkꞌab xak tmojonil tnam Ejipt. 9 Tujtzun twajxakin kꞌij cub cyicꞌsaꞌn ju ninkꞌij maꞌxix t-xilen, porque tuj enter wuk kꞌij ninkꞌij otok baj cyicꞌsaꞌn tkꞌijlalil altar, ex tuj juntl wuk kꞌij cub cyicꞌsaꞌn tkꞌijlalil ke tal ja t-xak tzeꞌyin cywiꞌ. 10 Tuj 23 tajlal twukin xjaw xi tmaꞌn rey Salomón cye xjal tuꞌn cyaj cyja, ex cycyakil xjal e aj cyja in che tzalaj wen tuꞌn tcyakilju baꞌn otok tbincha Kman te David, te Salomón ex cye cycyakil aj Israel akeju etzan tuꞌn.

11 Tej tbaj bant tcyakil akꞌuntl tuꞌn Salomón tiꞌj tja Kman, tiꞌj tex tja ex tiꞌj tcyakilju otok cub t-ximan tuꞌn tbinchet, 12 cub tyecꞌun tib Kman twitz Salomón te konicꞌan ex tzaj tmaꞌn te cyjaꞌ: Ma nbiye aju ma tzaj tkanina weye, ex ma jaw nscꞌoꞌne lugar lu tuꞌn tajben te njaye jatum tuꞌn cyxi kꞌot ke chojbil. 13 Cyjaꞌtzun, ka ma tzaj nsamaꞌne coresma, ka ma tzaj nmaꞌne tuꞌn miꞌn ttzaj jbal, ka ma txi nmaꞌne cye ẍplon tuꞌn tbaj naj cyawale tuj cojbil cyuꞌn, ex ka ma tzaj nsamaꞌne txꞌuꞌj yabil cyibaj xjal etzan wuꞌne; 14 pero ka ma cub cymansin cyib ke xjal etzan wuꞌne, akeju toc nbiye cyiꞌj, ka ma che cubsan cywitz weye, ka ma che oc ten jyol weye ex ka ma cyaj cycolin cybinchben mya baꞌn, che tzajeltzun nbiꞌne max tuj cyaꞌj, cbel nnajsaꞌne cyil ex cpol cytxꞌotxꞌ wuꞌne ic tzaꞌn tten nej puro tbanilxix. 15 Textzun jaꞌlo cucx cꞌoquel ncwentine ja lu, ex ctzajel nbiꞌne aju cycubsbile ctzajel cykanine weye tuj lugar lu, 16 porque o jaw nscꞌoꞌne ex o baj nxjansaꞌne ja lu, jatum tuꞌn ttzaj naꞌn nbiye tuj te jumajx. Cucx cꞌoquel ncwentine ja lu, ex cucx tzul nnaꞌne. 17 Atzun jaꞌlo, ka ma beta baꞌn nwitze ic tzaꞌn o tbincha David aju ktzan tmana, ex ka ma japun tuꞌna tcyakilju o txi nmaꞌne teya, ex ka ma che japun ke nleye ex ke nxnakꞌtzbile tuꞌna, 18 akine chin cyuwsalte tcawbila ic tzaꞌn cyaj bant tiꞌj wuꞌne tucꞌil David aju ktzan tmana, tej t-xi nmaꞌne te ka ax cyxol ke tiyjil cucx tuꞌn cyjaw nscꞌoꞌne ke cawil tuꞌn cycawin cyibaj aj Israel. 19 Katzun ma tzꞌel cypaꞌn cyibe wiꞌje, ex ka miꞌn ma che japun ke nleye ex ke nmandamyente cyuꞌne, akeju o cheꞌx nmaꞌne cyeye, ex ka ma che ajbene cye junxitl dios ex ka ma che cꞌulune cywitz, 20 che elex nlajoꞌne tuj txꞌotxꞌ lu aju o txi nkꞌoꞌne cyeye, ex aju ja ma baj nxjansaꞌne cyjel ncoline, ex cꞌoquel te cyxmaybil ex te cytzebl cycyakil nasyon. 21 Masque tbanilxix queꞌyin ja lu jaꞌlo, pero te tibajxi oc cyicꞌ bet cycyakil xjal ttxlaj che jawil labin tiꞌj ex oc cyma: ¿Tikuꞌn ma tbincha Kman icju tiꞌj tnam lu ex tiꞌj ja lu? 22 Ex ctzajel tzakꞌweꞌn cye cyjaꞌ: Tuꞌnju ma tzꞌel cypaꞌn cyib tiꞌj Kman aju Cydios ktzan cyxeꞌchel, aju etz kꞌinte cye tuj Ejipt, ex tuꞌnju ma che oc lpeꞌ cyiꞌj junxitl dios tuꞌn cycꞌulun cywitz ex tuꞌn cyajben cye, tuꞌntzun tlaj tcyakil jlu ma tzaj tkꞌoꞌn Dios jun nintz mya baꞌn cyibaj, che chilo xjal.