2 E octzun tchmoꞌn Salomón ke cytijil xjal aj Israel tuꞌn cyul tuj tnam Jerusalén, cyucꞌix cycyakil ke nejenel cyxol cycyakil cꞌloj cyiyjil, cyucꞌix ke mastl nejenel cye junjun cꞌloj aj Israel at cyxilen cyxolx, tuꞌntzun t-xi kꞌibaj cax cꞌubl tley Dios tuj lugar Sión, aju toc tbi Ttanmi David. 3 Oc cychmon cyib cycyakil aj Israel tucꞌil rey Salomón tuj ninkꞌij maꞌ t-xilen tuj twukin xjaw te abkꞌi. 4 E jeꞌxtzun baj cycyakil ke cytijil xjal aj Israel, ex jaw cyiꞌn aj Leví aju cax cꞌubl tley Dios, 5 ex tzaj cyiꞌn tucꞌix ja xbalun te mojbabl tibil tucꞌil Dios, cyucꞌix cycyakil ke macbil xjansaꞌmaj ateꞌ tuj, tuꞌn tpon cyiꞌn twitz tja Dios, ex ake pal cyucꞌix ke aj Leví e tzaj kꞌinte te. 6 Ate rey Salomón cyucꞌix cycyakil tnam xjal aj Israel otok tzꞌoc cychmon cyib tucꞌil, waꞌl cycub ke twitz cax, ex in cubtok cybyoꞌn ke ẍneꞌl ex ke tor tuꞌn t-xi cykꞌoꞌn te oyaj te Dios, ex mintiꞌ bant cyajlanjtz oyaj lu tuꞌnju nimxix. 7 Te tibajxi jlu ocx cykꞌoꞌn ke pal aju cax cꞌubl tley Dios tuj lugar banimaj te te tuj tja Dios, tuj Lugar Mas Xjanxix; ocx cykꞌoꞌn tjakꞌ cyxicꞌ ke tilbilal querubín. 8 Ke cyilbilal querubín licꞌun cyxicꞌ tibaj lugar jatum tcub cax, tzaꞌnx te cax ax icx ke tzeꞌ tcub te tal, xmuꞌjin cyibaj tuꞌn cyxicꞌ querubín. 9 Pero akeju tzeꞌ tcub te tal, matijxix cywaꞌl, cyjaꞌtzun kꞌanchaꞌl ke ttxaꞌn tzeꞌ max tuj Lugar Xjan, aju tcub twitz Lugar Mas Xjanxix, masque mintiꞌ kꞌanchaꞌl ke max ttxaꞌn peꞌn, ex cyjaꞌxtzun cyten jaꞌlo. 10 Tuj cax lu oꞌcx ke cabe tzꞌlom abj at, akeju e cuꞌx tkꞌoꞌn Moisés tuj lugar Horeb. Akeju cabe tzꞌlom abj lu, atzun tzꞌiban yol cywitz, aju cyaj bant tiꞌj tuꞌn Kman cyucꞌil aj Israel tej cyetz tuj txꞌotxꞌ Ejipt.

11 E bjeꞌtztzun ke pal tuj Lugar Xjan. Cycyakil ke pal ateꞌtok, otok baj cyxjansan cyib, ex mya oꞌcx keju ateꞌ tuj cyturn. 12 Ex cycyakil aj Leví akeju bitzal e pon, atzun ke jlu: Asaf, Hemán ex Jedutún, cyucꞌix ke cycyꞌajal ex ke mastl xjal at cyxilen cyucꞌil, waꞌlkeꞌtok ttxlaj altar tumlal tjawitz kꞌij, toclex cyxbalun sak ex tzꞌumin twitz, ex kꞌiꞌntok ke tal lak cꞌuxbil cyuꞌn, ke quitar ex ke arpa, ex cyucꞌiltzun ke jlu attok jun syent tucꞌ winkin pal in che kꞌajtzaꞌntok chun.

13 Cycyakiltzun junx e oc ten bitzal te kꞌobl chjonte te Kman, ex tuꞌn tjaw cynimsaꞌn tbi tucꞌil tkꞌajkꞌajel cywiꞌ ke chun ex ke lak cꞌuxbil, tucꞌix cykꞌajkꞌajel mastl chnab. In che bitzantok ex in cymaꞌn: Cynimsaꞌnctze tbi Kman, porque baꞌnxix te, ex aju tcꞌujlalil cucx in ten te jumajx, che chi. Tujxtzun or lu, cub ten txkan muj tuj tja Dios, 14 ex tuꞌntzun tlaj muj lu, mintiꞌ bant tuꞌn cycyaj ten ke pal tuꞌn cybinchante cyakꞌun, porque aju tja Kman otok noj tuꞌn t-spicꞌumal Dios.