Ke macbil tuꞌn cyajben twitz tja Dios ex tujxi
4
Ax icx baj tbinchaꞌn Salomón jun altar kꞌan cꞌuxbil ttxꞌotxꞌil te laj var tnukbil, laj var twitz ex jweꞌ var twaꞌl. 2 Ax icx cub tbinchaꞌn jun nintz pil kꞌan cꞌuxbil ttxꞌotxꞌil te tcubil aꞌ, tolin tten tiꞌj ex jweꞌ var tuj. Aju twaꞌl cab var tucꞌil mey, ex te olaj var tcꞌitz. 3 Tjakꞌ ttxaꞌnile ttzi pil toc cabe txol tilbilal wacẍ tiꞌjele, lajchak tilbilal wacẍ tuj mey var ex ax elni ke tiꞌj pil. 4 Aju pil lu tcubtok cyibaj cablaj cyilbilal wacẍ kꞌan cꞌuxbil cytxꞌotxꞌil: Ox cyilbilal wacẍ cyjaꞌ in xi cyqueꞌyin jawni, ox cyjaꞌ in xi cyqueꞌyin cubni, ox cyjaꞌ in xi cyqueꞌyin ocni ex ox cyjaꞌ in xi cyqueꞌyin elni. Akeju cyẍoꞌp tocxtok tjakꞌ pil, ex aju pil tcubsaꞌn cyibaj. 5 Aju tcajonil pil lu te cyaje kꞌab tpimil, aju ttziꞌ ic tten ic tzaꞌn ttziꞌ jun copa ex ic tzaꞌn twiꞌ t-xmacal bech lirio, ex in xi baj wuklaj mil tucꞌil jwe syent galón aꞌ tuj.6 Ax icx baj tbinchaꞌn laj pil kꞌan cꞌuxbil cytxꞌotxꞌil tuꞌn cyajben te txꞌajbil; cub tkꞌoꞌn jweꞌ te jawni ex jweꞌ te cubni. Cyujtzun ke pil lu in baj txꞌjoꞌn cyiꞌj cycyakil alumaj, akeju in cheꞌx kꞌoꞌn te oyaj patun in che cub, atzunju pil matij atzun in ajben tuꞌn tbaj cytxꞌjon cyib ke pal.
7 Ax icx baj tbinchaꞌn laj tcubil candil kꞌan pwak cytxꞌotxꞌil, ic tzaꞌnx kꞌmaꞌmaj tuꞌn Dios, ex e ocxtzun tkꞌoꞌn tuj tja Dios tuj Lugar Xjan. Cub tkꞌoꞌn jweꞌ te jawni ex jweꞌ te cubni. 8 Ax icx baj tbinchaꞌn laj mes ex e ocx tkꞌoꞌn tuj tja Dios; cub tkꞌoꞌn jweꞌ te jawni ex jweꞌ te cubni. Ax icx baj tbinchaꞌn jun syent lak nmak ke, kꞌan pwak cytxꞌotxꞌil.
9 Ax icx baj tbinchaꞌn jun ttxaꞌn peꞌn tuꞌn tajben cye pal, ex ju ttxaꞌn peꞌn matij tuꞌn tajben cye xjal; e oc tkꞌoꞌn ke tlamel ex oc tloꞌtzin kꞌan cꞌuxbil cyiꞌj. 10 Aju pil matij cub tkꞌoꞌn te cubni twitz tja Dios tuj tumlal tjawitz kꞌij.
11 Ax icx baj tbinchaꞌn Hiram ke cꞌil, ke pala ex ke lak matij, ex cyjaꞌtzun tten baj bant tcyakil akꞌuntl tuꞌn tiꞌj tja Dios, aju xi tmaꞌn Rey Salomón te. 12 Ex atzun ke jlu e bant tuꞌn: Cabe tkan adorn, cabe adorn tolin cyiꞌj tuꞌn cyjax ten cywiꞌ ke tkan, cyucꞌix cabe cꞌuxbil xawcꞌin cyoyꞌ tuꞌn cyoc ten cyiꞌjele ke adorn, 13 cyucꞌix cyaje syent cyilbilal carnad ẍokꞌ tuꞌn cyoc ten cyiꞌj ke cꞌuxbil xawcꞌin cyoyꞌ, cabe txol tiꞌj junjun cꞌuxbil xawcꞌin toyꞌ, akeju cyoc cyiꞌj ke adorn tolin cyiꞌj cycub cywiꞌ ke tkan, 14 cyucꞌix laj cykꞌukbil tcubil aꞌ, cyucꞌix laj tcubil aꞌ tuꞌn cycub ten cyibaj ke kꞌukbil lu, 15 tucꞌix pil matij te tcubil aꞌ, cyucꞌix cablaj cyilbilal wacẍ cyocxsaꞌn tjakꞌ, 16 cyucꞌix ke cꞌil, ke pala ex ke cꞌuxbil te jacbil twitz chibj.
Cycyakil ke macbil tbincha Hiram te rey Salomón tuꞌn cyajben tuj tja Kman, kꞌan cꞌuxbil tbanilxix cytxꞌotxꞌil. 17 Atzun e cuꞌx tlacuꞌn ke molt tuj xcab txꞌotxꞌ tuj chkꞌajlaj ttzi nima Jordán, aju tcub t-xol tnam Sucot ex Saretán. 18 Baj tbinchaꞌn Salomón nimxix macbil kꞌan cꞌuxbil, ex tuꞌnju nimxix, mintiꞌ tumel tuꞌn tbaj malet.
19 Ax icx xi tmaꞌn Salomón tuꞌn cybant cycyakil ke macbil tuꞌn cyajben tuj tja Dios, ex atzun ke jlu: Aju altar kꞌan pwak ttxꞌotxꞌil, ke mes jatum in che cub kꞌoꞌn ke pan xjansaꞌmaj, 20 cyucꞌix ke cycubil candil kꞌan pwak tbanilxix cytxꞌotxꞌil, ex ke candil cyjax cywiꞌ, akeju cycub twitz Lugar Mas Xjanxix, banin cyten tuꞌn cyoc txaket ic tzaꞌnx kꞌmaꞌmaj; 21 cyucꞌix tilbilal bech, cyucꞌix ke candil ex ke tenás, ax icx kꞌan pwak tbanilxix cytxꞌotxꞌil; 22 cyucꞌix ke matzbil cywi mech, ke lak matij, ke pacꞌ ex ke xawcꞌ patbil storac, ax kꞌan pwak tbanilxix cytxꞌotxꞌil. Ax icx ke tpwertil tja Dios kꞌan pwak cytxꞌotxꞌil, tzaꞌnx ke tpwertil ateꞌ tujxi, akeju tpwertil Lugar Mas Xjanxix, ax icx ke tpwertil tja Dios.