Jaw tbinchaꞌn Salomón tja Dios
3
Tzyettzun akꞌuntl tuꞌn Salomón tuj tnam Jerusalén tuꞌn tjaw binchet tja Kman twi witz Moriah, jatum otok cub tyecꞌun tib Kman twitz David aju ktzan tman Salomón, jatum nneꞌltok ttxcꞌomil triw tuꞌn Ornán aju aj Jebusey. Atzun lugar lu otok baj tbinchaꞌn David tuꞌn tjaw binchet tja Dios tuj. 2 Aju akꞌuntl tiꞌj tja Dios tzyet tuj cabe tajlal tcabin xjaw, tej otok bant cyaje abkꞌi ttzyetlen tcawin rey Salomón.3 Akeju t-simyentil tja Dios cub tkꞌoꞌn Salomón, atzun echbin cye jlu: 30 var tnukbil, ex laj var tuj t-ẍcyin. 4 Aju tnukbil tal cwart tcub ttzi tja Dios laj var, ic tzaꞌn tuj t-ẍcyin tja Dios, ex aju twaꞌl ax laj var. Ex baj tloꞌtzin Salomón tujile tal cwart tuꞌn kꞌan pwak tbanilxix, 5 ex tujile ja matij oc tkꞌoꞌn tzꞌlom wiꞌten, ex cyiꞌj ke tzꞌlom lu oc tloꞌtzin kꞌan pwak tbanilxix ex oc tkꞌoꞌn tilbilal tkan xaꞌj ex tilbilal caden cyiꞌj, 6 ex oc tloꞌtzin ke tal abj tbanilxix tujile tja Dios. Ex aju kꞌan pwak ajben tuꞌn, tbanilxix wen, tzajni tuj lugar Parvaim. 7 Ex baj tloꞌtzin tcyakil tujile tja Dios tuꞌn kꞌan pwak, baj tloꞌtzin cyiꞌj ke viga, cyiꞌj ke tkul tlamel, cywitz tcajonil ja te tujxi ex cyiꞌj ke pwert, ex cꞌochimaj ke cyilbilal querubín cywitz tcajonil te tujxi.
8 Ax icx jaw tbinchaꞌn Salomón aju Lugar Mas Xjanxix. Aju tnukbil laj var, ic tzaꞌnx tuj t-ẍcyin tja Dios, ex laj var tuj t-ẍcyin. Ex oc tloꞌtzin kꞌan pwak tbanilxix twitz tcajonil te tujxi, ex chꞌixmi xi tiꞌn cyaje syent tucꞌil 60 quintal kꞌan pwak. 9 Aju cyalil ke clav kꞌan pwak ttxꞌotxꞌil, balo jun libr tucꞌil cyaje ons cyalil. Ax icx oc tloꞌtzin kꞌan pwak cyujile ke tal cwart te tcabin col.
10 Ex xi tmaꞌn Salomón tuꞌn cybaj binchaꞌn cabe tilbilal querubín tuj Lugar Mas Xjanxix, ex oc loꞌtzin kꞌan pwak cyiꞌjele. 11 Aju tkan cyxicꞌ cycabil tilbilal querubín laj var, porque junjun cyxicꞌ cab var tucꞌil mey tkan. Jun t-xicꞌ jun in pon tacl twitz ja, atzun juntl t-xicꞌ in pon mojeꞌ tucꞌil t-xicꞌ juntl. 12 Ax icx te juntl querubín, jun t-xicꞌ te cab var tucꞌil mey tkan in pon tacl twitz ja tiꞌj juntl pacꞌ, ex atzun juntl t-xicꞌ in pon mojeꞌ tucꞌil t-xicꞌ juntl querubín. 13 Akeju tilbilal querubín lu licꞌun tten cyxicꞌ, laj var tkan cyxicꞌ tuꞌn cycabil. Ake jlu waꞌl cyten, ex aju cywitz cyjaꞌ ntzaj cyqueꞌyin tuj Lugar Xjan. 14 Ax icx baj tbinchaꞌn jun xbalun te makbil cyxol Lugar Mas Xjanxix ex Lugar Xjan. Aju xbalun lu binchamaj tiꞌj nokꞌ ẍjulun queꞌyin, ẍkꞌilin queꞌyin, cyakyin queꞌyin ex tiꞌj lino, ex twitz xbalun lu banimaj ke cyilbilal querubín.
Ke cabe tkan adorn
15 Baj tbinchaꞌn Salomón cabe tkan adorn te wuklaj var tucꞌil mey twaꞌl junjun, ex e cub tkꞌoꞌn twitz tja Dios. Ke adorn e cub tkꞌoꞌn tuj cywiꞌ ke tkan, cab var tucꞌil mey cywaꞌl. 16 Ax icx baj tbinchaꞌn ke caden ic tzaꞌn uwj, ex e oc tkꞌoꞌn cyiꞌjele ke adorn; ax icx baj tbinchaꞌn jun syent tilbilal carnad ẍokꞌ, ex e oc tkꞌoꞌn cyiꞌj ke caden. 17 E cub tkꞌoꞌn ke tkan adorn lu twitz tja Dios, jun cub tkꞌoꞌn tuj tbankꞌab ex jun cub tkꞌoꞌn tuj tnayaj. Aju tkan adorn cub tkꞌoꞌn tuj tbankꞌab, oc tkꞌoꞌn tbi Jaquín, ex atzunju cub ten tuj tnayaj, oc tkꞌoꞌn tbi Boaz.