Jaw tbinchaꞌn Salomón tja Dios
6
Tej otok bant cyaje syent tucꞌil 80 abkꞌi cyetzlen aj Israel tuj Ejipt, ex tuj tcyajin abkꞌi ttzyetlen tcawin Salomón cyxol aj Israel, tuj xjaw Zif tbi, aju tcabin xjaw te abkꞌi, tzyet akꞌuntl tuꞌn Salomón tuꞌn tjaw binchet tja Dios. 2 Aju tja Dios jaw tbinchaꞌn rey Salomón, 30 var tnukbil, ex laj var tuj t-ẍcyin, ex olaj var twaꞌl. 3 Aju tnukbil twitz tja Dios laj var ic tzaꞌnxju tuj t-ẍcyin, ex jweꞌ var twitz. 4 E cyaj tkꞌoꞌn Salomón ke tventanil tja Dios xawcꞌin cyoyꞌ. 5 Ex tiꞌjx cyoxil pacꞌ tcajonil tja Dios e baj tbinchaꞌn ke tal cwart; tzaꞌnx tiꞌjele cwart matij, ax icx tiꞌjele cwart Mas Xjanxix. 6 Aju tnejel col ja te cab var tucꞌ mey tuj, atzun tcabin col ja te ox var tuj; ex aju toxin col ja, ox var tucꞌ mey tuj; ex tuꞌn jlu oc najyin tpimil tcajonil tja Dios, tuꞌntzun mi cyocx ten ke tkul ja tiꞌj tcajonil tja Dios. 7 Tej tbinchet tja Dios e ajben ke abj otok che baj xpeꞌlin wen, cyjaꞌtzun, tej tbant ju ja misicyer martiy o kꞌajt, ex mi achwel, ex mi juntl macbil cꞌuxbil. 8 Aju ttziꞌ tal cwart tuj tnejel col atzun taꞌ tuj tumlal tnayaj kꞌij, ex at jun be colocol ex sutpiꞌn tjaw, tuꞌn cyjapun xjal tuj tcabin ex tuj toxin col ja.9 Tejtzun tbant tja Dios tuꞌn Salomón, tcyakil tzeꞌ jax twi ja puro wiꞌten. 10 Ex e jaw tbinchaꞌn ke cwart tiꞌjele tja Dios, ex teyle junjun col ja te cab var tucꞌ mey twaꞌl, ex aju cykul tal ja e jax kꞌoꞌn, puro wiꞌten ke ex nok e pon taqueꞌ tiꞌj tcajonil tja Dios. 11 Tzajtzun yolin Kman tucꞌil Salomón ex tma cyjaꞌ: 12 Tiꞌj ju ja lu aju niban tbant tuꞌna, waje tuꞌn t-xi nmaꞌne jun nyole teya: Ka ma beta ic tzaꞌnx in tmaꞌn nleye ex nxnakꞌtzbile, ex ka ma che japun nmandamyente tuꞌna, ex ka ma tbinchaya ic tzaꞌnx in cymaꞌn, cjapuneltzun wuꞌne aju yol xi ntziyane tiꞌja te David aju ktzan tmana; 13 ex ax chin tele cyxol aj Israel, ex mlay che cyaj ncoline ke xjal etzan wuꞌne, chi Dios.
14 Cyjaꞌtzun tten japun baj tcyakil akꞌuntl tiꞌj tja Dios tuꞌn Salomón. 15 Oc tkꞌoꞌn ke tzꞌlom wiꞌten twitzile ja te tujxi, xi keꞌ twitz txꞌotxꞌ ex japun baj tjakꞌ cꞌaꞌs, ex cub tkꞌoꞌn tzꞌlom tzaj twitz txꞌotxꞌ tuj ja. 16 Ax icx baj tbinchaꞌn jun cwart max t-xeꞌpun tja Dios te laj var tnukbil, ex oc tkꞌoꞌn tbi ju cwart lu Lugar Mas Xjanxix, ex baj tkꞌoꞌn tzꞌlom tujile, xiꞌx keꞌ twitz txꞌotxꞌ ex japun baj tjakꞌ cꞌaꞌs. 17 Aju tnejel cwart te tja Dios tcub twitz ju Lugar Mas Xjanxix, ex winkin var tnukbil. 18 Twitzile ja te tujxi oc tkꞌoꞌn tzꞌlom wiꞌten cyoc cyilbilal bech twitz, tucꞌix tilbilal twitz tzeꞌ tbanilxix queꞌyin. Tcyakil jlu puro wiꞌten, misicyer jun abj o cyaj ten kꞌanchaꞌl. 19 Baj tbinchaꞌn Salomón ju Lugar Mas Xjanxix tuj tja Dios tuꞌn tocx cꞌuꞌn cax cꞌubl tley Dios tuj. 20 Aju tnukbil ju Lugar Mas Xjanxix laj var, ex aju tuj t-ẍcyin ax laj var, ax icx ju twaꞌl ax laj var. Ex baj tloꞌtzin tujile cwart lu tuꞌn kꞌan pwak tbanilxix, ax icx aju altar binchamaj tiꞌj tzeꞌ wiꞌten baj tloꞌtzin tiꞌjele tuꞌn kꞌan pwak. 21 Ax icx oc tloꞌtzin kꞌan pwak tbanilxix tujile tja Dios tucꞌix tuj Lugar Mas Xjanxix, ex cyxoltzun ju Lugar Mas Xjanxix tucꞌil ju Lugar Xjan cub tkꞌoꞌn ke caden kꞌan pwak cytxꞌotxꞌil. 22 Tcyakil tuj tja Dios baj tloꞌtzin tuꞌn kꞌan pwak, ax icx ju altar aju tcub twitz ju Lugar Mas Xjanxix.
23 Ex baj tbinchaꞌn Salomón cabe tilbilal querubín, tzeꞌ olivo ke, ex e ocx tkꞌoꞌn tuj Lugar Mas Xjanxix. Teyle junjun jweꞌ var twaꞌl. 24 Aju cyxicꞌ, cab var tucꞌ mey tkan junjun. Ex aju tkan cyxicꞌ tuꞌn cycabil pacꞌ, jweꞌ var. 25 Ke cabe tilbilal querubín lu junx taꞌ echbin cye; ax jweꞌ var tkan t-xicꞌ jun, ax icx juntl, ex junx taꞌ binchben cye. 26 Aju cywaꞌl ax jweꞌ var junjun. 27 E ocxtzun tkꞌoꞌn Salomón tuj Lugar Mas Xjanxix licꞌun cyten ke cyxicꞌ, cyjaꞌtzun, aju t-xicꞌ jun max ponin twitz jun pacꞌ ja, ax icx te juntl, max ponin twitz juntl pacꞌ ja, atzun juntl pacꞌ ttxaꞌn cyxicꞌ tmojban tib tucꞌil te juntl tuj tmij Lugar Mas Xjanxix. 28 Baj tloꞌtzin Salomón kꞌan pwak cyiꞌj ke tilbilal querubín, 29 ax icx twitz tcyakil tcajonil tja Dios te tujxi, tzaꞌnx ju Lugar Xjan, ax icx ju Lugar Mas Xjanxix, e baj tbinchaꞌn ke tilbilal querubín cyucꞌix cyilbilal tkan xaꞌj ex cyilbilal bech. 30 Ax icx cub tloꞌtzin kꞌan pwak cyibaj tzꞌlom akeju cycub twitz txꞌotxꞌ tuj tja Dios, tzaꞌnxix tuj Lugar Xjan ax icx tuj Lugar Mas Xjanxix. 31 Te tlamel ttzi ja teju Lugar Mas Xjanxix, tzꞌlom tzeꞌ olivo oc tkꞌoꞌn, ex ke tmarquil te jweꞌ pacꞌ tten cytxlaj. 32 Cabe piẍ tlamel e oc, tzꞌlom olivo ke, ex e baj tbinchaꞌn ke tilbilal querubín cywitz, cyucꞌix cyilbilal tkan xaꞌj ex cyilbilal bech; ex baj tloꞌtzin kꞌan pwak cyiꞌj cycyakil ke tilbilal lu. 33 Ax icx ajben tzeꞌ olivo te cyaje cytxlaj te tmarquil ttzi ja teju Lugar Xjan. 34 Atzun ke cabe tlamel ja lu tzꞌlom tzaj ke ex te cabe piẍ junjun; in che jaket ex in che lamet. 35 Cywitz ke tlamel ja lu e oc tbinchaꞌn ke tilbilal querubín, cyucꞌix tilbilal tkan xaꞌj ex cyilbilal bech, ex baj tloꞌtzin kꞌan pwak cyiꞌj. 36 Ax icx baj tbinchaꞌn jun muro tiꞌjele ttxaꞌn peꞌn tcub twitz tja Dios; te ox txol abj xpeꞌlimaj ke ex jun txol viga wiꞌten xiꞌ tibaj.
37 Tuj tcyajin abkꞌi toclen Salomón te rey, tuj xjaw Zif tbi, atzun tcub keꞌ t-simyentil tja Kman; 38 ex tujtzun tjunlajin abkꞌi toclen te rey, tuj xjaw Bul tbi, aju twajxakin xjaw te abkꞌi, atzun tbaj bant tcyakil akꞌuntl tiꞌj tja Dios, ic tzaꞌnx otok bant tiꞌj nej. Tuj wuk abkꞌi o bant tja Dios tuꞌn Salomón.