7 Ax icx jaw tbinchaꞌn jun ja jatum tuꞌn tcawin ex tuꞌn tbinchet tiꞌj xtis, ex oc tkꞌoꞌn ke tzꞌlom wiꞌten twitz ja te tujxi, xiꞌx keꞌ twitz txꞌotxꞌ ex japun baj tjakꞌ cꞌaꞌs. 8 Tuj ja jatum najltok Salomón at jun ttxaꞌn peꞌn tcub tiꞌjxi, ex ju binchben te junx taꞌ ic tzaꞌn ke cabe tnejel ja. Ex jaw tbinchaꞌn juntl ja tuꞌn tajben te tmeꞌjel Faraón aju t-xuꞌjil, ex ax binchben te. 9 Cycyakil ke ja lu, tzajx keꞌ cyiꞌj cysimyentil ex japun baj max tuj cywiꞌ ex xiꞌx keꞌ tuj tnejel ttxaꞌn peꞌn ex pon baj max tuj ttxaꞌn peꞌn tcub tiꞌjxi, puro abj tbanilxix, xpeꞌlimaj ex kesimaj ke tuꞌn syer, cycabil pacꞌ cytxlaj ic tzaꞌnx echbin cye banimaj tiꞌj. 10 Ke simyent ax icx puro abj cyuwxix ex nmakxix ke, at junjun abj te jweꞌ var tnukbil, ex at junjuntl te cyaje var. 11 Ax icx ke tcajonil ja puro abj tbanilxix, xpeꞌlimaj cyiꞌj ic tzaꞌnx echbil cye banimaj tiꞌj, ex ke tzeꞌ te cykul ja wiꞌten ke. 12 Ex tiꞌjele tcyakil jlu attok jun muro te ox txol abj, ex jun txol viga wiꞌten xiꞌ tibaj ic tzaꞌnxju toc tiꞌjele tja Dios.

13 Xi tmaꞌn rey Salomón tuꞌn t-xi kꞌibaj Hiram max tuj tnam Tiro, 14 aju tal jun meba xuꞌj tiyjil Neftalí ex tcyꞌajal jun xjal aj Tiro, at tnabl tuꞌn takꞌnan tiꞌj kꞌan cꞌuxbil. Ate Hiram secꞌ tnabl ex list, ex ojtzkiꞌn tuꞌn tcyakil akꞌuntl tiꞌj kꞌan cꞌuxbil; cyjaꞌtzun o pon twitz rey Salomón ex bant tcyakil akꞌuntl tuꞌn. 15 Cub tbinchaꞌn cabe tkan adorn kꞌan cꞌuxbil, te belaj var cywaꞌl ex te kak var cycꞌitz. 16 Ax icx cub tbinchaꞌn cabe adorn puro kꞌan cꞌuxbil tuꞌn cycub ten tuj cywiꞌ ke tkan. Aju cywaꞌl ke adorn lu te cab var tucꞌ mey. 17 Ax icx cub tbinchaꞌn cabe cꞌuxbil xawcꞌin cyoyꞌ, ex xpaltxꞌiꞌn cyten ic tzaꞌn caden, tuꞌntzun cyoc ten cyiꞌj ke adorn otok che cub ten tuj twi tkan; wuk cꞌuxbil xawcꞌin cyoyꞌ te junjun adorn. 18 Ax icx cub tbinchaꞌn cabe txol cyilbilal carnad ẍokꞌ tiꞌj junjun cꞌuxbil xawcꞌin toyꞌ, akeju cyoc te txaybil cye keju adorn cycub tuj cywiꞌ ke tkan. Iclex tbincha cyiꞌj cycabil adorn. 19 Akeju adorn cycubsaꞌn tibaj cywiꞌ ke tkan, akeju cycubsaꞌn twitz tja Dios, te cab var cywaꞌl, ex ic che queꞌyin ic tzaꞌn bech lirio, xwac cyten. 20 Cyiꞌjele junjun adorn cycub twi cykan, cyocsaꞌn cab syent tilbilal carnad ẍokꞌ toc tiꞌjele cꞌuxbil xawcꞌin toyꞌ. 21 E cub tkꞌoꞌn Hiram ke tkan adorn lu twitz tja Dios, ex tejtzun cycub tkꞌoꞌn tuj cylugar, aju tkan adorn tcub tuj tnayaj tja Dios, Jaquín oc tbi, ex aju tkan adorn tcub tuj tbankꞌab tja Dios, Boaz oc tbi. 22 Aju cywiꞌ ke tkan adorn ic che queꞌyin ic tzaꞌn bech lirio, xwac tten. Cyjaꞌtzun baj bant akꞌuntl cyiꞌj ke tkan adorn.

23 Te tibajxi cub tbinchaꞌn Hiram jun nintz pil puro kꞌan cꞌuxbil ttxꞌotxꞌil, te tcubil aꞌ, tolin tiꞌj ex jweꞌ var tuj. Cab var tucꞌ mey twaꞌl, ex te olaj var tcꞌitz. 24 Tjakꞌ ttxaꞌnile pil toc cabe txol tilbilal twitz tzeꞌ tbanilxix queꞌyin, winkin tuj junjun var, junx baj bant tucꞌil pil. 25 Aju pil lu tcubtok tibaj cablaj tilbilal wacẍ kꞌan cꞌuxbil cytxꞌotxꞌil, oxe cyjaꞌ in xi cyqueꞌyin jawni, oxe cyjaꞌ in xi cyqueꞌyin cubni, oxe cyjaꞌ in xi cyqueꞌyin ocni ex oxe cyjaꞌ in xi cyqueꞌyin elni. Ke cyẍoꞌp ateꞌcx tujxi, ex aju pil tcubsaꞌn cyibaj ke tilbilal wacẍ. 26 Aju tcajonil pil lu te cyaje kꞌab tpimil; aju ttziꞌ ic tten ic tzaꞌn twiꞌ t-xmacal bech lirio, ex in xi baj laj mil tucꞌ jweꞌ syent galón aꞌ tuj.

27 Ax icx cub tbinchaꞌn laj cykꞌukbil tcubil aꞌ kꞌan cꞌuxbil cytxꞌotxꞌil, teyle junjun te cab var tnukbil, ax icx twitz, ex jun var tucꞌ mey twaꞌl. 28 Ke cykꞌukbil tcubil aꞌ lu ic tten binchben cye ic tzaꞌn jun cajón, te cyaje pacꞌ cytxlaj cycuꞌxsan tuj cymarquil, 29 ex cyoctok cyilbilal balun tiꞌj tcyajil pacꞌ ttxlaj, ax icx cyilbilal wacẍ ex cyilbilal querubín, ex cyoctok cyilbilal bech cyjakꞌ cyilbilal balun ex cyjakꞌ cyilbilal wacẍ, ax icx cyibaj. 30 Teyle junjun tkꞌukbil tcubil aꞌ attok cyaje t-rweda kꞌan cꞌuxbil cytxꞌotxꞌil, ax icx aju cꞌuxbil jatum nnicꞌ tolj rweda, ax kꞌan cꞌuxbil cytxꞌotxꞌil. Cyuj cycyajil t-scyin tkꞌukbil tcubil aꞌ tjakꞌxi, attok tzuybil te kꞌan cꞌuxbil ttxꞌotxꞌil, ex teyle junjun pacꞌ ttxlaj cyocsaꞌn cyilbilal bech cyiꞌj. 31 Aju ttzi tkꞌukbil tcubil aꞌ tcuꞌx jun toyꞌ tuj tmij, tolin tten mey var t-xeꞌ, ex ox xcꞌachub tuj. Ax icx toctok adorn cyiꞌj cytziꞌyile cykꞌukbil tcubil aꞌ, ex ke cykꞌukbil mya tolin cyiꞌj, nok oꞌcx junx taꞌ echbin cye cynukbil tucꞌil cywitz. 32 Ke cyaje rweda ateꞌtok cyjakꞌ ke tcyajil pacꞌ ttxlaj, ex aju cꞌuxbil jatum in che icꞌ tolj ke rweda, cyiklix cyib tiꞌj tkꞌukbil. Aju twaꞌl junjun rweda te ox xcꞌachub. 33 Ic cyten ic tzaꞌn ke rweda cye carwaj. Ke cꞌuxbil jatum in che icꞌ tolj ke rweda, cyucꞌix ke cꞌuxbil cyoc ke rweda tiꞌj, cyucꞌix ke tal cꞌuxbil cyocx t-xol rweda ex ke cꞌuxbil cyocx tuj cymij rweda, cycyakil ke jlu kꞌan cꞌuxbil ke. 34 Ax icx tcyakil t-scyin tkꞌukbil tcubil aꞌ attok jun tzuybil cye, ex ax elni ke cyiꞌj ke tkꞌukbil tcubil aꞌ. 35 Ex aju ttzi tkꞌukbil tcubil aꞌ, tolin tiꞌj, te jun xcꞌachub twaꞌl; ex aju tcyajil pacꞌ cytxlaj ex tucꞌix ju tzuybil cye, tjawsaꞌn jawni teju tkꞌukbil tcubil aꞌ, ax elni ke tiꞌj. 36 Ocx tkꞌoꞌn Hiram cyilbilal querubín, cyucꞌix cyilbilal balun, cyucꞌix cyilbilal tkan xaꞌj cyiꞌj cycyakil tkꞌukbil tcubil aꞌ lu, ex tcyakil cyiꞌjele e oc tkꞌoꞌn ke adorn. 37 Cyjaꞌtzun tenba tej cybaj bant laj cykꞌukbil tcubil aꞌ, cycyakil junx taꞌ binchben cye ex junx taꞌ echbin cye.

38 Ax icx cub tbinchan laj tcubil aꞌ kꞌan cꞌuxbil cytxꞌotxꞌil. Teyle junjun te cab var tuj, ex in xi baj cab syent galón aꞌ tuj junjun, ex teyle junjun e cub tkꞌoꞌn tuj tkꞌukbil, 39 jweꞌ tkꞌukbil tcubil aꞌ cub tkꞌoꞌn tuj tbankꞌab tja Dios ex jweꞌ tuj tnayaj. Aju pil matij, atzun cub ten tuj tbankꞌab tja Dios tuj tjawitz kꞌij.

40 Ax icx cub tbinchaꞌn Hiram ke palangán, ke pala ex ke lak matij, ex cyjaꞌtzun tten bant tcyakil akꞌuntl tuꞌn Hiram, aju xi tmaꞌn Salomón te, tuꞌn cyajben tuj tja Kman. 41 Cub tbinchaꞌn cabe tkan adorn, cabe adorn tolin cyiꞌj e cub ten tuj cywiꞌ ke tkan, cabe cꞌuxbil xawcꞌin cyoyꞌ tuꞌn cyoc ten cyiꞌj adorn, 42 cyucꞌix cyaje syent cyilbilal carnad ẍokꞌ tuꞌn cyoc ten cyiꞌj ke cꞌuxbil xawcꞌin cyoyꞌ, cabe txol tiꞌj junjun cꞌuxbil xawcꞌin toyꞌ, akeju cyoc cyiꞌj ke adorn tolin cyiꞌj cycub tuj cywiꞌ ke tkan, 43 cyucꞌix laj cykꞌukbil tcubil aꞌ, cyucꞌix laj tcubil aꞌ tuꞌn cycub ten cyuj ke kꞌukbil lu, 44 tucꞌix pil matij te tcubil aꞌ, cyucꞌix cablaj cyilbilal wacẍ cyocxsaꞌn tjakꞌ, 45 cyucꞌix ke palangán, ke pala ex ke lak matij.

Cycyakil ke macbil lu baj tbinchaꞌn Hiram, aju xi tmaꞌn Salomón te tuꞌn cyajben tuj tja Dios, aju cytxꞌotxꞌil kꞌan cꞌuxbil tzꞌumin twitz. 46 Atzun e cuꞌx tlacuꞌn rey ke molde tuj xcab txꞌotxꞌ tuj chkꞌajlaj ttzi nima Jordán, aju tcub t-xol tnam Sucot ex Saretán. 47 Tuꞌnju nimxix macbil puro kꞌan cꞌuxbil e bant, cyjaꞌtzun mintiꞌ baj tmaloꞌn Salomón tcyakil.

48 Ax icx xi tmaꞌn Salomón tuꞌn cybant cycyakil ke macbil tuj tja Kman, ex atzun ke jlu: Aju altar kꞌan pwak ttxꞌotxꞌil, aju mes kꞌan pwak ttxꞌotxꞌil jatum in cub kꞌoꞌn pan xjansaꞌmaj te Kman, 49 cyucꞌix ke candil kꞌan pwak tbanilxix ttxꞌotxꞌil, akeju cycub twitz ju Lugar Mas Xjanxix, jweꞌ tuj bankꞌabaj ex jweꞌ tuj nayaj, cyucꞌix ke cyilbilal bech, cyucꞌix ke candil, cyucꞌix ke tenás kꞌan pwak cytxꞌotxꞌil, 50 cyucꞌix ke cꞌabl, cyucꞌix ke matzbil, cyucꞌix ke lak matij, cyucꞌix ke pacꞌ ex cyucꞌix xawcꞌ te patbil storac, cycyakil ke jlu kꞌan pwak tbanilxix cytxꞌotxꞌil. Ax icx puro kꞌan pwak ke bisagr e oc cyiꞌj ke tlamel Lugar Mas Xjanxix tocx tujxi tja Dios, ax icx ke bisagr e oc cyiꞌj ke tlamel tja Dios.

51 Tejtzun tbaj bant tcyakil ju akꞌuntl tiꞌj tja Kman tuꞌn rey Salomón, xi tiꞌn ke macbil kꞌan pwak ex sak pwak cytxꞌotxꞌil, aju otok txi kꞌoꞌn te Kman tuꞌn David aju ktzan tman, ex e ocx tkꞌoꞌn cyxol ke kꞌinumabl at tuj tja Dios.