3 Ax icx xi t-samaꞌn Salomón ke sanjel tucꞌil Hiram aju rey tuj tnam Tiro ex xi tmaꞌn cyjaꞌ: Binchama wucꞌile ic tzaꞌn o bant tuꞌna tucꞌil ktzan nmane David tej ttzaj t-samaꞌna tzeꞌ wiꞌten tuꞌn tjaw tbinchaꞌn jun tja jatum tuꞌn tten tuj. 4 Bintza, cjawil nbinchaꞌne jun ja te cꞌulbil te Kman aju Ndiose, tuꞌn tajben oꞌcx te ex jatum tuꞌn tcub patit oyaj at tcꞌocꞌjal te nimbil te, ex jatum cucx tuꞌn cycub txolbat ke pan twitz, ex jatum tuꞌn cycub patit ke alumaj te oyaj aju in xi kꞌot prim ex kale, icx aju in xi kꞌot cyuj ke kꞌij te ojlabl ex cyuj ke ninkꞌij oc ttzaj queꞌyin juntl acꞌaj xjaw, ex cyuj ke mastl ninkꞌij akeju cucx in che cub icꞌset cyxol aj Israel te nimbil tbi Kman aju Kdiose. 5 Ex aju tja Dios cjawil nbinchaꞌne matijxix cꞌoquel, porque aju Kdiose mas nim tipumal cywitz cycyakil txkantl dios nnoꞌc cydiosin xjal. 6 Cyjaꞌtzun, ¿alcye jun at tnabl tuꞌn tjaw tbinchaꞌn jun tja Dios, mintiꞌlpe in canun cyaꞌj maꞌxix wen tuꞌn tten Dios tuj? ex ¿alcyetzun kine tuꞌn tjaw nbinchaꞌne jun tja Dios, nok oꞌcx tuꞌn tajben tuꞌn tcub patit storac te nimbil te? 7 Cyjaꞌtzun samantza wucꞌile jun xjal at tnabl tuꞌn takꞌnan tiꞌj kꞌan pwak, tiꞌj sak pwak, tiꞌj kꞌan cꞌuxbil, tiꞌj cꞌuxbil, tiꞌj xbalun tbanilxix, tiꞌj xbalun cyak queꞌyin ex tiꞌj xbalun ẍjulun queꞌyin, ex baꞌn binchan tcyakil txcaj tilbilal tuꞌn tzkab, tuꞌntzun tten cyucꞌil ke xjal at cynabl tuꞌn cybinchante cycyakil txcaj akꞌuntl, akeju ateꞌ wucꞌile tuj Judá ex tuj Jerusalén, akeju e cyaj kꞌoꞌn tuꞌn ktzan nmane David. 8 Ax icx samantza ke tzeꞌ wiꞌten, tzꞌlom tzaj, ex ke tzeꞌ tbanilxix sándalo tbi, akeju ateꞌ twi witz Líbano, porque baꞌn wuꞌne ke tmajena baꞌn che txꞌemin tzeꞌ ma chixin. Ex jacu che onin ke nmajene cyucꞌil ke tmajena, 9 tuꞌntzun tbaj bant nimxix tajlal tzeꞌ cyuꞌn, porque aju tja Dios cjawil nbinchaꞌne, matijxix cꞌoquel ex tbanilxix binchben te. 10 Cxel nkꞌoꞌne 80 mil quintal triw ex 80 mil quintal sebad, jun syent tucꞌil olaj mil galón taꞌl twitz uva ex ax tajlal galón chibj aseyt. Cxel nkꞌoꞌne jlu cye ke tmajena ex cye keju in che icꞌ txꞌeminte tzeꞌ, chi rey Salomón.

11 Atzunte Hiram aju rey tuj tnam Tiro, ajtz t-samaꞌn jun uꞌj tucꞌil Salomón chi cyjaꞌ: Tuꞌn Kman ma tzꞌoc kꞌoꞌna te rey cyibaj aj Israel, tuꞌnju nimxix in tcꞌujlaꞌn Kman ke xjal etzan tuꞌn. 12 Ex in tmaꞌntl tuj uꞌj cyjaꞌ: Nimanxwit tbi Kman aju Cydios aj Israel, aju binchante cyaꞌj ex txꞌotxꞌ, porque ma tzaj tkꞌoꞌn jun tcyꞌajal rey David nimxix tnabl, xnakꞌtzamaj ex baꞌn ximan tiꞌj alcye tuꞌn tbant tuꞌn; atzunte cjawil binchan jun tja Kman ex jun ja jatum tuꞌn tcawin. 13 Cyjaꞌtzun ma txi nsamaꞌne jun xinak tucꞌila, Hiram tbi; ate xjal lu tzꞌakl tnabl ex at-xix t-secꞌal. 14 Aju xinak lu, tal jun xuꞌj tiyjil Dan ex tcyꞌajal jun xjal aj Tiro; nim tnabl tuꞌn takꞌnan tiꞌj kꞌan pwak, tiꞌj sak pwak, tiꞌj kꞌan cꞌuxbil, tiꞌj cꞌuxbil, tiꞌj abj, tiꞌj tzeꞌ, tiꞌj xbalun tbanilxix, tiꞌj xbalun ẍjulun queꞌyin, tiꞌj xbalun lino tbi ex tiꞌj xbalun cyak queꞌyin; ex at tnabl tuꞌn cybant tcyakil txcaj tilbilal tuꞌn tuꞌn tzkab, ex baꞌn binchan tiꞌj tcyakil txcaj tilbilal, nok alcye oc txi kꞌmaꞌn te; ex baꞌn tuꞌn takꞌnan cyucꞌil ke tmajena, akeju baꞌn che binchan tcyakil txcaj akꞌuntl, ex cyucꞌil ke majen ateꞌtok tucꞌil Tat Rey David aju ktzan tmana. 15 Cyjaꞌtzun Tat Rey, samantza triw, sebad, chibj aseyt ex taꞌl twitz uva, aju ma tzaj tmaꞌna tuꞌn tajben keye. 16 Atzun keye che jawil ktxꞌemine ke tzeꞌ twi witz Líbano, aju cꞌajbel teya; cbajel kcꞌaloꞌne ex cxel kiꞌne tibaj mar tuꞌn tpon max ttzi mar tuj tnam Jope; atzun teya jacu txi tiꞌna tuꞌn tpon tuj tnam Jerusalén, chi rey Hiram.

17 Ex jaw tiꞌn Salomón juntl maj cyajlal ke stranjer xjal, akeju najlke tuj cytxꞌotxꞌ aj Israel. Otokxi jaw jun maj cyajlal tuꞌn David aju ktzan tman, ex tejtzun tjaw cyajlal tuꞌn Salomón, japun jun syent tucꞌil 53 mil tucꞌil kak syent cybet. 18 Cyxoltzun ke jlu e oc tkꞌoꞌn 70 mil xinak ikal iktz, 80 mil xinak tuꞌn cyten xpeꞌlil abj cywiꞌ ke witz ex ox mil tucꞌil kak syent caporal cyiꞌj tuꞌn cyakꞌnan.