3 —Baꞌntl tuꞌna, mintiꞌ ten ambil tiꞌj David aju ktzan nmane tuꞌn tjaw tbinchaꞌn jun tja Kman aju Tdios, tuꞌn tlaj kꞌoj oc tuꞌn, ex maxi tweꞌ jlu tejxi cytzaj kꞌoꞌn ke aj kꞌoj tiꞌj tuj tkꞌab tuꞌn Kman. 4 Atzun jaꞌlo tuj tzalajbil atoꞌye tuꞌn Kman aju Ndiose tuj tcyakil lugar. Jaꞌlo mintiꞌ aj kꞌoj kiꞌje ex mintiꞌ jun tiꞌxti mya baꞌn in tzaj kiꞌje. 5 Cyjaꞌtzun ma cub nximane tuꞌn tjaw nbinchaꞌne jun tja Kman aju Ndiose, ic tzaꞌn o tzaj tmaꞌn te David aju ktzan nmane tej tmante cyjaꞌ: Aju tcyꞌajala cꞌoquel te rey te t-xela, atzunju cjawil binchante jun njaye tuꞌn tajben te cꞌulbil weye, chi Dios te. 6 Cyjaꞌtzun kꞌmanxa cye tmajena tuꞌn tjaw cytxꞌemin ke tzeꞌ wiꞌten twi witz Líbano, ex jacu che onin ke nmajene cyucꞌil ke tmajena, ex baꞌn txi nchjoꞌne twi cycꞌuꞌj ke tmajena ic tzaꞌnx ctzajel tkanina weye, porque baꞌntl tuꞌna misicyer jun keye baꞌn xpeꞌlin tzeꞌ ic tzaꞌn ke xjal aj Sidón, chi Salomón.

7 Tejtzun tbinte Hiram tyol Salomón, jaw tzalaj nimxix ex tma:

—Jaꞌlo nimanxwit tbi Kman, tuꞌnju ma tzaj tkꞌoꞌn jun tcyꞌajal David nim tnabl tuꞌn tcawin tibaj ju nintz nasyon lu.

8 Xitzun t-samaꞌn Hiram aju tkanil lu tucꞌil Salomón:

—Ma ncꞌame tkanil tzaj t-samaꞌna, ex cbantel wuꞌne aju ma tzaj tkanina weye tiꞌj tzeꞌ wiꞌten ex tzaj. 9 Ake nmajene che beletz kꞌinte tzeꞌ twi witz Líbano tuꞌn tpon cyiꞌn max ttzi mar, ex junx che bel ncꞌaloꞌne ke tzeꞌ tuꞌntzun cyxi nsamaꞌne tibaj mar, ex tuꞌn cypon alcye lugar ctzajel tmaꞌna, ex atzun che bajel pajut ke tzeꞌ tuꞌn t-xi tiꞌna. Ax icx teya, cuchiwt tuꞌn tjapun tuꞌna tuꞌn ttzaj tkꞌoꞌna wabj ex chibj te cye keju ateꞌ tuj njaye.

10 Xitzun tkꞌoꞌn Hiram te Salomón ke tzeꞌ wiꞌten tucꞌix tzaj, ic tzaꞌnx otok tzaj tkanin. 11 Ax icx te Salomón xi tkꞌoꞌn wabj ex chibj cye keju ateꞌ tuj tja rey Hiram. Tcyakil abkꞌi xi tkꞌoꞌn Salomón 75 mil quintal triw, ex 115 mil galón chibj aseyt tbanilxix. 12 Cyjaꞌtzun tten tzaj kꞌoꞌn tnabl Salomón tuꞌn Kman, ic tzaꞌnx otok tzaj ttziyan. Ex mya nok oꞌcx jlu, ax icx cyaj bant tiꞌj jun cyyol Hiram tucꞌil Salomón, ex tuj tzalajbil e ten.

13 Bant jun ley tuꞌn rey Salomón tuꞌn cyjaw chmet txkan xinak cyxol cycyakil aj Israel tuꞌn cyxiꞌ akꞌnal. Japun cyajlal xjal lu 30 mil xinak. 14 Txolsaꞌn oc cyiꞌj ke xjal tiꞌj akꞌuntl: laj mil xinak tuꞌn cyxi samaꞌn tuj junjun xjaw twi witz Líbano, jun xjaw tuꞌn cyten twi witz Líbano, ex cabe xjaw tuꞌn cyten cyja. Ate Adoniram oc te nejenel cye ke xjal in cheꞌx akꞌnal. 15 Ax icx oc tkꞌoꞌn Salomón 70 mil xjal ikal iktz ex 80 mil xjal xpeꞌlil abj twi witz, 16 ex part ox mil tucꞌil ox syent caporal cyiꞌj ke xjal e akꞌnan tiꞌj akꞌuntl. 17 Xi tmaꞌn rey tuꞌn cyjatz lacut ke abj nmak ex tbanil, tuꞌn cyajben te t-simyentil tja Dios cyucꞌix ke abj tuꞌn tbaj xpeꞌlin cyiꞌj. 18 Ke tmajen Salomón ex ke tmajen Hiram, cyucꞌix ke xjal aj Gebal, baj cybinchaꞌn ke tzeꞌ, ex baj cyxpeꞌlin ke abj tuꞌn tajben tuꞌn tjaw binchet tja Dios.