7 Oc tkꞌoꞌn Salomón cablaj gobernador cyxol cycyakil aj Israel, ex aju cyakꞌun atzun, tuꞌn ttzaj cyiꞌn tcyakilju at tajben te rey ex cye keju ateꞌ tuj tja. Teyle junjun cye il tiꞌj tuꞌn ttzaj tiꞌn tcyakil aju at tajben te rey jun xjaw tuj abkꞌi. 8 Ex atzun ke cablaj gobernador jlu:

Ate Ben-Hur, tuj tcwent taꞌ tiwitz txꞌotxꞌ cye aj Efraín;

9 Atzunte Ben-Decar, tuj tcwent ateꞌ ke tnam lu: Macaz, Saalbim, Bet-semes, Elón ex Bet-hanán;

10 atzunte Ben-Hesed, tuj tcwent taꞌ tnam Arubot, ax icx tnam Soco ex tcyakil txꞌotxꞌ Hefer;

11 atzunte Ben-Abinadab, tuj tcwent taꞌ tcyakil txꞌotxꞌ te tnam Dor, ex aju t-xuꞌjil Ben-Abinadab, Tafat tbi, aju tmeꞌjel Salomón;

12 atzunte Baana aju tcyꞌajal Ahilud, tuj tcwent ateꞌ ke tnam Taanac, Meguido ex tcyakil Bet-seán aju tcub junx tucꞌil Saretán, max tjakꞌxi Jezreel, tzajnix tuj Bet-seán, ponin baj max tuj Abel-mehola max tiꞌjxi Jocmeam;

13 atzunte Ben-Geber, tuj tcwent taꞌ tnam Ramot aju at tuj Galaad, cyucꞌix ke aldey te Galaad, akeju ateꞌtok tuj tcwent Jair aju tcyꞌajal Manasés, ax icx ju txꞌotxꞌ Argob aju attok tuj Basán, jatum ateꞌtok 60 nmak tnam toc muro cyiꞌj, ex ke pasador cyiꞌj cylamel puro kꞌan cꞌuxbil ke;

14 atzunte Ahinadab aju tcyꞌajal Ido, tuj tcwent taꞌ tnam Mahanaim;

15 atzunte Ahimaas, aju jaw mojeꞌ tucꞌil Basemat aju tmeꞌjel Salomón, tuj tcwent taꞌ cytxꞌotxꞌ tiyjil Neftalí;

16 atzunte Baana aju tcyꞌajal Husai, tuj tcwent taꞌ cytxꞌotxꞌ tiyjil Aser ex ju tnam Alot;

17 atzunte Josafat aju tcyꞌajal Parúa, tuj tcwent taꞌ cytxꞌotxꞌ tiyjil Isacar;

18 atzunte Simei aju tcyꞌajal Ela, tuj tcwent taꞌ cytxꞌotxꞌ tiyjil Benjamín;

19 atzunte Geber aju tcyꞌajal Uri, tuj tcwent taꞌ txꞌotxꞌ Galaad aju tetok Sehón ttxꞌotxꞌ, aju rey cye aj Amorrey, ex te Og aju rey te Basán. Tuj tcwent junx gobernador taꞌ tcyakil txꞌotxꞌ lu.

20 Ke aj Judá ex ke aj Israel nimcu cybaj o ten, mer ic tzaꞌn ttxa tzꞌaꞌn ttzi mar. Attok nim cywa ex cycꞌa, ex in che tzalajtok. 21 O cawin Salomón cyibaj cycyakil cawbil tzajx keꞌ ttzi nima Éufrates, ex pon baj max tuj txꞌotxꞌ cye aj Filistey ex max tuj tmojonil Ejipt. Chjet chojenj cyuꞌn ke jlu, ex e cyaj ten tjakꞌ tcawbil Salomón tuj tcyakil tankꞌibl. 22 Tcyakilju in baj tuj tja Salomón teyle junjun kꞌij atzun jlu: 60 quintal arin tbanilxix ex jun syent tucꞌ winkin quintal arin myaxix tbanil, 23 laj wacẍ ulni cynabl, winkin wacẍ cꞌul cywa, ex jun syent ẍneꞌl, ex mintiꞌ e oc te tajlal tcyakil txcaj masat ex ke ecꞌ, 24 porque in cawintok Salomón cyibaj ke rey tuj tcyakil txꞌotxꞌ tuj tumlal telex kꞌij te nima Éufrates, tzajx keꞌ tuj lugar Tifsa ex pon baj max tuj Gaza. O ten tzalajbil cyxol cyucꞌil ke nasyon ateꞌ tiꞌjele.

25 Acux itzꞌxtok Salomón, ke xjal najlke tuj Judá ex ke aj Israel, tzajx keꞌ tuj Dan ex pon baj max tuj Beerseba, e ankꞌin tuj txubtxaj, ex teyle junjun ja xjal at tkan uva ex tkan higo tucꞌil. 26 Ate Salomón attok 40 mil tchej cabay, teyle junjun tocxsaꞌn tuj tex tja, akeju in che ajben jawolte carwaj, ex cablaj mil chej ikal cye soldad. 27 Teyle junjun gobernador in tzaj tiꞌn aju attok tajben te rey Salomón ex te cye keju in che waꞌn tucꞌil; in tzaj cyiꞌn tuj ju xjaw banimaj tiꞌj. Toc tilil cyuꞌn wen tuꞌn tul cyiꞌn tcyakilju at tajben. 28 Ax icx in xi cyiꞌntok sebad tucꞌix ttxa triw te cywa chej cabay ex te cywa ke chej ikal iktz, in xi cyiꞌntok jatum oc txi kꞌmaꞌn cye, teyle junjun in xi tiꞌn oc tpon tkꞌijlalil banimaj tiꞌj.

29 Tzaj tkꞌoꞌn Dios nimxix tnabl Salomón tucꞌix tojtzkibl, ex aju tnabl o ten nimxix, mer ic tzaꞌn ttxa tzꞌaꞌn at ttzi mar. 30 Aju tnabl Salomón icꞌ mastl ic tzaꞌn cye aj Ejipt ex ic tzaꞌn cye xjal najlke tuj tumlal tjawitz kꞌij. 31 Mintiꞌ juntl xinak o ten nim tnabl ic tzaꞌn te: ten mas nim tnabl ic tzaꞌn te Etán, aju tiyjil Ezra, ex ic tzaꞌn te Hemán, Calcol ex Darda, akeju tcyꞌajal Mahor, ex aju tkanil tiꞌj pon baj cyuj cycyakil nasyon ateꞌ tiꞌjele. 32 Cub ttzꞌiban Salomón ox mil tal tkicꞌ yol at tnabl, ex jun mil tucꞌ jweꞌ bitz. 33 Ax icx o tzꞌel tnicꞌ cyiꞌj ke tzeꞌ ex cyiꞌj ke awal, ex xi ttxolbaꞌn jlu cye xjal, tzajx keꞌ cyiꞌj ke tzeꞌ wiꞌten ateꞌ twi witz Líbano, ax icxpe cyiꞌj ke cꞌul in che tzaj chꞌiy cyiꞌj tcajonil ja. Ax icx o tzꞌel tnicꞌ cyiꞌj ke jil, ke jil in che lipan twitz cyaꞌj, ke jil in xi cyjakuꞌn cycꞌuꞌj twitz txꞌotxꞌ ex ke cyiẍ. 34 Cyuj cycyakil nasyon e tzaj xjal tuꞌn cybinte tnabl Salomón, ake jlu samaꞌn e tzaj cyuꞌn cycyakil rey ateꞌ tuj tcyakil twitz txꞌotxꞌ, akeju e binte tkanil tiꞌj tnabl.