3 At-xix tcꞌuꞌj Salomón tiꞌj Kman, ex in che japun tley tuꞌn, ic tzaꞌn cyaj tmaꞌn David te, aju ktzan tman, pero oꞌcx chꞌin, in xi ajtok Salomón kꞌolte chojbil cywiꞌ ke witz, ex in cubtok tpatun storac ma chixin. 4 Ax icx in xi ajtok Salomón kꞌolte chojbil twi witz Gabaón jatum in che cꞌulun xjal, porque aju lugar lu maꞌ toclen cywitz mastl, ex cub tpatun jun mil alumaj te oyaj te Dios tuj lugar lu.

5 At jun konicꞌan cub tyecꞌun tib Kman twitz Salomón tuj witzicꞌ twi witz Gabaón, ex tzaj tmaꞌn Kman te cyjaꞌ: Kanintza weye alcye taja, jacu txi nkꞌoꞌne teya.

6 Atzunte Salomón xi ttzakꞌweꞌn: O tbinchaya nim xtalbil te ktzan nmane David aju tmajena, porque ate David ocslalxix tiꞌja ex tzꞌaklxix ex o bet tuj tumelxix twitza. Cyjaꞌtzun o tbinchaya nimxix xtalbil te, ex ma tzaj tkꞌoꞌna ambil tuꞌn toc jun tcyꞌajal te rey te t-xel, ic tzaꞌn ma bant jaꞌlo. 7 Aya Nman Dios, ma chin oc tkꞌoꞌna te rey te t-xel David aju ktzan nmane, masque ma cuꞌxunx kine ex naꞌnx tel nnicꞌe tiꞌj alcye tuꞌn nbinchanteye. 8 Pero ma chin cub tene cywitz ke xjal etzan tuꞌna, akeju ma che jaw t-scꞌoꞌna; jun tnam maꞌxix wen, ex tuꞌnju nimxix xjal, mlay bant cyajlanjtz ex mlay tzꞌel nicꞌbaj cyiꞌj jteꞌ cybet. 9 Kꞌontza nnable tuꞌn tbant ncawine cyibaj ke xjal etzan tuꞌna, ex tuꞌn tel nnicꞌe tiꞌj alcye baꞌn ex alcye mya baꞌn; porque ¿alcye jun jacu bant tcawin cyibaj ke xjal etzan tuꞌna, nimxix cybet? Chi Salomón.

10 Baꞌn eꞌla tuj twitz Kman aju tkanbetz Salomón, 11 ex tzaj tmaꞌn te: Tuꞌnju ma tzaj tkanina jlu weye, ex mintiꞌ ma tzaj tkanina tuꞌn t-xi lakꞌeꞌ tuj tankꞌibla, ex ka tuꞌn tten tkꞌinumabla, ex ka tuꞌn cycyim ke aj kꞌoj tiꞌja, nok oꞌcx ma tzaj tkanina tnabla tuꞌn tbinchanteya tiꞌj cyxtis xjal, ex tuꞌn tbant tcawina tuj tumelxix; 12 jaꞌlo cxel nkꞌoꞌne teya aju ma tzaj tkanina weye. Cxel nkꞌoꞌne tnabla ex tojtzkibla; mi aꞌl juntl o ten tnabl ojtxi ex mi aꞌl juntl cxel kꞌot tnabl te tibajxi ic tzaꞌn teya. 13 Ex mya nok oꞌcx jlu, ax icx cxel nkꞌoꞌne teya aju mintiꞌ ma tzaj tkanina, cxel nkꞌoꞌne tkꞌinumabla tucꞌix tajwalila, tuꞌntzun mi aꞌl juntl rey cpol ic tzaꞌn teya tuj tcyakil tankꞌibla. 14 Ka ma tbinchaya aju wajbile, ex ka ma che japun ke nleye tuꞌna ex ke nmandamyente, ic tzaꞌn o japun tuꞌn David aju ktzan tmana, cxel nlakꞌbaꞌne tuj tankꞌibla, chi Dios te Salomón.

15 Tejtzun tel twatl Salomón, eltzun tnicꞌ tiꞌj ka nok jun witzicꞌ jlu. Ex tej tpon tuj Jerusalén, xiꞌ jatum taꞌ ju cax cꞌubl tley Dios, ex e cub tpatun ke alumaj te jun oyaj te Kman, cyucꞌix ke chojbil te mojbabl tibil. Te tibajxi, tbincha jun nintz waꞌn cye cycyakil aj sanjelal at cyoclen ttxlaj.

16 Tuj tkꞌijlalil lu e pon cabe xuꞌj tucꞌil rey; jawni cywitz xuꞌj lu cyucꞌil xinak. 17 Tejtzun cyocx xtisil twitz, tma jun:

—Tat Rey, aju xuꞌj lu ex akine junx ja atoꞌcxe tuj, ex tej tul itzꞌj jun wale, aju xuꞌj lu ax taꞌ wucꞌile. 18 Tuj toxin kꞌij tul-len itzꞌj weye wal, ax icx te xuꞌj lu ul itzꞌj tal. Oꞌcx kcabix keye atoꞌye tuj kjaye; mintiꞌ juntl xjal at kucꞌile. 19 Pero at jun konicꞌan o cyim tal ju xuꞌj lu, porque tjakꞌx o cyaj tal. 20 Jawtzun weꞌ tmij akꞌbil, atzun weye in chin tantoke, el tiꞌn ju wale ntxlaje, ex cub coẍeꞌ tucꞌil, ex pontzun tkꞌaꞌcj ntxlaje aju te tal otok cyim. 21 Tejtzun tcub kꞌij in jaw weꞌye tuꞌn t-xi nkꞌoꞌne tchꞌuꞌ wale, pero tej toc nqueꞌyine, otok cyim. Ocxixtzun nkꞌoꞌne cwent tiꞌj tuj t-spicꞌumal tkan kꞌij, ex el nnicꞌe tiꞌj mya a wale aju otok tzaj waline, chi xuꞌj.

22 Atzun juntl xuꞌj tma:

—Miꞌn, axwe wal aju itzꞌx, ex aju teya tal a aju ma cyim.

Pero xi ttzakꞌweꞌn ju xuꞌj otok yolin nej:

—Miꞌn, aju teya tal a aju ma cyim, ex atzun weye wal, atzun aju itzꞌx.

Atzun o cybincha twitz rey, in che wuljtok tucꞌil cyyol. 23 Atzunte rey xi tmaꞌn: Chi jun xuꞌj, awe wal aju itzꞌx, ex aju cyimni atzun teya; pero ax icx tyol juntl xuꞌj: Miꞌn, aju teya tal a aju ma cyim ex atzun weye wal, atzun aju itzꞌx. 24 Xitzun tmaꞌn rey cyjaꞌ:

—Cyiꞌntze jun spad tzalu.

Tejtzun tpon kꞌiꞌn spad tucꞌil, 25 xi tmaꞌn:

—Cytxꞌemin cube tmij tal neꞌ itzꞌx, ex cykꞌonxe jun piẍ te jun xuꞌj, ex juntl piẍ te juntl xuꞌj.

26 Atzunte ttxuꞌ tal neꞌ itzꞌx tzaj nimxix tbis tiꞌj tal, ex xi tmaꞌn te rey:

—Tat Rey, binchama xtalbil tuꞌn miꞌn tcub tbyoꞌna tal neꞌ itzꞌ. Mejor kꞌonxa tal neꞌ teju xuꞌj lu.

Atzunte juntl xuꞌj tma:

—Miꞌn tzaj kꞌoꞌn tal neꞌ te teya, ex mi te weye. E tcub txꞌemin tmij tal neꞌ.

27 Atzunte rey xi tmaꞌn:

—Cykꞌonxe tal neꞌ itzꞌx teju xuꞌj xyolin nej. Miꞌn cub cybyoꞌne, porque aju xuꞌj lu atzun mera ttxuꞌ tal neꞌ.

28 Cycyakil aj Israel o cybi tej tbant tiꞌj cyxtis cabe xuꞌj lu tuꞌn rey Salomón; cyjaꞌtzun o che labin tiꞌj tuꞌnju el cynicꞌ tiꞌj, a Dios otok tzaj kꞌonte tnabl tuꞌn tcawin tuj tumelxix.