Tej tcub tmij cawbil
10
Xiꞌtzun Roboam tuj Siquem, porque cycyakil aj Israel otok che pon ma chixin tuꞌn toc cykꞌoꞌn te rey. 2 Pero o tbi Jeroboam aju tcyꞌajal Nabat, tej maxtok taꞌ tuj Ejipt jatum otok pon tej tel ok twitz rey Salomón, ex ajtz meltzꞌaj tuj Ejipt tuꞌn tul tuj ttanmi. 3 Xitzun txocbaj Jeroboam cyuꞌn aj Israel. Tejtzun tul, xiꞌ cyucꞌix cycyakil aj Israel yolil tucꞌil Roboam ex xi cymaꞌn te cyjaꞌ:4 —Puro cyuwxix tley ktzan tmana cub tkꞌoꞌn kibaje, atzun teya jaꞌlo miꞌn cub tkꞌoꞌna jun akꞌuntl cyuwxix kibaje, kꞌiꞌn ela aju ley ponin taꞌw wen cub tkꞌoꞌn ktzan tmana kibaje. Katzun ma txi tnimana kyole octzun ko ajbele teya.
5 Atzunte Roboam xi ttzakꞌweꞌn:
—Bix che ule juntl maj wucꞌile tuj ox kꞌij jaꞌlo.
E ajtzun cycyakil xjal cyja. 6 Atzunte rey Roboam oc ten kanil jun tumel cye ke tij xjal, akeju otok che ajben te rey Salomón aju ktzan tman tej itzꞌxtok, ex xi tkanin cye:
—¿Alcye jun nconseje ctzajel cykꞌoꞌne tuꞌn t-xi nmaꞌne cye xjal lu?
7 Atzun cye tij xjal xi cytzakꞌweꞌn:
—Ka ma tbinchaya baꞌn cye xjal lu, ex ka ma txi tnimana alcye cyajbil, ex ka ma cheꞌx ttzakꞌweꞌna tucꞌil jun yol puro baꞌn, cucxtzun che ajbel ke xjal lu teya.
8 Pero mintiꞌ xi tniman Roboam cyconsej ke tij xjal, nok oꞌcx xiꞌ kanil tconsej cyucꞌil ke cuꞌxun, akeju junx e tzaj chꞌiy tucꞌil ex in che ajben te, 9 ex xi tkanin cye:
—¿Alcye jun nconseje ctzajel cykꞌoꞌne tuꞌn t-xi nmaꞌne cye xjal lu, porque ma tzaj cykanin weye tuꞌn miꞌn tcub nkꞌoꞌntle akꞌuntl cyuwxix cyibaj, ic tzaꞌnju cub tkꞌoꞌn ktzan nmane?
10 Atzun cye cuꞌxun, akeju junx e tzaj chꞌiy tucꞌil, xi cytzakꞌweꞌn cyjaꞌ:
—Ke xjal ma tzaj cykanin teya tuꞌn miꞌn tcub tkꞌoꞌna akꞌuntl cyuwxix cyibaj ic tzaꞌn cub tkꞌoꞌn ktzan tmana, atzun teya kꞌmanxa cye cyjaꞌ: Ka puro cyuwxix o cawin ktzan nmane cyibaje, atzun weye cꞌicꞌel mastl wuꞌne ic tzaꞌn te; 11 ka cyuw tcawbil ktzan nmane cub tkꞌoꞌn cyibaje, atzun weye cꞌicꞌel mastl wuꞌne, ex ka xi jatoꞌn tiꞌj cycꞌuꞌje tuꞌn asyal tuꞌn, atzun weye cxel njatoꞌne tiꞌj cycꞌuꞌje tuꞌn tzꞌuꞌm xpotxꞌimaj tocx cꞌuxbil ttxaꞌn; chicuya cye, che chi ke cuꞌxun.
12 Tujtzun toxin kꞌij xiꞌ Jeroboam juntl maj cyucꞌix cycyakil tnam xjal aj Israel tuꞌn cyyolin juntl maj tucꞌil Roboam, ic tzaꞌnx otok tma cye. 13 Atzunte rey Roboam cyuwxix o yolin wen cye tnam xjal; mintiꞌ xi tniman aju consej otok tzaj cykꞌoꞌn tij xjal te. 14 Ex ax yol xi tmaꞌn cye xjal ic tzaꞌnju yol otok tzaj cymaꞌn ke cuꞌxun te, xi tmaꞌn: Ka cub kꞌoꞌn jun akꞌuntl cyuwxix cyibaje tuꞌn ktzan nmane, atzun weye cꞌicꞌel mastl wuꞌne ic tzaꞌn te, ex ka xi jatoꞌn tiꞌj cycꞌuꞌje tuꞌn asyal tuꞌn ktzan nmane, atzun weye cxel njatoꞌne cyasyale tuꞌn tzꞌuꞌm xpotxꞌimaj tocx cꞌuxbil ttxaꞌn, chi Roboam. 15 Mintiꞌ xi tniman rey cyyol tnam xjal porque tuꞌn Kman bant jlu, tuꞌntzun tjapun aju yol otok txi ttziyan Kman te Jeroboam aju tcyꞌajal Nabat. Aju yol lu tuꞌn Ahías aju aj Silo otok tzaj tmaꞌn. 16 Tejtzun cyqueꞌyinte cycyakil tnam xjal aj Israel mintiꞌ xi niman cyyol tuꞌn rey, xitzun cytzakꞌweꞌn cyjaꞌ:
Mintiꞌ ke koclen tiꞌj tiyjil David, mintiꞌ ke kxilen tucꞌil tcyꞌajal Isaí. Akeye aj Israel, teylex te junjun cu taj tja, atzun cye tiyjil David e toc cycwentin keju ateꞌ tuj tja, che chi.
Textzunju or lu cycyakil aj Israel e aj cyja. 17 Atzun ke aj Israel, akeju najlke cyuj ke tnam ateꞌ tuj Judá, cucx e cyaj ten tjakꞌ tcawbil rey Roboam. 18 Xi t-samaꞌn Roboam aju xjal Adoram tbi, aju toc te nejenel tiꞌj akꞌuntl lajwers in bant, atzun cye aj Israel oc cyxoꞌn tuꞌn abj ex biꞌx cyim cyuꞌn. Atzunte rey Roboam jax naj tuj tcarwaj ex xi ok tuj tnam Jerusalén. 19 Cyjaꞌtzun tten e etz aj Israel tjakꞌ cycawbil ke tiyjil David, ex cucx cyten jaꞌlo.