11
Tejtzun tpon Roboam tuj Jerusalén e baj tchmoꞌn jun syent tucꞌil 80 mil soldad, e jaw t-scꞌoꞌn cyxol tiyjil Judá ex cyxol tiyjil Benjamín, tuꞌntzun cykꞌojin cyiꞌj aj Israel ex tuꞌn tcawin juntl maj cyibaj. 2 Pero tzaj yolin Kman tucꞌil Semaías aju t-sanjel, ex tzaj tmaꞌn te cyjaꞌ: 3 Kꞌmanxa te Roboam aju tcyꞌajal Salomón ex rey tuj Judá, ex kꞌmanxa cye cycyakil tiyjil Judá ex cye tiyjil Benjamín: 4 Chitzun Kman cyjaꞌ: Miꞌn cheꞌxe kꞌojlel cyiꞌj ke cyermaniye. Baꞌn tuꞌn cyaj meltzꞌaje cycyakile cyjaye, porque wuꞌne ma che el npaꞌne ke aj Israel cyiꞌje.Tejtzun cybinte aju tzaj tmaꞌn Kman e ajtzun meltzꞌaj cycyakil cyja, ex ya mintiꞌ e jeꞌx kꞌojlel tiꞌj Jeroboam.
Baꞌn eꞌla tcawbil Roboam
5 Axtzun cyaj ten Roboam najal tuj Jerusalén, ex oc tkꞌoꞌn muro cyiꞌj junjun tnam tuj Judá, 6 ex atzun ke jlu: Belén, Etam, Tecoa, 7 Bet-sur, Soco, Adulam, 8 Gat, Maresa, Zif, 9 Adoraim, Laquis, Azeca, 10 Zora, Ajalón ex Hebrón. Atzun ke tnam lu te Judá ex te Benjamín oc tkꞌoꞌn muro cyiꞌjele. 11 Baj tcyuwsaꞌn ke muro cyiꞌj ke tnam, e cub tkꞌoꞌn ke nejenel cye soldad cyuj, ex ocx tcꞌuꞌn twitz awal cyuj, tucꞌix taꞌl twitz uva ex aseyt. 12 Ex xi t-samaꞌn ke makbil ex ke lans cyuj cycyakil ke tnam lu ex e baj tcyuwsaꞌnxix wen, ex cyjaꞌtzun tten e cyaj ten aj Judá ex aj Benjamín tjakꞌ tcawbil.
13 Cycyakil ke pal ex ke aj Leví najlke tuj tcyakil txꞌotxꞌ cye aj Israel e tzaj tuꞌn taj cykꞌon cyib tucꞌil Roboam. 14 Cyaj cycolin aj Leví cytxꞌotxꞌ ex tcyakil cyetzbil, tuꞌn cyul tuj Jerusalén ex cyuj mastl lugar tuj txꞌotxꞌ Judá, porque otok tzꞌel kꞌiꞌn cyoclen te pal tuꞌn Jeroboam, ex cyuꞌn ke tcꞌwaꞌl, tuꞌn miꞌn cucx cyajben te Kman. 15 Tuꞌnx te Jeroboam oc tkꞌoꞌn cyoclen junjun xjal te pal tuꞌn cyajben cyuj ke ja te cycꞌulbil xjal cywiꞌ ke witz, ex tuꞌn cyajben cyuj ke cꞌulbil cye ke juꞌẍ, ex cye tilbilal wacẍ, akeju tuꞌnx Jeroboam otok che cub tbinchaꞌn. 16 Ax icx keju axix toc cyajbil tuꞌn cyoc lpeꞌ tiꞌj Kman aju Cydios aj Israel, e oc lpeꞌ cyiꞌj ke pal ex cyiꞌj ke aj Leví, e ul tuj Jerusalén tuꞌn t-xi cykꞌoꞌn chojbil te Kman aju Cydios ktzan cyxeꞌchel. 17 Cyjaꞌtzun tten cyuwset ju cawbil tuj Judá, ex tuj ox abkꞌi oc tipun tcawbil Roboam cyuꞌn, aju tcyꞌajal Salomón, porque oꞌcx tuj ox abkꞌi e nimante Kman, ic tzaꞌn o tbincha David ex Salomón.
18 O mojeꞌ Roboam tucꞌil jun xuꞌj Mahalat tbi, aju tmeꞌjel Jerimot ex tal Abihail; ate Jerimot tcyꞌajal David, atzunte Abihail tmeꞌjel Eliab ex tal tchman Isaí. 19 Akeju tcꞌwaꞌl Roboam e tzaj tiꞌj Mahalat atzun ke jlu: Jehús, Semarías ex Zaham. 20 Te tibajxi o mojeꞌ Roboam tucꞌil juntl xuꞌj Maaca tbi, aju tmeꞌjel Absalón, ex ke tcꞌwaꞌl e tzaj tiꞌj Maaca atzun ke jlu: Abías, Atai, Ziza, ex Selomit. 21 Attok wajxaklaj t-xuꞌjil Roboam ex 60 tcab t-xuꞌjil, pero mas at nim tgan tiꞌj Maaca cywitz mastl t-xuꞌjil. Tzaj 28 tcyꞌajal ex 60 tmeꞌjel.
22 At jun tal Maaca, Abías tbi, ex ate jlu oc tkꞌoꞌn Roboam toclen te nejenel cye terman, porque tajbiltok Roboam tuꞌn toc tkꞌoꞌn te rey. 23 Ten nim tnabl Roboam, porque e jeꞌx baj t-samaꞌn ke mastl tcyꞌajal tuj tcyakil txꞌotxꞌ Judá ex Benjamín, ex cyuj cycyakil tnam toc muro cyiꞌj, ex xi tkꞌoꞌn tcyakilju at tajben cye, ex tzaj tjyoꞌn nim cyxuꞌjil.