E baj t-xitun Asa ke tilbilal nnoꞌc cydiosin xjal
15
Ul T-xew Dios tucꞌil Azarías aju tcyꞌajal Obed, 2 ex etz canul tiꞌj Asa xi tmaꞌn te cyjaꞌ: Chin tbintza, Asa, cyucꞌix cycyakil aj Judá ex aj Benjamín. Ate Kman at cyucꞌile ka cucx ma che nimane te. Ka ma che kanine onbil te, che tzajel onine tuꞌn, pero ka ma cyaj cycoline, ax icx te, che cyjel coline tuꞌn. 3 Nim tyemp ma che ten aj Israel mintiꞌ jun Cydios axix toc, mi jun pal at tuꞌn t-xi tkꞌoꞌn xnakꞌtzbil cye, ex mintiꞌ biꞌn chꞌin tley Dios cyuꞌn. 4 Pero tej ttzaj yajbil cyiꞌj e ajtz meltzꞌaj juntl maj tucꞌil Kman aju Cydios aj Israel, e kanin onbil te ex e tzaj onin tuꞌn. 5 Tuj tkꞌijlalil lu mintiꞌ e ten xjal tuj txubtxaj, nok oꞌcx tzaj nim xobajil cyibaj oc cyex betel, tuꞌnju at nim mya baꞌn in binchanjtz cyuj cycyakil tnam. 6 Ke nasyon in che kꞌojltok cyucꞌil mastl nasyon, ax icx ke tnam cyucꞌil mastl tnam, porque tuꞌn Kman tzaj tkꞌoꞌn tcyakil txcaj cꞌixbisabl cyibaj. 7 Atzun cyeye, tenx cyipune ex miꞌn che cub numje, porque oc cycꞌmaꞌye chojbil tiꞌj cyakꞌunbene, chi Azarías.8 Tejtzun tbinte Asa ke yol lu tuꞌn t-sanjel Dios Azarías aju tcyꞌajal Obed, oc mas tipun ex e eltzun tiꞌn ke tilbilal icꞌbilxix tuj tcyakil txꞌotxꞌ Judá ex Benjamín, ex tuj tcyakil tnam otok cub cyiꞌj tuꞌn tuj tiwitz txꞌotxꞌ cye aj Efraín, ax icx jaw tbinchaꞌn ju altar te Kman, aju tcubtok ttxaꞌn peꞌn twitz tja Dios. 9 Te tibajxi e oc tchmoꞌn cycyakil aj Judá ex aj Benjamín, cyucꞌix junjun tiyjil Efraín, Manasés ex Simeón, akeju otok che etz tuj cytanmi ex otok tzꞌajtz cykꞌon cyib tucꞌil Asa, tej tcyil ate Kman aju Tdios Asa attok tucꞌil.
10 Oc cychmon cyib tuj Jerusalén tuj toxin xjaw te abkꞌi tej otok bant olaj abkꞌi ttzyetlen tcawin Asa. 11 Tuj kꞌij lu xi cykꞌoꞌn wuk syent wacẍ ex wuk mil ẍneꞌl te jun chojbil te Kman; ake jlu etz cyiꞌn cyxol ke alumaj otok tzꞌel cyiꞌn cye aj kꞌoj cyiꞌj. 12 Xi cytziyan tuꞌn cycꞌulun tuꞌn tcyakil cyanmi ex tuꞌn tcyakil cycꞌuꞌj oꞌcx te Kman aju Cydios ktzan cyxeꞌchel. 13 Xi cytziyan tuꞌn tcub t-sentens jun xjal tuꞌn tcyim, ka tij xjal ex ka cꞌwaꞌl, ka xinak ex ka xuꞌj, nok alcye mintiꞌ ma txi tniman tyol Kman aju Cydios aj Israel. 14 Xi cytziyan aju yol lu te Kman tucꞌil tkꞌajkꞌajel cywiꞌ cyuw, in che schꞌin tuꞌn tzalajbil, ex nnoꞌc cykꞌajtzaꞌn chun ex tcach ẍneꞌl. 15 Cycyakil aj Judá e jaw tzalaj tiꞌj ju yol xi cytziyan, porque xi cytziyan tuꞌn tcyakil cyanmi. Otok che oc ten kanil onbil te Kman tuꞌn tcyakil cycꞌuꞌj, ex otok che tzaj onin tuꞌn Kman, ex tuꞌn Kman e ten tuj txubtxaj tuj tcyakil part te cytanmi.
16 Ax icx el tiꞌn Asa toclen tyaꞌ te xuꞌj rey, aju Maaca tbi, porque otok txi tmaꞌn Maaca tuꞌn tbant jun tilbilal xuꞌj dios Asera. Cub t-xitun Asa aju tilbilal lu, cub tpaẍuꞌn ex cub tpatun tuj tkꞌab xak Cedrón. 17 Ex masque mintiꞌ e jeꞌl kꞌiꞌn ke lugar jatum in che cꞌulun xjal cywiꞌ ke witz cyxol aj Israel, pero ate Asa cucx o japun tyol Kman tuꞌn tuj tcyakil tankꞌibl, 18 ex ocx tkꞌoꞌn tuj tja Dios tcyakil kꞌan pwak ex sak pwak, aju te otok tzꞌel tpaꞌn tuꞌn t-xi tkꞌoꞌn te Dios, tucꞌixju te ktzan tman otok tzꞌel tpaꞌn. 19 Mintiꞌtl kꞌoj oc tuj tcwent rey Asa, maxitzun oc kꞌoj tej tjapun 35 abkꞌi ttzyetlen tcawin.