16
Atzunte Kman tzaj yolin te Jehú aju tcyꞌajal Hanani, tuꞌntzun t-xi tmaꞌn ke yol lu tiꞌj Baasa: 2 Nej mintiꞌtok chꞌin toclena, pero oc nkꞌoꞌne tuꞌn toca te nejenel cye aj Israel akeju etzan wuꞌne; atzun teya icx ma tzꞌoca ic tzaꞌn te Jeroboam; ma che binchan aj Israel il tuꞌna ex ma tzaj nkꞌoje tuꞌn tlaj o che binchan il. 3 Cyjaꞌtzun, aya Baasa cnajela wuꞌne cyucꞌix ke tiyjila; ax cbantel wuꞌne cyiꞌj ke tiyjila ic tzaꞌnju o bant wuꞌne cyiꞌj ke tiyjil Jeroboam aju tcyꞌajal Nabat. 4 Ke tiyjila che cymel tuj tnam, che xeꞌl chyoꞌn cyuꞌn txꞌyan; ex atzun keju che cymel tuj cojbil, che xeꞌl chyoꞌn cyuꞌn cꞌutz, chi Jehú.5 Aju chꞌintl txꞌolbaben tiꞌj Baasa, ex tiꞌj ju tbincha, ex tiꞌj ju tbinchben maꞌxix toclen, atzun tzꞌiban tuj uꞌj jatum taꞌ tcyakil txꞌolbaben cyiꞌj cybinchben ke rey cye aj Israel. 6 Tejtzun tcyim Baasa cuꞌx makuꞌn tuj tnam Tirsa. Te tibajxi aju o cawin te t-xel, atzun Ela aju tcyꞌajal.
7 Tzaj tmaꞌn Kman te Jehú aju t-sanjel, aju tcyꞌajal Hanani, alcye t-sentens Baasa attok tcubil ex ju cysentens ke tiyjil, porque akeju tbinchben Baasa mya baꞌn e ela tuj twitz Kman; cyjaꞌtzun tzaj tkꞌoj tiꞌj, porque ax ke mya baꞌn o tbincha ic tzaꞌn keju o tbincha Jeroboam ex ke tiyjil, akeju e cub tbyoꞌn Baasa.
Tej ttzyet tcawin Ela ex Zimri cyxol aj Israel
8 Otok bant 26 abkꞌi ttzyetlen tcawin Asa tuj Judá, tej ttzyet tcawin Ela aju tcyꞌajal Baasa cyibaj ke aj Israel tuj tnam Tirsa, ex cab abkꞌi o cawin. 9 Pero ate Zimri, aju tocsaꞌn te nejenel cyiꞌj mijcu tcarwaj rey in che ajben tuj kꞌoj, oc tchmoꞌn jun cꞌloj xjal junx cyximbetz tucꞌil tuꞌn tjaw cyiꞌn cyib tiꞌj Ela. At jun kꞌij, tej attok Ela tuj tnam Tirsa tuj tja Arsa aju tmayordom, oc ten cꞌal kꞌeꞌn tejxi tchyoꞌn twiꞌ. 10 Pontzun Zimri ex cub byoꞌn Ela tuꞌn tuꞌntzun tcawin te t-xel. Bant jlu tej otok bant 27 abkꞌi ttzyetlen tcawin Asa tuj Judá.
11 Nok oꞌcx tej ttzyet tcawin Zimri, e cub tbyoꞌn cycyakil ke xjal at cyxilen tucꞌil Baasa, ex mi jun xinak cyaj ankꞌin tuꞌn cyxol keju at cyxilen tucꞌil Baasa, mi cyxol ke tamiw. 12 Cyjaꞌtzun tten e cyim cycyakil xjal at cyxilen tucꞌil Baasa tuꞌn Zimri, ic tzaꞌnx ju sentens otok tma Kman tiꞌj Baasa, aju otok tma Jehú aju t-sanjel. 13 Tuꞌn cylaj cycyakil ke il tbincha Baasa ex ke il tbincha Ela aju tcyꞌajal, e binchan aj Israel il, e cꞌulun cywitz ke tilbilal; cyjaꞌtzun tzajxix tkꞌoj Kman cyiꞌj, aju Cydios aj Israel.
14 Aju chꞌintl txꞌolbaben tiꞌj Ela ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.
15 Tej lajoꞌntok 27 abkꞌi ttzyetlen tcawin Asa tuj Judá ttzyet tcawin Zimri tuj tnam Tirsa. Pero nok wuk kꞌij o cawin, ex tujx kꞌij lu otok tzꞌoc cychmon cyib ke soldad aj Israel tuꞌn cyoc ten kꞌojlel cyiꞌj aj Filistey tuj tnam Gibetón. 16 Tujx kꞌij lu, tej ateꞌtok ke soldad tuj campament, o cybi ka otok mojeꞌ tyol Zimri cyucꞌil xjal ex otok cub byoꞌn rey tuꞌn. Cycyakiltzun ke soldad ateꞌ tuj campament oc cykꞌoꞌn Omri te rey cye aj Israel, aju nejenel cye soldad. 17 Cyjaꞌtzun xi tcolin Omri cyucꞌix cycyakil soldad aj Israel tuꞌn cykꞌojin tiꞌj tnam Gibetón, ex cub be cyuꞌn tuꞌn cypon tuj tnam Tirsa ex e oc tzokpaj tiꞌj.
18 Tejtzun tqueꞌyinte Zimri otok tzyet ju tnam, ocx tuj jun ja cyuw tten tuj tja rey, oc tkoptzꞌiꞌn kꞌakꞌ tiꞌj ja ex tucꞌix tocxtok tuj; cyjaꞌtzun tten cyim. 19 Bant icju tuꞌn tlaj ju il bant tuꞌn, ex tuꞌnju tbinchben mya baꞌn ela tuj twitz Kman, porque ax il tbincha ic tzaꞌn keju tbincha Jeroboam, ex tuꞌn jlu e binchan aj Israel il tuꞌn.
20 Aju chꞌintl txꞌolbaben tiꞌj Zimri ex tiꞌj ju tbincha tiꞌj rey Ela, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.
Tej ttzyet tcawin Omri cyxol aj Israel
21 Cub ten jun pabl tib cyxol tnam xjal, mij cyajbiltok tuꞌn a Tibni tuꞌn toc te cyrey, aju tcyꞌajal Ginat, ex mijtl cyajbiltok tuꞌn a Omri tuꞌn toc te cyrey. 22 Te mancbilxi, akeju ateꞌ tucꞌil Tibni aju tcyꞌajal Ginat, cub cyiꞌj cyuꞌn keju ateꞌ tucꞌil Omri. Cyimtzun Tibni, ex cyjaꞌtzun oc Omri te rey.
23 Otok bant 31 abkꞌi ttzyetlen tcawin Asa aju rey te Judá, tej ttzyet tcawin Omri cyxol aj Israel, ex cablaj abkꞌi o cawin; kak abkꞌi o cawin tuj tnam Tirsa. 24 El tlakꞌoꞌn te Semer aju witz Samaria tbi, tuꞌn jun quintal tucꞌ 50 libr sak pwak, ex atzun ma chixin jaw tbinchaꞌn jun tnam ex oc tkꞌoꞌn muro tiꞌj, ex oc tkꞌoꞌn tbi Samaria, porque Semer tbi tajwil ju witz nej.
25 Akeju tbinchben Omri mya baꞌn e ela tuj twitz Kman, masxix mya baꞌn o tbincha ic tzaꞌn ke rey e ten nej twitz, 26 porque ax ke il tbincha ic tzaꞌn keju tbincha Jeroboam aju tcyꞌajal Nabat; e binchan aj Israel il tuꞌn, ex tuꞌnju in che cꞌulun cywitz ke tilbilal, tzaj tkꞌoj Kman cyiꞌj, aju Cydios aj Israel.
27 Aju chꞌintl txꞌolbaben tiꞌj Omri ex tiꞌj tcyakil aju tbincha, ex cyiꞌj ke tbinchben maꞌxix cyoclen, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 28 Tejtzun tcyim, cuꞌx makuꞌn tuj tnam Samaria. Te tibajxi aju o cawin te t-xel, atzun Acab aju tcyꞌajal.
Tej toc Acab te rey cyxol aj Israel
29 Otok bant 38 abkꞌi ttzyetlen tcawin rey Asa tuj Judá, tej ttzyet tcawin Acab aju tcyꞌajal Omri cyxol ke aj Israel. Ex o cawin 22 abkꞌi cyxol aj Israel tuj tnam Samaria. 30 Pero aju tbinchben Acab mya baꞌn ela tuj twitz Kman, ex masxix mya baꞌn o tbincha cywitz ke mastl rey, akeju otok che ten nej twitz. 31 Aju il tbincha mya nok oꞌcx ic tzaꞌn tbincha Jeroboam aju tcyꞌajal Nabat, ax icx at juntl il tbincha mas maꞌxix, tuꞌnju o mojeꞌ tucꞌil ju xuꞌj Jezabel aju tmeꞌjel Et-baal aju cyrey aj Sidón, ex atzun o cꞌulun twitz Baal ex o ajben te, 32 ex jaw tbinchaꞌn jun tja Baal tuj Samaria, tucꞌix jun altar tuj. 33 Ax icx cub tbinchaꞌn jun tilbilal xuꞌj dios Asera. Tuꞌntzun jlu tzaj tkꞌoj Kman aju Cydios aj Israel tiꞌj rey Acab, ex masxix nim tkꞌoj Kman tzaj tiꞌj cywitz ke mastl rey otok che ten nej twitz.
34 Tuj tkꞌijlalil Acab o jaw binchaꞌn juntl maj tnam Jericó tuꞌn jun xjal aj Betel, Hiel tbi. Tej tcub keꞌ t-simyentil tnam tuꞌn, biꞌx cyim Abiram aju nej tcyꞌajal; ex tej cyoc ke tpwertil tnam tuꞌn, biꞌx cyim mancbil tcyꞌajal, Segub tbi, ic tzaꞌnx otok tma Kman te Josué aju tcyꞌajal Nun.