2 Tzaj yolin Kman tucꞌil Elías ex tma cyjaꞌ: 3 Texa tzalu ex cyjaꞌ t-xiꞌya tuj tjawitz kꞌij, ewanx tiba tuj tkꞌab xak aju toc tbi Querit aju tcub jlajxi nima Jordán tuj tjawitz kꞌij. 4 Atzun ccꞌala aꞌ tuj tkꞌab xak lu, ex o txi nmaꞌne cye ke joj tuꞌn t-xi kꞌaꞌcj twaya cyuꞌn.

5 Tbinchatzun Elías ic tzaꞌnx o tma Kman te, xiꞌtzun tuj tkꞌab xak Querit jlajxi ju nima Jordán, ex axtzun cyaj ten. 6 Pontzun kꞌiꞌn twa ex tchiꞌ cyuꞌn ke joj te prim ex te kale, ex atzun o cꞌan aꞌ tuj tkꞌab xak. 7 Pero tej tel chꞌintl kꞌij, aj tzkij tkꞌab xak porque mintiꞌ jbal o tzaj tuj tcyakil txꞌotxꞌ cye aj Israel.

8 Xitzun tmaꞌn Kman te Elías: 9 Weꞌctza ex txiꞌya tuj tnam Sarepta nikayin ttxlaj tnam Sidón, ex atzun tcyaj tena najal ma chixin. Ma txi nmaꞌne te jun meba xuꞌj najl tuj lugar ma chixin tuꞌn ttzaj kꞌoꞌn twaya tuꞌn.

10 Jawtzun weꞌ Elías ex xiꞌ tuj tnam Sarepta. Tej tocx tuj ju tnam o til jun meba xuꞌj in kꞌin siꞌ. Tzaj ttxcoꞌn ex xi tmaꞌn te:

—Binchama xtalbil, kꞌintza chꞌin aꞌ tuj jun vas te ncꞌaye.

11 Cyjaꞌtok t-xiꞌ xuꞌj kꞌilte tej tajtz txcoꞌn juntl maj tuꞌn Elías, ex xi tmaꞌn te:

—Binchama xtalbil, tucꞌix jun piẍ pan kꞌintza.

12 Atzunte xuꞌj xi ttzakꞌweꞌn te:

—Cxel nmaꞌne jun yol axix toc twitz Kman aju Tdiosa: misicyer pan banimaj wuꞌne. Nok oꞌcx jun yub arin atx tuj jun ẍokꞌ, ex tucꞌix chꞌin chibj aseyt atx tuj jun xar, ex atzun til in chin kꞌine chꞌin siꞌ, tuꞌn nxiꞌye tzkꞌajsalte te twa wale ex te weye. Cbajel kwaꞌne jlu, ex te tibajxi ko cymele tuꞌn weꞌyaj, porque mintiꞌtl atx.

13 Atzunte Elías xi ttzakꞌweꞌn:

—Miꞌn xoba. Txiꞌya binchalte ju ma tmaya. Pero tnejel binchama jun tal wabj te weye tiꞌj arin ma tmaya ex kꞌintza weye, te tibajxi binchama juntl te teya ax icx te tala. 14 Porque ma tzaj tmaꞌn Kman aju Cydios aj Israel cyjaꞌ: Mlay cub baj naj aju arin tcuꞌx tuj ẍokꞌ, ax icx aju chibj aseyt tcuꞌx tuj xar; maxi cbel baj ocxi ttzaj jbal tuꞌn Kman tibaj txꞌotxꞌ lu.

15 Xiꞌtzun ju xuꞌj ex tbincha ic tzaꞌnx otok tma Elías. Ate xuꞌj cyucꞌix keju ateꞌ tuj tja ex tucꞌix Elías, cabal o canun cywa te nim kꞌij. 16 Mintiꞌ cub baj naj arin tuj ẍokꞌ, ax icx ju chibj aseyt tuj xar; o japun ic tzaꞌnx otok tma Kman te Elías.

17 Otok tzꞌel kꞌij, tzyet tal meba xuꞌj tuꞌn yabil; cyuwxix aju yabil oc tiꞌj ex o cyim. 18 Xitzun tmaꞌn ju meba xuꞌj te Elías:

—Aya t-sanjel Dios, ¿ti tkꞌoja wiꞌje? ¿Mape tzula wucꞌile nok tuꞌn ttzaj tnaꞌna wile ex tuꞌn tcyim wale?, chi xuꞌj.

19 —Kꞌontza tala tzalu wucꞌile, chi Elías xi ttzakꞌweꞌn.

Eltzun tiꞌn Elías aju tal cꞌwaꞌl twi tkan meba xuꞌj, ex jax tiꞌn tuj tcwart jatum najltok, ex cub tcoẍbaꞌn twi twatbil. 20 Jawtzun tkꞌajkꞌajel twiꞌ cyuw, ex xi tmaꞌn te Kman: Aya Nman Dios, ¿maj tucꞌix ju meba xuꞌj lu ma tzaj tkꞌoꞌna jun bis tiꞌj, aju jatum in chin posadiyine, ex lu ma cyim tal tuꞌna?

21 Te tibajxi jlu cubtzun mutzeꞌ Elías ox maj tibaj tal kꞌa, jaw tkꞌajkꞌajel twiꞌ cyuw ex xi tmaꞌn te Kman: Aya Nman Dios, in chin cubsane twitza tuꞌn tul tnabl tal kꞌa lu tuꞌna.

22 Tzajtzun ttzakꞌweꞌn Kman aju tkanbetz Elías, ex ul tnabl tal kꞌa. 23 Jawtzun tiꞌn naj Elías aju tal kꞌa, cuꞌtz tiꞌn tuj tcwart ma twi ja, xi tkꞌoꞌn te ttxuꞌ, ex xi tmaꞌn te:

—Queꞌyintza, aju tala ma tzul tnabl.

24 Atzunte xuꞌj xi ttzakꞌweꞌn:

—Jaꞌlo ma tzꞌel nnicꞌe tiꞌj ax toc aya jun t-sanjel Dios, ex aju in tmaꞌna ax toc a Kman in kꞌmante teya.