Tej tcawin Joram tuj Judá
21
Cyimtzun Josafat ex cuꞌx makuꞌn tuj tnam toc tbi Ttanmi David aju ktzan t-xeꞌchel, ex aju cyaj ten te rey te t-xel, atzun Joram aju tcyꞌajal. 2 Ke terman Joram, akeju ax tcyꞌajal Josafat ke, atzun ke jlu: Azarías, Jehiel, Zacarías, Azarías, Micael ex Sefatías. Cycyakil ke jlu tcyꞌajal Josafat ke, aju rey cye aj Judá. 3 Otok txi tkꞌoꞌn cyman nimcu oyaj cye; xi tkꞌoꞌn kꞌan pwak, sak pwak ex mastl tiꞌxti wiꞌyilxix, ax icx xi tkꞌoꞌn junjun tnam cye, akeju toc muro cyiꞌj ateꞌ tuj Judá, pero aju cawbil xi tkꞌoꞌn te Joram porque atzun nej tcyꞌajal. 4 Tejtzun tcyuwset Joram tuj tcawbil e cub tbyoꞌn cycyakil ke terman tuꞌn spad, cyucꞌix junjun nejenel cye aj Israel. 5 Toctok twiꞌ 32 abkꞌi tej ttzyet tcawin ex o cawin wajxak abkꞌi tuj Jerusalén. 6 Oc lpeꞌ tiꞌj cybinchben ke rey cye aj Israel ex tiꞌj tbinchben rey Acab ex ke tiyjil, porque o mojeꞌ tucꞌil jun tmeꞌjel Acab, cyjaꞌtzun mya baꞌn e ela ke tbinchben Joram tuj twitz Kman. 7 Pero mintiꞌ o tajbe Kman tuꞌn cynaj ke tiyjil David, tuꞌn tlaj ju yol otok tzaj ttziyan te David tuꞌn cucx tuꞌn cyjaw scꞌet ke tiyjil tuꞌn cyoc te rey.8 Tuj tkꞌijlalil tej tcawin Joram jaw cyiꞌn cyib aj Edom cyiꞌj aj Judá, el cypaꞌn cyib ex oc cykꞌoꞌn jun cyex cyrey. 9 Atzunte Joram xiꞌ cyucꞌil tcapitán ex cyucꞌix cycyakil ke tcarwaj in che ajben tuj kꞌoj, pero baj cytxolban cyib aj Edom cyiꞌjele ex tujxtzunju konicꞌan lu jaw weꞌ Joram cyucꞌix ke capitán cye tcarwaj, e octzun tzokpaj cyiꞌj aj Edom ex cub cyiꞌj cyuꞌn. 10 Masque icju, pero e etz aj Edom tjakꞌ tcawbil Judá, ex cytenx jaꞌlo. Ex tujx tkꞌijlalil lu etz tnam Libna tjakꞌ tcawbil Judá, porque otok cyaj tcolin Joram Kman aju Cydios ktzan t-xeꞌchel. 11 Ax icx e jaw tbinchaꞌn Joram ke lugar cywiꞌ ke witz tuj Judá jatum tuꞌn cycꞌulun ke xjal cywitz ke tilbilal, ex tuꞌntzun jlu el cypaꞌn cyib aj Jerusalén ex aj Judá tiꞌj Kman.
12 Tcꞌamtzun Joram jun uꞌj tuꞌn Elías aju t-sanjel Dios, ex chi uꞌj in tmaꞌn: Ate Kman aju Tdios David aju ktzan t-xeꞌchela in tmaꞌn teya cyjaꞌ: Mintiꞌ ma tzꞌoc lpeꞌya tiꞌj tbinchben Josafat aju ktzan tmana ex tiꞌj tbinchben rey Asa aju ktzan tchmana, 13 nok oꞌcx ma tzꞌel tcanoꞌna tiꞌj cybinchben ke rey cye aj Israel, ex tuꞌn tlaja ma tzꞌel cypaꞌn cyib ke xjal aj Judá ex aj Jerusalén tiꞌj Kman, ic tzaꞌn o tbincha Acab ex ke tiyjil. Ax icx o che cub tbyoꞌna ke termaniya, akeju mas baꞌn cymod twitza. 14 Cyjaꞌtzun cbel tkꞌoꞌn Kman jun nintz cꞌixbisabl cyibaj ke t-xjalila, cyibaj ke tcꞌwaꞌla, cyibaj ke t-xuꞌjila ex tibaj tcyakilju at teya. 15 Ex atzun teya ctzajel jun yabil tiꞌja mintiꞌ kꞌanbil tiꞌj. C-yabtela tuꞌn tcꞌuꞌja ex oc che bajel kꞌay ke t-xkꞌiltxaꞌya, chi Elías tuj tuꞌj.
16 Tuꞌn Kman tzaj cykꞌoj aj Filistey ex aj Arabia tiꞌj Joram, ake jlu cyvesin cyib cyucꞌil aj Etiopía; 17 cubtzun be cyuꞌn ex e oc tzokpaj cyiꞌj aj Judá, xi cyiꞌn tcyakil kꞌinumabl cnet cyuꞌn tuj tja rey, xi cyiꞌn ke tcꞌwaꞌl ex ke t-xuꞌjil. Oꞌcxcu jun tcꞌwaꞌl cyaj clet, Ocozías tbi, aju chꞌiꞌp. 18 Te tibajxi tcyakil jlu cub tkꞌoꞌn Kman tcastiw Joram, o yabt tuꞌn tcꞌuꞌj, mintiꞌ kꞌanbil tiꞌj. 19 Eltzun kꞌij ex tej tbant cab abkꞌi ttzyetlen tuꞌn yabil, e baj kꞌay ke t-xkꞌiltxaꞌ tuꞌn yabil ex cyimtzun tucꞌil nimxix taꞌw. Ke t-xjalil mintiꞌ cub cykꞌoꞌn jun nintz kꞌakꞌ te nimbilte ic tzaꞌn otok cybincha cyiꞌj ktzan t-xeꞌchel. 20 Toctok twiꞌ 32 abkꞌi tej ttzyet tcawin ex o cawin wajxak abkꞌi tuj Jerusalén. Tej tcyim mi jun o bisun tiꞌj. Cuꞌxtzun makuꞌn tuj tnam toc tbi Ttanmi David, pero mintiꞌ ocx kꞌoꞌn tuj cypantyón ke rey.