Xi kꞌoꞌn juntl maj ttxꞌotxꞌ xuꞌj aj Sunem
8
Otok txi tmaꞌn Eliseo te xuꞌj aju otok jaw ankꞌin tal, tuꞌn t-xiꞌ najal tuj juntl lugar cyucꞌix keju ateꞌ tuj tja, porque otok tma Kman ka tuꞌn ttzaj jun nintz weꞌyaj tuj txꞌotxꞌ lu, ex wuk abkꞌi tuꞌn tten. 2 Banttzun tten xuꞌj ex tbincha ic tzaꞌnx otok txi tmaꞌn t-sanjel Dios te; xiꞌ cyucꞌix keju ateꞌ tuj tja tuj txꞌotxꞌ cye aj Filistey, ex matzun cyaj ten najal ma chixin wuk abkꞌi. 3 Tbajlenxi wuk abkꞌi ajtztzun meltzꞌaj xuꞌj tuj cytxꞌotxꞌ aj Filistey, ex xiꞌ tucꞌil rey kanilte tuꞌn tajtz kꞌoꞌn juntl maj tja ex ttxꞌotxꞌ. 4 In yolintok rey tucꞌil Giezi aju tmajen Eliseo aju t-sanjel Dios, ex otok txi tkanin tuꞌn ttzaj kꞌmaꞌn te cycyakil ke binchben maꞌxix cyxilen otok che bant tuꞌn Eliseo. 5 Ex tujx or lu, tej in kꞌmantok Giezi te rey tiꞌj tzaꞌn tten otok jaw ankꞌin tal jun xuꞌj tuꞌn Eliseo, tej tpon ju xuꞌj yolil tucꞌil rey tiꞌj tja ex tiꞌj ttxꞌotxꞌ. Xitzun tmaꞌn Giezi te:—Tat Rey, atzun xuꞌj lu, ex atzun tal lu aju jaw ankꞌin tuꞌn Eliseo.
6 Xitzun tkanin rey te xuꞌj ti otok baj tiꞌj, ex tzaj tmaꞌn xuꞌj aju otok baj tiꞌj. Te tibajxi xi tmaꞌn rey te jun xjal at toclen ttxlaj tuꞌn taj tkꞌoꞌn juntl maj tcyakil tetzbil xuꞌj, tucꞌix tcyakil twiꞌ twitz awal aju otok tzaj tkꞌoꞌn ju txꞌotxꞌ atxix tej tex xuꞌj tuj ttxꞌotxꞌ ex tejxi tpon meltzꞌaj.
Tej toc Hazael te rey tuj Siria
7 Te tibajxi jlu, xiꞌ Eliseo tuj tnam Damasco. Tuj tkꞌijlalil lu otok yabt Ben-adad aju rey te Siria, ex xi kꞌmaꞌn te ka otok pon t-sanjel Dios. 8 Xitzun tmaꞌn rey te Hazael:
—Kꞌinxa jun oyaj ex txiꞌya tucꞌil t-sanjel Dios, ex kꞌmanxa te tuꞌn t-xi tkanin te Kman ka oc chin banixele tuꞌnju yabil lu.
9 Xiꞌtzun Hazael tucꞌil t-sanjel Dios, ex xi tiꞌn ke oyaj, akeju mas tbanil at tuj Damasco, ikan cyuꞌn 40 chej camey. Tejtzun tpon twitz xi tmaꞌn te:
—Ate Ben-adad aju rey te Siria ic tten ic tzaꞌn tcꞌwaꞌla, ex ma chin tzaj samaꞌne tuꞌn, tuꞌn t-xi nkanine teya ka tuꞌn tbanix teju yabil toc tiꞌj.
10 Xitzun tmaꞌn Eliseo te:
—Txiꞌya ex kꞌmanxa te cyjaꞌ: Cbanixela teju yabil, chicuya te. Pero ma tzaj tyecꞌun Kman weye ka ilxix tiꞌj tuꞌn tcyim.
11 Axtzun xi baj twitz Eliseo tiꞌj Hazael, ex tuꞌn jlu tzaj tchꞌixwi Hazael. Oc ten t-sanjel Dios okꞌel, 12 ex xi tkanin Hazael te:
—¿Tikuꞌn in okꞌa, Tat?
Xi ttzakꞌweꞌn Eliseo:
—Porque baꞌn wuꞌne, oc tbinchaꞌya mya baꞌn cyiꞌj aj Israel, cꞌoquel tkꞌoꞌna cykꞌakꞌal ke ja te cycolbil cyib, che bel tbyoꞌna tuꞌn spad ke cuꞌxun at cyxol, che bel t-xoꞌna ke cꞌwaꞌl twitz txꞌotxꞌ tuꞌn cycyim, ex cbelex tjakoꞌna cycꞌuꞌj ke xuꞌj chꞌixtok tul cyal, chi Eliseo.
13 Xi ttzakꞌweꞌn Hazael:
—¿Tzaꞌn tten tuꞌn nbinchanteye jun tiꞌxti ic tzaꞌn jlu? Porque akine mintiꞌ woclene, ic ntene ic tzaꞌn jun txꞌyan.
Atzunte Eliseo xi ttzakꞌweꞌn:
—Ma tzaj tyecꞌun Kman weye ka aya cꞌoquel te rey cye aj Siria.
14 Bajtzun tkꞌolben tib Hazael tucꞌil Eliseo ex xiꞌtzun tucꞌil tpatrón, ex xi tkanin rey te:
—¿Ti ma tma Eliseo teya?
—Ma tma weye ka oc banixela teju yabil, chi Hazael xi ttzakꞌweꞌn.
15 Pero tuj juntl kꞌij xiꞌ Hazael, tzaj tiꞌn jun xbalun, oc tacꞌsaꞌn tuꞌn aꞌ, cub tkꞌoꞌn tibaj twitz rey, ex tuꞌn jlu biꞌx cyim rey. Te tibajxi jlu, atzun Hazael o cawin te t-xel.
Tej ttzyet tcawin Joram tuj Judá
16 Lajoꞌntok jweꞌ abkꞌi ttzyetlen tcawin Joram aju tcyꞌajal Acab cyxol aj Israel, tej ttzyet tcawin Joram aju tcyꞌajal Josafat tuj Judá. 17 Otok japun 32 abkꞌi tuꞌn Joram tej ttzyet tcawin, ex wajxak abkꞌi o cawin tuj Jerusalén. 18 Pero xi lpeꞌ tiꞌj cybinchben ke rey cye aj Israel ex cyiꞌj ke tiyjil Acab, porque o mojeꞌ tucꞌil jun tmeꞌjel Acab; cyjaꞌtzun, aju tbinchben mya baꞌn ela tuj twitz Kman. 19 Pero mintiꞌ tajbe Kman tuꞌn cynaj aj Judá, nok tuꞌnju tcꞌujlalil tiꞌj David, ex tuꞌnju otok txi ttziyan te ka cucx tuꞌn cyten ke tiyjil te rey.
20 Tuj tkꞌijlalil tej tcawin Joram, jaw cyiꞌn cyib aj Edom tiꞌj Judá tuꞌn miꞌn cucx cyten tjakꞌ tcawbil, ex oc cykꞌoꞌn jun cyex cyrey. 21 Xiꞌtzun Joram tuj tnam Zair cyucꞌix cycyakil ke tcarwaj in che ajben tuj kꞌoj, baj cytxolban cyib aj Edom cyiꞌjele. Jawtzun weꞌ Joram te konicꞌan cyucꞌix ke nejenel cye tcarwaj, e oc tzokpaj cyiꞌj aj Edom, pero e jeꞌl ok ke t-soldad Joram ex e aj meltzꞌaj cyja. 22 Cyjaꞌtzun tten etz Edom tjakꞌ tcawbil Judá ex cucx tten jaꞌlo. Ex ax tyemp lu etz tnam Libna tjakꞌ tcawbil Judá.
23 Aju chꞌintl txꞌolbaben tiꞌj Joram ex tiꞌj tcyakilju tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey te Judá. 24 Tejtzun tcyim Joram, cuꞌx makuꞌn cyxol ktzan tman tuj tnam Ttanmi David tbi. Te tibajxi aju o cawin te t-xel, atzun Ocozías aju tcyꞌajal.
Tej ttzyet tcawin Ocozías tuj Judá
25 Otok bant cablaj abkꞌi ttzyetlen tcawin Joram aju tcyꞌajal Acab cyibaj aj Israel, tej ttzyet tcawin Ocozías aju tcyꞌajal Joram aju rey te Judá. 26 Toctok Ocozías twiꞌ 22 abkꞌi tej ttzyet tcawin, ex jun abkꞌi o cawin tuj Jerusalén. Aju ttxuꞌ, Atalía tbi, aju tal tchman Omri, aju otok ten te rey cye aj Israel. 27 Oc lpeꞌ Ocozías tiꞌj tbinchben Acab ex tiꞌj cybinchben ke tiyjil. Mya baꞌn e ela ke tbinchben tuj twitz Kman, tuꞌnju o mojeꞌ tman tucꞌil jun tmeꞌjel Acab.
28 Mojeꞌ tyol Ocozías tucꞌil Joram aju tcyꞌajal Acab, tuꞌn cyxiꞌ kꞌojlel tiꞌj Hazael aju rey te Siria, max tuj tnam Ramot aju at tuj Galaad. Pero o cꞌixbi Joram cyuꞌn aj Siria. 29 Ajtztzun meltzꞌaj Joram tuꞌn tul tuj tnam Jezreel tuꞌn tkꞌanit ẍil tiꞌj, aju otok tzaꞌw cyuꞌn aj Siria tuj tnam Ramot, tuj kꞌoj otok tzꞌoc tucꞌil Hazael aju rey te Siria. Tuꞌnju otok tzaꞌw Joram, xiꞌtzun Ocozías queꞌyilte max tuj tnam Jezreel.