Tej tcawin Ocozías tuj Judá
22
Oc cykꞌoꞌn aj Jerusalén Ocozías aju tchꞌiꞌp Joram te rey te t-xel, porque at jun cꞌloj elekꞌ otok che ul aj junx cyucꞌil aj Arabia, e ocx tuj cycampament soldad, ex e cub cybyoꞌn cycyakil ke tcyꞌajal Joram aju rey cye aj Judá. Cyjaꞌtzun oc Ocozías te rey te t-xel Joram aju ktzan tman. 2 Otok japun Ocozías twiꞌ 22 abkꞌi tej ttzyet tcawin ex o cawin jun abkꞌi tuj Jerusalén. Aju ttxuꞌ Ocozías Atalía tbi, aju tal tchman Omri. 3 Oc lpeꞌ Ocozías tiꞌj tbinchben Acab ex tiꞌj cybinchben ke tiyjil, porque xi tkꞌoꞌn ttxuꞌ consej mya baꞌn te. 4 Tbincha Ocozías aju mya baꞌn tuj twitz Kman ic tzaꞌn otok tbincha Acab ex ke tiyjil, porque tcyimlenxi ktzan tman, ax ke tiyjil Acab e oc ten consejaril te, ex tuꞌn jlu tzaj mya baꞌn tibaj.5 Ex tuꞌntzun cye cyconsej, mojeꞌ tyol Ocozías tucꞌil Joram aju tcyꞌajal Acab aju rey cye aj Israel, tuꞌn cyoc tzokpaj tiꞌj Hazael aju rey cye aj Siria, tuj Ramot aju at tuj Galaad. Pero oc cꞌixbisaꞌn Joram cyuꞌn aj Siria. 6 Ajtzun meltzꞌaj Joram tuj Jezreel tuꞌn tkꞌanit aju ẍil otok tika tuj Ramot tej toc kꞌoj cyuꞌn tucꞌil Hazael aju rey cye aj Siria. Tuꞌnju otok cꞌixbi Joram, cyjaꞌtzun xiꞌ Ocozías visitaril tuj Jezreel.
Cub byoꞌn Ocozías tuꞌn Jehú
7 Banimaj tiꞌj tuꞌn Dios tuꞌn tcyim Ocozías oc t-xiꞌ visitaril Joram. Tejtzun tpon, e jeꞌtz tucꞌix Joram canul tiꞌj Jehú aju tcyꞌajal Nimsi, pero axte Dios otok jaw scꞌonte Jehú tuꞌn cycub baj tbyoꞌn ke tiyjil Acab. 8 Tej in jyontok Jehú cyiꞌj ke tiyjil Acab tuꞌn cycub tbyoꞌn, e cnet ke nejenel tuj Judá tuꞌn, ex ke xjal at cyxilen tucꞌil Ocozías, akeju in che ajbentok ttxlaj, ex e cub byoꞌn ke jlu tuꞌn Jehú. 9 Ax icx xi tmaꞌn tuꞌn t-xi joybaj Ocozías, atzun otok txi tewan tib tuj Samaria, tzyettzun cyuꞌn ex xi cyiꞌn twitz Jehú ex cub cybyoꞌn. Cuꞌxtzun cymakuꞌn porque cyma cyjaꞌ: A jlu tal tchman Josafat aju o jyon tiꞌj Dios tuꞌn tcyakil tanmi. Cyjaꞌtzun cyxol ke tiyjil Ocozías mintiꞌ jun cyaj ten otok tzꞌoc tipun tuꞌn tcawin te t-xel.
Oc tkꞌon tib Atalía te cawil cyibaj aj Judá
10 Tejtzun tbinte Atalía aju ttxuꞌ Ocozías ka otok cyim tal, xi tmaꞌn tuꞌn cycub byoꞌn cycyakil ke cyiyjil rey tuj Judá. 11 Pero ate Josaba aju tmeꞌjel ktzan rey Joram etz kꞌiꞌn Joás tuꞌn cyxol mastl tcyꞌajal rey Ocozías, akeju nibantok cycub byoꞌn, el tewan twitz Atalía ex atzun ocx tkꞌoꞌn tuj jun tal cwart junx tucꞌil ju xuꞌj cwentil te. Cyjaꞌtzun mintiꞌ cub byoꞌn. Atzun jlu o bant tuꞌn Josaba aju tmeꞌjel ktzan rey Joram. Ate Josaba tanb ktzan Ocozías ex t-xuꞌjil pal Joiada. 12 Atzun ocx ewan Joás kak abkꞌi tuj tja Dios junx cyucꞌil cabe xuꞌj lu. Tujtzunju kak abkꞌi lu o cawin Atalía cyibaj aj Judá.