Ex tmatzun Joiada cye: Lu tcyꞌajal rey at tzalu cyxole; atzunju baꞌn tuꞌn toc te rey ic tzaꞌn o tzaj ttziyan Kman cye tiyjil David. 4 Atzun jlu cbantel cyuꞌne akeye pal ex aj Leví, akeye in che ajbene tuj kꞌij te ojlabl: Ox cꞌloj cꞌelel cybaje; jun cꞌloj cbel ten cwentil ttzi tja Dios, 5 ex juntl cꞌloj che tel tuj tja rey, atzun juntl cꞌloj che bel ten ttzi pwert toc tbi Simyent. Ex cycyakiltzun tnam xjal che bel ten cyuj ke ttxaꞌn peꞌn twitz tja Dios. 6 Pero mi jun tuꞌn tocx tuj tja Dios, nok oꞌcx ke pal ex ke aj Leví, akeju ateꞌ tuj cyturn, oꞌcx ake baꞌn tuꞌn cyocx porque cyxjansan cyib, atzun mastl tnam xjal, ax tuꞌn cycyaj ten ttxaꞌn peꞌn ic tzaꞌn in tmaꞌn tley Kman. 7 Ex atzun ke aj Leví cbel cytxolban cyib tiꞌjele rey, ex teylex te junjun kꞌiꞌmlex tmacbil in ajben tuj kꞌoj, ex ka at jun xjal taj tzꞌocx tuj tja Kman, cymel. Ex che xeꞌle tucꞌil rey nok jatum oc t-xiꞌ, chi Joiada.

8 Ke aj Leví ex ke xjal aj Judá o cybincha tcyakilju xi kꞌmaꞌn cye tuꞌn pal Joiada. Ex teylex te junjun nejenel e oc tchmoꞌn ke xinak ateꞌ tuj tcwent, tzaꞌnx keju in che ocx tuj cyturn tuj kꞌij te ojlabl, ax icx keju in che etz, porque ate pal Joiada mintiꞌ xi tkꞌoꞌn ambil cye tuꞌn cyaj cyja. 9 Xitzun tkꞌoꞌn pal Joiada ke lans ex ke makbil ma tij cyucꞌix ke tal chꞌin cye ke capitán akeju at jun syentchak soldad tuj cycwent. Ake jlu tetok David tnejel ex atzun ateꞌtok tuj tja Dios. 10 Ex e cub ttxolbaꞌn cycyakil tnam xjal tuj tcyakil ttxaꞌn peꞌn twitz tja Dios tiꞌjele altar, ex teylex te junjun kꞌiꞌmlex t-spad tuꞌn cycwentin tiꞌj rey. 11 Atzunte Joiada cyucꞌix ke tcyꞌajal etz cyiꞌn tcyꞌajal rey, jax cykꞌoꞌn jun coron tuj twiꞌ, xi cykꞌoꞌn jun tuꞌjil tley Dios tuj tkꞌab, jax cykoꞌn aseyt tuj twiꞌ ex oc cykꞌoꞌn toclen te rey. Cycyakiltzun e jaw schꞌin in cymaꞌn: Baꞌnwit tzꞌel tkꞌija, aya Rey.

12 Tejtzun tbinte Atalía tkꞌajkꞌajel cywi xjal in che tꞌicpaj tuꞌn tzalajbil ex in che schꞌintok twitz rey, xiꞌtzun jatum ateꞌtok cycyakil xjal twitz tja Dios. 13 O til, lu rey waꞌl tcub t-xe tkan adorn ttxlaj ttzi tja Dios, ex lu ke nejenel ex ke kꞌajtzal chnab ateꞌ ttxlaj. Ke xjal in che tzalaj wen, in che kꞌajtzantok chun, ex ke bitzal kꞌiꞌmlex chnab cyuꞌn in jaw nej cywiꞌ cyiꞌj ke bitz te nimbil. Eltzun t-sbitꞌun Atalía t-xbalun ex jaw schꞌin cyjaꞌ:

—Ma che oc meltzꞌaje wiꞌje, ma che oc meltzꞌaje wiꞌje.

14 Pero xi tmaꞌn pal Joiada cye ke capitán cye soldad:

—Cyiꞌmexe cyxol xjal, ex ka at jun ma tzꞌoc ten colol tiꞌj, cybyoncuye tuꞌn spad, chi Joiada. Porque otok txi tmaꞌn pal cye tuꞌn miꞌn tcub cybyoꞌn ax tuj tja Dios. 15 Tzajtzun cytzyuꞌn ex tejtzun cypon jatum nnoꞌcx be ttzi cyja chej ttxlaj tja rey, axtzun cub cybyoꞌn.

16 Te tibajxi jlu, bant tiꞌj jun tyol Joiada cyucꞌil cycyakil tnam xjal, ax icx tucꞌil rey, tuꞌn cyoc te jun tnam etzan tuꞌn Dios. 17 E jeꞌxtzun cycyakil tuj tja tilbilal cydios xjal Baal tbi ex biꞌx cub cyxitun ja, ax icx baj cykꞌuchin ke altar ex baj cypaẍuꞌn ke tilbilal, atzunte Matán aju pal te Baal, cub cybyoꞌn cywitz ke altar. 18 Te tibajxi jlu e cub tkꞌoꞌn Joiada ke xkꞌukil tuj tja Kman, cycyajsaꞌn ke tjakꞌ cycawbil ke pal ex ke aj Leví, akeju otok che baj paꞌn tuj cyturn tuꞌn David tuꞌn cyajben tuj tja Kman, tuꞌn t-xi cykꞌoꞌn ke chojbil patun in che cub te Kman, ic tzaꞌn tzꞌibamaj tuj tley Moisés ex ic tzaꞌn cyaj tmaꞌn David, tuꞌn t-xi cykꞌoꞌn tucꞌil tzalajbil ex bitz. 19 Ax icx e cub tkꞌoꞌn ke xjal xkꞌukil ttzi tja Kman, tuꞌntzun mi jun xjal tuꞌn tocx ka otok tzicꞌ tibaj tley Moisés. 20 Te tibajxitzun jlu e tzaj ttxcoꞌn ke capitán, akeju at jun syentchak soldad tuj cycwent, ke xjal maꞌ cyoclen, ke gobernador te tnam ex cycyakil xjal, tuꞌn tex cyiꞌn rey tuj tja Kman, tuꞌntzun tpon cyiꞌn tuj tja rey. Atzun e ocx tuj pwert tcub te jawni ex ocxtzun cykꞌoꞌn tuj kꞌukbil te cawbil. 21 Ex cycyakil tnam xjal e jaw tzalaj, ex tuꞌnju otok cyim Atalía tuꞌn spad, cyjaꞌtzun cycyakil tnam xjal e cyaj ten tuj txubtxaj.