4 Te tibajxi cub t-ximan Joás tuꞌn t-xi tbinchaꞌn tja Kman. 5 E oc tchmoꞌn ke pal ex ke aj Leví ex xi tmaꞌn cye cyjaꞌ: Cyxiꞌye cyuj ke tnam ateꞌ tuj Judá, ex cychmon jawe pwak cyxol cycyakil aj Israel, aju at tuꞌn tchjet cyuꞌn tcyakil abkꞌi, tuꞌntzun t-xi binchet tja Dios. Cykꞌoꞌnque tilil tiꞌj jlu, chi Joás; atzun cye aj Leví mintiꞌ oc cykꞌoꞌn tilil. 6 Tzajtzun txcoꞌn Joiada aju tnejel pal tuꞌn rey, ex xi tmaꞌn te cyjaꞌ:

—¿Tikuꞌn mintiꞌ nnoꞌc il tiꞌj tuꞌna tuꞌn ttzaj cyiꞌn ke aj Leví cyoyaj xjal ateꞌ tuj Judá ex tuj Jerusalén, aju cyaj bant tiꞌj tuꞌn Moisés aju tmajen Dios, cyucꞌil aj Israel, tuꞌn tajben tiꞌj ja jatum cꞌuꞌn ju yol cyaj bant tiꞌj tuꞌn Dios cyucꞌil? Chi rey.

7 Porque ate Atalía, aju jumajx mya baꞌn tmod, cyucꞌix ke tal, otok che ocx tuj tja Dios ex otok tzꞌetz cyelkꞌaꞌn tcyakil tiꞌxti in che ajben tuj cꞌulbil, akeju ateꞌcx tuj tja Dios, ex atzun ajben cyuꞌn cye ke tilbilal Baal, aju nnoꞌc cydiosin. 8 Xitzun tmaꞌn rey tuꞌn tbant jun cax, ex cub cykꞌoꞌn tetz tiꞌjtzi tpwertil tja Kman. 9 Extzun tkanil cyuꞌn tuj tcyakil txꞌotxꞌ Judá ex tuj tnam Jerusalén, tuꞌn ttzaj cyiꞌn xjal chojenj te Kman, aju otok txi tmaꞌn Moisés aju tmajen Dios cye aj Israel tuj lugar tzkij txꞌotxꞌ. 10 Cycyakiltzun ke nejenel ex cycyakil tnam xjal e pon kꞌolte cyoyaj tucꞌil tzalajbil tuj cax, tejxi tnoj cyuꞌn. 11 Tcyakil maj oc t-xi cyiꞌn aj Leví aju cax cyucꞌil ke xjal at cyoclen ttxlaj rey tuꞌn ticꞌ cywitz tiꞌj, ex octzun cyqueꞌyinte ka ya attok nim pwak tuj, in pontzun aju aj tzꞌibal te rey tucꞌix ju xjal at toclen tuꞌn tnejel pal, cꞌmolte pwak, in jatz cyiꞌn ex in xi cyiꞌn aju cax tuꞌn tcub cykꞌoꞌn juntl maj jatum tcub. Cyjaꞌtzun in bant cyuꞌn tcyakil maj ex nimxix pwak chmet cyuꞌn. 12 Atzunte rey tucꞌix pal Joiada xi cykꞌoꞌn pwak lu cye keju cycyajsaꞌn te nejenel tiꞌj akꞌuntl tiꞌj tja Kman, tuꞌn t-xi cychjoꞌn twi cycꞌuꞌj ke albañil ex ke calpinter, tuꞌn t-xi cybinchaꞌn tja Kman, ex tuꞌn cychjet ke majen baꞌn che akꞌnan tiꞌj cꞌuxbil ex tiꞌj kꞌan cꞌuxbil, tuꞌntzun t-xi cybinchaꞌn tja Kman. 13 Ke nejenel tiꞌj akꞌuntl e oc ten akꞌnal cyuwxix ex baj cybinchaꞌn tja Kman ic tzaꞌnx tten tnejel, ex aju tja Kman cyaj ten tuj segurxix. 14 Tejtzun tbaj bant akꞌuntl cyuꞌn, xi cyiꞌn aju pwak cyaj sobryin tucꞌil rey ex tucꞌil Joiada, ex atzun cye xi cymaꞌn tuꞌn cybaj binchet ke macbil tuꞌn cyajben tuj tja Kman, tzaꞌnx ke macbil in che ajben oc cyoc ke cꞌulbil, ax icx keju in che ajben tuꞌn cyxi kꞌot ke chojbil patun in che cub, ex ke pacꞌ ex ke mastl macbil puro kꞌan pwak ex sak pwak cytxꞌotxꞌil. Acux itzꞌxtok pal Joiada, cucx xi cykꞌoꞌn ju chojbil patun in cub twitz tja Kman.

15 Otok tijin Joiada wen ex otok tzꞌel nim abkꞌi tuꞌn. Otok japun jun syent tucꞌil 30 abkꞌi tuꞌn tej tcyim. 16 Cuꞌxtzun cymakuꞌn tuj tnam toc tbi Ttanmi David, junx cyxol ke rey otok che cyim, porque baꞌn otok tbincha cyucꞌil aj Israel ex otok tzꞌajben tuj takꞌun Dios ax icx tiꞌj tja Dios.

17 Tcyimlenxitzun Joiada e pon ke nejenel cye aj Judá tucꞌil rey ex xi cymaꞌn tuꞌn cyniman te, atzunte rey xi tbiꞌn aju o cyma, 18 cyajtzun cycolin aju tja Kman aju Cydios ktzan cyxeꞌchel, ex e oc ten cꞌulul cywitz ke tilbilal xuꞌj dios Asera ex cywitz txkantl tilbilal. Tuꞌntzun jlu tzaj tkꞌoj Kman cyiꞌj aj Judá ex cyiꞌj aj Jerusalén. 19 Cyjaꞌtzun tzaj t-samaꞌn Kman ke t-sanjel cyucꞌil, tuꞌn cyaj meltzꞌaj juntl maj tucꞌil, pero ke xjal mintiꞌ xi cybiꞌn aju yol xi kꞌmaꞌn cye cyuꞌn t-sanjel Dios.

20 Ultzun T-xew Dios tucꞌil Zacarías aju tcyꞌajal ktzan pal Joiada, cub weꞌ cywitz tnam xjal ex tma cyjaꞌ: Chitzun Dios ma tma: ¿Tikuꞌn mintiꞌ in xi cynimane ke nmandamyente? ¿Tikuꞌn cyuꞌnxe in tzaj cyiꞌne mya baꞌn cyibaje? Tuꞌnju ma chin cyaj cycoline, ax icx weye che cyjel ncoline chi Dios, chi Zacarías.

21 Atzun cye xjal mojeꞌ cyyol tuꞌn cyoc tzokpaj tiꞌj Zacarías, ex xi tmaꞌn rey tuꞌn toc cyxoꞌn tuꞌn abj ttxaꞌn tpeꞌn tja Kman. 22 Icꞌ tnaꞌl tuꞌn rey Joás aju xtalbil binchanjtz te tuꞌn Joiada aju ktzan tman Zacarías, ex cub byoꞌn Zacarías aju tcyꞌajal Joiada tuꞌn Joás. Tej chꞌixtok tcyim jaw tkꞌajkꞌajel twiꞌ ex tma cyjaꞌ: Awt Kman tzaj queꞌyinte jlu ex tuꞌn t-xelin cyiꞌje ic tzaꞌnx ma cybinchaye.

23 Tbajlenxi jun abkꞌi e oc tzokpaj ke soldad aj Siria tiꞌj Joás, e ocx tuj Judá ex tuj Jerusalén, cub cybyoꞌn cycyakil ke nejenel cye tnam xjal ex tcyakil tiꞌxti ex cyiꞌn, xi cysamaꞌn tucꞌil rey cye aj Damasco. 24 Ke aj Siria nicꞌxi cybaj e pon, pero tuꞌn Kman cub cyiꞌj txkan soldad nimxix cybaj cyuꞌn, tuꞌnju otok tzꞌel cypaꞌn cyib aj Judá tiꞌj Kman aju Cydios ktzan cyxeꞌchel. Cyjaꞌtzun tten cub tcastiw Joás.

25 Tejtzun cyaj meltzꞌaj aj Siria, ate Joás nim te otok tzaꞌw tuj kꞌoj, ex atzun ke xjal at cyoclen ttxlaj jaw cyiꞌn cyib tiꞌj, tuꞌn t-xelin cyuꞌn tuꞌnju tcublen tbyoꞌn tcyꞌajal pal Joiada; cyjaꞌtzun cub cybyoꞌn ax twi twatbil. Cuꞌxtzun makuꞌn Joás cyuꞌn tuj tnam toc tbi Ttanmi David, pero mintiꞌ ocx kꞌoꞌn tuj cypantyón ke rey. 26 Akeju jaw cyiꞌn cyib tiꞌj Joás, atzun ke jlu: Zabad aju tal Simeat, aju aj Amón, ex Jozabad aju tal Simrit, aju aj Moab.

27 Aju yol tzꞌiban cyiꞌj ke tcyꞌajal Joás ex tiꞌj nimcu yol o cyma ke t-sanjel Dios tiꞌj, ex tiꞌj tjawlen tbinchaꞌn tja Dios; tcyakil jlu atzun tzꞌiban cyuj ke uꞌj jatum taꞌ tcyakil txꞌolbaben cyiꞌj cyakꞌunben ke rey. Te tibajxi, aju o cawin te t-xel, atzun Amasías aju tcyꞌajal.