4 At jun kꞌij xi tmaꞌn Joás cye ke pal cyjaꞌ:

—Cychmoꞌn jawe tcyakil pwak aju nnuꞌl cyiꞌn xjal te cyoyaj tuj tja Kman, tucꞌix chojenj cchjetel tuꞌn junjun xjal, cyucꞌix ke oyaj nnuꞌl cyiꞌn xjal tuꞌn cyex cygan tuj tja Kman. 5 Ex teyle junjun chmol pwak baꞌn tuꞌn t-xi tkꞌoꞌn pwak lu cye pal, tuꞌntzun tajben tuꞌn t-xi binchet tja Kman.

6 Pero tej lajoꞌntok 23 abkꞌi ttzyetlen tcawin Joás, naꞌnxtok t-xi cybinchaꞌn pal tja Kman. 7 Tzajtzun ttxcoꞌn rey Joás aju pal Joiada cyucꞌix txkantl pal ex xi tmaꞌn cye:

—¿Tikuꞌn naꞌnx t-xi cybinchaꞌne tja Kman? Jaꞌlo miꞌn tzaj cycꞌmoꞌne mastl pwak cye chmol pwak; alcye at pwak tucꞌil, baꞌn tuꞌn t-xi tkꞌoꞌn tuꞌn t-xi binchet tja Kman.

8 Baꞌn ela tuj cywitz pal tuꞌn miꞌn ttzaj cycꞌmoꞌn mastl pwak cye xjal, ex tuꞌn miꞌn tcyaj ten tuj cycwent tuꞌn t-xi binchet tja Kman. 9 Tzajtzun tiꞌn pal Joiada jun cax, cuꞌx tkꞌoꞌn jun toyꞌ tibaj tmaksil ex cub tkꞌoꞌn tuj tbankꞌab altar ttzi tja Kman; ex akeju pal in che xkꞌukintok ttzi tja Kman, atzun in cuꞌx cykꞌoꞌn tcyakil pwak aju in pon kꞌiꞌn tuj tja Kman. 10 Octzun tcyil ka attok nim pwak tuj cax, in pontzun aju aj tzꞌibal te rey ex tucꞌix tnejel pal, ex in bajtzun cyajlaꞌn pwak aju otok chmet tuj tja Kman, ex in cuꞌxtzun cykꞌoꞌn tuj junjun bols, 11 ex oꞌcx oc in baj cyajlaꞌn pwak, biꞌx in xi cykꞌoꞌn cye ke nejenel tiꞌj akꞌuntl tiꞌj tja Kman, tuꞌntzun t-xi cychjoꞌn ke calpinter ex ke nejenel cye akꞌnal in che akꞌnan tiꞌj tja Kman, 12 ex tuꞌn t-xi cychjoꞌn ke albañil cyucꞌix ke xpeꞌlil abj, ex tuꞌn cylakꞌet ke tzeꞌ ex ke abj xpeꞌlimaj cywitz, tuꞌntzun t-xi binchet tja Kman, ex tuꞌn tajben tiꞌj mastl tiꞌxti at tajben tiꞌj ja. 13 Pero aju pwak in pon kꞌiꞌn tuj tja Kman mintiꞌ ajben tuꞌn cycub binchet ke copa sak pwak cytxꞌotxꞌil, mi ke matzbil, mi ke lak nmak, mi ke chun ex mi ke mastl macbil kꞌan pwak ex sak pwak cytxꞌotxꞌil, 14 nok oꞌcx xi kꞌoꞌn cye ke nejenel tiꞌj akꞌuntl tuꞌn t-xi binchet tja Kman. 15 Mintiꞌ xi kanin jun tajlal cye ke xinak, akeju xi kꞌoꞌn pwak cye tuꞌn t-xi cychjoꞌn ke akꞌnal, porque in cybinchaꞌn tcyakil tuj tumelxix. 16 Ex atzunju pwak in tzaj kꞌoꞌn te chojbil tiꞌj cybinchben xjal mya baꞌn ex tiꞌj il, mintiꞌ in xi kꞌiꞌn tuj tja Kman, porque atzun jlu in ajben cye pal.

17 Tuj tkꞌijlalil lu, oc tzokpaj Hazael aju rey te Siria tiꞌj tnam Gat, ex tzyet tuꞌn, ex te tibajxi xiꞌ tuꞌn toc tzokpaj tiꞌj tnam Jerusalén. 18 Pero ate Joás aju rey te Judá, e tzaj tiꞌn cycyakil ke macbil xjansaꞌmaj, akeju e jeꞌx kꞌoꞌn tuꞌn cyajben tuj cꞌulbil tuꞌn rey Josafat, tuꞌn Joram ex tuꞌn Ocozías, akeju t-xeꞌchel otok che cawin tuj Judá, ax icx e tzaj tiꞌn akeju te otok cheꞌx tkꞌoꞌn, tucꞌix tcyakil kꞌan pwak cnet tuꞌn cyxol ke kꞌinumabl tuj tja Kman ex cyucꞌix keju ateꞌ tuj tja rey, tcyakiltzun jlu xi tkꞌoꞌn te Hazael; cyjaꞌtzun xi tcolin Hazael tuꞌn toc tzokpaj tiꞌj Jerusalén.

19 Aju chꞌintl txꞌolbaben tiꞌj Joás ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Judá. 20 Ax ke xjal at cyoclen ttxlaj bant tiꞌj cyuꞌn tuꞌn tjaw cyiꞌn cyib tiꞌj, ex atzun cub cybyoꞌn tuj ja at tuj lugar Milo, tuj be in xiꞌ tuj lugar Sila. 21 Ate Josacar aju tcyꞌajal Simeat, tucꞌix Jozabad aju tcyꞌajal Somer, akeju at cyoclen ttxlaj, atzun ke e cub byonte te Joás. Tejtzun tcyim, atzun cuꞌx makuꞌn tuj tnam Ttanmi David tbi. Te tibajxi aju o cawin te t-xel, atzun Amasías aju tcyꞌajal.