Tej tcawin Joacaz cyibaj aj Israel
13
Lajoꞌntok 23 abkꞌi ttzyetlen tcawin Joás aju tcyꞌajal Ocozías tuj Judá, tej ttzyet tcawin Joacaz aju tcyꞌajal Jehú cyibaj aj Israel, ex o cawin wuklaj abkꞌi tuj Samaria. 2 Pero aju tbinchben puro mya baꞌn e ela tuj twitz Kman, porque cucx o binchan il ic tzaꞌn o tbincha Jeroboam aju tcyꞌajal Nabat, akeju e binchan aj Israel il tuꞌn, ex mintiꞌ el tpaꞌn tib cyiꞌj. 3 Cyjaꞌtzun tzaj tkꞌoj Kman cyiꞌj aj Israel, ex nim tyemp e jeꞌx tkꞌoꞌn tuj tkꞌab Hazael aju rey te Siria, ex tuj tkꞌab Ben-adad aju tcyꞌajal Hazael.4 Octzun ten Joacaz naꞌl Dios, ex tzaj tbiꞌn Kman aju tnaꞌj Dios, porque o til tzaꞌn tten in yajlantok rey te Siria cyiꞌj aj Israel. 5 Tzaj tkꞌoꞌn Kman jun colol cyiꞌj aj Israel, ex cyjaꞌtzun tten e clet tuj tkꞌab rey te Siria, ex e ajtzun meltzꞌaj aj Israel cyja in che tzalaj wen ic tzaꞌn nej. 6 Masque icju, pero mintiꞌ el cypaꞌn cyib cyiꞌj ke il cybincha ke tiyjil Jeroboam, akeju e binchan aj Israel il tuꞌn, nok oꞌcx cucx e binchan il, ex aju tilbilal xuꞌj dios Asera ax o tenba tuj Samaria.
7 Ya mya nimtl t-soldad Joacaz cyaj ten, nok oꞌcx 50 soldad cyjaxsaꞌn cyibaj chej, cyucꞌix laj carwaj in che ajben tuj kꞌoj, ex cyucꞌix laj mil soldad in che bet tuꞌn cykan, porque aju rey te Siria otok che baj tbyoꞌn ke txkantl soldad, ex te jumajx otok che naj tuꞌn.
8 Aju chꞌintl txꞌolbaben tiꞌj Joacaz ex tiꞌj tcyakilju o tbincha, ex cyiꞌj ke tbinchben maꞌxix cyxilen, atzun tzꞌiban tuj uꞌj jatum taꞌ tcyakil txꞌolbaben cyiꞌj cybinchben ke rey cye aj Israel. 9 Tejtzun tcyim, atzun cuꞌx makuꞌn tuj Samaria. Te tibajxi aju o cawin te t-xel, atzun Joás aju tcyꞌajal.
Tej ttzyet tcawin Joás cyibaj aj Israel
10 Otok bant 37 abkꞌi ttzyetlen tcawin Joás aju rey te Judá, tej ttzyet tcawin Joás aju tcyꞌajal Joacaz cyibaj aj Israel, ex kaklaj abkꞌi o cawin tuj Samaria. 11 Pero mya baꞌn e ela ke tbinchben tuj twitz Kman, porque mintiꞌ el tpaꞌn tib tiꞌj tcyakil il tbincha Jeroboam aju tcyꞌajal Nabat, aju e binchan aj Israel il tuꞌn, nok oꞌcx cucx o binchan il.
12 Aju chꞌintl txꞌolbaben tiꞌj Joás ex tiꞌj tcyakil aju o tbincha, ex cyiꞌj ke tbinchben maꞌxix t-xilen, ex tiꞌj tzaꞌn tten o kꞌojin tiꞌj Amasías aju rey te Judá, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 13 Tejtzun tcyim Joás, atzun cuꞌx makuꞌn tuj Samaria jatum makuꞌn ke mastl rey cye aj Israel. Te tibajxi aju o cawin te t-xel, atzun Jeroboam.
Mancbil yol xi tmaꞌn Eliseo ex ju tcyimlen
14 Yabtok Eliseo ex chꞌixtok tcyim; xiꞌtzun Joás aju rey cye aj Israel queꞌyilte, ex oc ten okꞌel tiꞌj, tzaj tchleꞌn, ex tma:
—Tat, tat, ic ma tena cye aj Israel ic tzaꞌn jun cꞌloj soldad at nim cyipumal, porque ma colina cyiꞌj.
15 Xitzun tmaꞌn Eliseo te:
—Kꞌintza junjun plech tucꞌix xobl cye.
—Bincham ttena tuꞌn t-xi t-xoꞌna jun plech.
—Jakoꞌn octza ventan tlugaril tjawitz kꞌij.
Octztzun tjakoꞌn rey ventan, atzunte Eliseo xi tmaꞌn te:
—Jaꞌlo xoꞌnxtzuna plech tuꞌn xobl te.
Xitzun t-xoꞌn rey plech tuꞌn xobl te. Atzunte Eliseo jaw tkꞌajkꞌajel twiꞌ ex tma:
—Aju plech lu, atzun in yolin tiꞌj colbil tzul tkꞌoꞌn Kman tuꞌn tcub cyiꞌj aj Siria. Cbel cyiꞌj aj Siria tuꞌna tuj tnam Afec, ex cycyakil che bel tbyoꞌna.
18 Te tibajxi xi tmaꞌntl Eliseo te rey:
—Tzyuma ke plech.
Tejtzun ttzaj ttzyuꞌn rey, xi tmaꞌn Eliseo te:
—Jaꞌlo pekꞌan cuba twitz txꞌotxꞌ.
Cubtzun tpekꞌan rey ox maj twitz txꞌotxꞌ, ex mintiꞌtl cub tpekꞌan. 19 Tzajtzun tkꞌoj t-sanjel Dios tiꞌj rey, ex xi tmaꞌn te:
—Nokwit ma cub tpekꞌana jweꞌ maj ex ka kak maj twitz txꞌotxꞌ, ocwitlo che bel baj cycyakil aj Siria tuꞌna; pero jaꞌlo nok ox maj cbel cyiꞌj tuꞌna, chi Eliseo.
20 Cyimtzun Eliseo ex cuꞌx makuꞌn. Ex tuꞌnju tcyakil abkꞌi in che ul aj aj Moab elkꞌal tuj cytanmi aj Israel, 21 at jun maj at junjun aj Israel in che makuntok tiꞌj jun cyimni, tej t-xi cyqueꞌyin cyjaꞌtok cytzaj jun cꞌloj elekꞌ aj Moab; axtzun ocx cyxoꞌn naj ju cyimni tuj pantyón jatum tocx t-ximlal Eliseo ex cub be cyuꞌn. Pero tej tpon tacl t-ximlal cyimni cyiꞌj tbakil Eliseo, biꞌx ul tnabl ex jaw weꞌ.
22 Oc ten Hazael aju rey te Siria yajlal cye aj Israel tej itzꞌxtok Joacaz. 23 Pero ate Kman at tkꞌakꞌbil tcꞌuꞌj ex tzaj tzꞌeꞌy tcꞌuꞌj cyiꞌj, nok tuꞌn tlaj aju yol otok txi ttziyan te Abraham, te Isaac ex te Jacob. Cyjaꞌtzun mintiꞌ e naj tuꞌn ex mintiꞌ e ex tlajoꞌn, ax icx jaꞌlo naꞌnx tbant tuꞌn icju.
24 Tejtzun tcyim Hazael aju rey te Siria, aju o cawin te t-xel, atzun Ben-adad aju tcyꞌajal. 25 Atzunte Joás aju tcyꞌajal Joacaz e el tiꞌn ke tnam, akeju otok che el tiꞌn Ben-adad te Joacaz aju ktzan tman tej toc kꞌoj. Ox maj cub tiꞌj Ben-adad tuꞌn Joás, ex el tiꞌn ke tnam te, akeju cyetok aj Israel nej.