5 Tejtzun tocxix tipun Amasías tuj tcawbil, e cub tbyoꞌn ke xjal at cyoclen akeju otok che cub byonte ktzan tman. 6 Pero mintiꞌ e cub tbyoꞌn ke cycyꞌajal ke xjal otok che cub byonte ktzan tman, porque ictzun in tmaꞌn tuj tley Moisés aju tzaj tmaꞌn Kman cyjaꞌ: Ke mambaj mlay che cub byoꞌn tuꞌn tlaj il otok cybincha cycꞌwaꞌl, ex mi ke cꞌwaꞌlbaj mlay che cub byoꞌn tuꞌn tlaj cyil cyman; nok oꞌcx teyle junjun cnajel tuꞌn tlaj tex til.

7 Ate Amasías aju cub byonte laj mil aj Edom tuj chkꞌajlaj toc tbi Chkꞌajlaj te Atzꞌan, ex tzyet tnam Sela tuꞌn, oc tkꞌoꞌn tbi tnam lu Jocteel, ex axtzun tbi tocsaꞌn jaꞌlo.

8 Te tibajxi jlu, xi t-samaꞌn Amasías jun tkanil te Joás aju tcyꞌajal Joacaz ex tal tchman Jehú, aju rey cye aj Israel, ex chi xi tmaꞌn cyjaꞌ: Tzaja ex ko kꞌojin. 9 Atzunte Joás xi t-samaꞌn ju tzakꞌwebl lu: Aju tal chꞌiꞌx cꞌul xi tmaꞌn te tzeꞌ wiꞌten at twi witz Líbano: Kꞌontza tmeꞌjela te ncyꞌajale tuꞌn toc te t-xuꞌjil, chi chꞌiꞌx cꞌul, pero icꞌ jun txcup te tjakꞌ cꞌul ma chixin ex baj waban tal chꞌiꞌx cꞌul tuꞌn. 10 Ax toc o cub cyiꞌj aj Edom tuꞌna, ex tuꞌntzun jlu in jaw tniman tiba. Baꞌn, niman jaw tiba; pero mas baꞌn ax tencja tjaya. ¿Tikuꞌn taja tuꞌn ttzaj tiꞌna mya baꞌn tibaja ex cyibaj aj Judá?

11 Atzunte Amasías mintiꞌ xi tbiꞌn. Cubtzun be tuꞌn Joás ex oc tzokpaj tiꞌj Amasías max tuj tnam Bet-semes, aju tcubsaꞌn tuj cytxꞌotxꞌ aj Judá. 12 Ex ake aj Judá cub cyiꞌj cyuꞌn aj Israel, ex teyle junjun xi ok tja. 13 Ocx presin Amasías aju rey cye aj Judá tuj Bet-semes, tuꞌn Joás aju rey cye aj Israel. Ex xiꞌtzun Joás tuj Jerusalén, atzun ocx tcꞌobin jun toyꞌ muro te wajxak ech twitz, tzajx keꞌ jatum taꞌ Pwert te Efraín tbi ex pon baj max jatum taꞌ Pwert te Escyin tbi. 14 Ax icx etz tiꞌn tcyakil kꞌan pwak tucꞌix sak pwak, cyucꞌix cycyakil ke macbil ateꞌ tuj tja Kman, ex cyucꞌix ke kꞌinumabl ateꞌ tuj tja rey. Te tibajxi, tej cytzyetlen junjun xjal maꞌ cyoclen tuꞌn, e jeꞌx tiꞌn tucꞌil ex ajtzun meltzꞌaj juntl maj tuj tnam Samaria.

15 Aju chꞌintl txꞌolbaben tiꞌj Joás ex tiꞌj tcyakilju o tbincha, ex cyiꞌj ke tbinchben maꞌxix cyxilen, tucꞌix ju kꞌoj oc tuꞌn tucꞌil Amasías aju rey te Judá, atzun tzꞌiban tuj uꞌj jatum taꞌ tcyakil txꞌolbaben cyiꞌj cybinchben rey cye aj Israel. 16 Tejtzun tcyim Joás, ax cuꞌx makuꞌn tuj Samaria jatum makuꞌn ke rey cye aj Israel. Te tibajxi aju o cawin te t-xel, atzun Jeroboam aju tcyꞌajal.

17 Ate Amasías aju tcyꞌajal Joás, aju rey te Judá, o ankꞌintl olaj abkꞌi te tibajxi tej tcyimlen Joás aju tcyꞌajal Joacaz, aju rey cye aj Israel. 18 Aju chꞌintl txꞌolbaben tiꞌj Amasías, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Judá. 19 Bant tiꞌj cyuꞌn xjal tuꞌn tjaw cyiꞌn cyib tiꞌj Amasías tuj Jerusalén, ex xi ok tuj tnam Laquis, pero e jeꞌx lpeꞌ xjal tiꞌj max tuj tnam lu, ex maxtzun cub cybyoꞌn. 20 Jaxtzun cykꞌoꞌn t-ximlal tibaj jun chej cabay tuꞌn t-xi cyiꞌn tuj Jerusalén, ex cuꞌx cymakuꞌn cyxol ktzan t-xeꞌchel tuj tnam Ttanmi David tbi. 21 Cycyakiltzun tnam xjal aj Judá tzaj kꞌiꞌn Azarías cyuꞌn tej otok japun kaklaj abkꞌi tuꞌn, ex oc cykꞌoꞌn te rey te t-xel Amasías aju ktzan tman. 22 Jaw tbinchaꞌn Azarías juntl maj ju tnam Elat tcyimlenxi ktzan tman, ex oc juntl maj te cye aj Judá.

23 Otok bant olaj abkꞌi ttzyetlen tcawin Amasías aju tcyꞌajal Joás, aju rey te Judá, tej ttzyet tcawin Jeroboam aju tcyꞌajal Joás cyibaj aj Israel, ex 41 abkꞌi o cawin tuj Samaria. 24 Pero aju tbinchben Jeroboam mya baꞌn e ela tuj twitz Kman, porque mintiꞌ el tpaꞌn tib tiꞌj il tbincha Jeroboam aju tcyꞌajal Nabat, aju e binchan ke aj Israel il tuꞌn.

25 Tzyet juntl maj cytxꞌotxꞌ aj Israel tuꞌn Jeroboam, aju otok tzꞌel cyiꞌn aj kꞌoj nej. Tzajx keꞌ jatum taꞌ tnam Hamat ex pon baj max ttzi mar at tuj chkꞌajlaj Arabá, ic tzaꞌnx otok tma Kman aju Cydios aj Israel te Jonás aju tmajen, aju tcyꞌajal Amitai, aju t-sanjel Dios lu aj Gat-hefer. 26 Porque o til Kman aju yajbil cyuwxix cye aj Israel, ex mi aꞌltok jun in onin cyiꞌj aj Israel. 27 E clettzun ke tuꞌn Kman nok tuꞌn Jeroboam aju tcyꞌajal Joás, porque naꞌnxtok tcub t-ximan Kman tuꞌn cybaj naj aj Israel twitz txꞌotxꞌ.

28 Aju chꞌintl txꞌolbaben tiꞌj Jeroboam ex tiꞌj tcyakilju o tbincha, ex cyiꞌj ke tbinchben maꞌxix cyxilen, ex cyiꞌj ke kꞌoj e oc tuꞌn, ex tiꞌj tzaꞌn tten tzyet tnam Damasco tuꞌn, tucꞌix tnam Hamat, tuꞌn toc te cye aj Israel, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. Akeju tnam Damasco ex Hamat cyetok aj Judá nej. 29 Tejtzun tcyim Jeroboam, atzun cuꞌx cymakuꞌn jatum makuꞌn ke rey cye aj Israel. Te tibajxi aju o cawin te t-xel, atzun Zacarías aju tcyꞌajal.