3 Baꞌn e ela ke tbinchben Azarías tuj twitz Kman, ic tzaꞌnx ke tbinchben Amasías aju ktzan tman. 4 Masque icju, pero mintiꞌ e jeꞌl tiꞌn ke ja te cycꞌulbil xjal cywiꞌ ke witz, jatum cucx xi cykꞌoꞌn xjal ke chojbil ex cucx cub cypatun storac. 5 Cub tkꞌoꞌn Kman jun tcastiw rey ex o yabt tuꞌn txꞌaꞌc mintiꞌ kꞌanbil tiꞌj, cyjaꞌtzun o ten rey tuj jun ja tjunalx, atzunte Jotam aju tcyꞌajal cyaj ten te t-xel, ex o cawin cyibaj tnam xjal. Yabxtok Azarías tuꞌn txꞌaꞌc lu tejxi tcyim.

6 Aju chꞌintl txꞌolbaben tiꞌj Azarías ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Judá. 7 Tejtzun tcyim Azarías, atzun cuꞌx makuꞌn jatum makuꞌn ke ktzan t-xeꞌchel tuj tnam Ttanmi David tbi. Te tibajxi aju cawin te t-xel, atzun Jotam aju tcyꞌajal.

8 Otok bant 38 abkꞌi ttzyetlen tcawin Azarías aju rey te Judá, tej ttzyet tcawin Zacarías aju tcyꞌajal Jeroboam cyibaj aj Israel, ex o cawin kak xjaw tuj Samaria. 9 Mya baꞌn e ela ke tbinchben tuj twitz Kman ic tzaꞌnx cybinchben ke t-xeꞌchel, porque mintiꞌx el tpaꞌn tib cyiꞌj ke il tbincha Jeroboam aju tcyꞌajal Nabat, aju e binchan aj Israel il tuꞌn.

10 Atzunte Salum aju tcyꞌajal Jabes jaw tiꞌn tib tiꞌj, ex oc tzokpaj tiꞌj tuj tnam Ibleam ex cub tbyoꞌn; te tibajxi ax o cawin te t-xel.

11 Aju chꞌintl txꞌolbaben tiꞌj Zacarías, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 12 Cyjaꞌtzun o japun aju otok tma Kman te Jehú, ka oꞌcx tuꞌn toc jun tcyꞌajal, jun tchman ex jun ttxca tchman te rey cye aj Israel.

13 Otok bant 39 abkꞌi ttzyetlen tcawin Uzías aju rey te Judá, tej ttzyet tcawin Salum aju tcyꞌajal Jabes. Pero nok jun xjaw o cawin tuj Samaria, 14 porque ate Manahem aju tcyꞌajal Gadi tzaj tuj Tirsa ex pon tuj Samaria, oc tzokpaj tiꞌj Salum, cub tbyoꞌn, ex te tibajxi axtzun o cawin te t-xel.

15 Aju chꞌintl txꞌolbaben tiꞌj Salum, tucꞌix tiꞌj tej tjaw tiꞌn tib tiꞌj Zacarías, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.

16 Cubtzun t-xitun Manahem aju tnam Tifsa, ex e cub tbyoꞌn ke xjal ateꞌ tuj tnam cyucꞌix keju ateꞌ tiꞌjele xiꞌx keꞌ tuj tnam Tirsa. Ax icx cuꞌx tjakoꞌn cycꞌuꞌj cycyakil ke xuꞌj chꞌixtok tul itzꞌj cyal. Tbincha icju tuꞌnju cycꞌiꞌtok xjal tuꞌn toc Manahem te cyrey.

17 Otok bant 39 abkꞌi ttzyetlen tcawin Azarías aju rey te Judá, tej ttzyet tcawin Manahem aju tcyꞌajal Gadi cyibaj aj Israel, ex o cawin laj abkꞌi tuj Samaria. 18 Pero akeju tbinchben mya baꞌn e ela tuj twitz Kman, porque mintiꞌ el tpaꞌn tib cyiꞌj ke il tbincha Jeroboam aju tcyꞌajal Nabat, aju e binchan ke aj Israel il tuꞌn.

19 Oc tzokpaj Pul aju rey te Asiria cyiꞌj aj Israel, ex atzunte Manahem xi tkꞌoꞌn wuk syent tucꞌil 26 quintal sak pwak te, tuꞌntzun tonin tiꞌj tuꞌn toc tipumal tcawbil. 20 Xi tkꞌoꞌn Manahem jun orden cye cycyakil aj Israel akeju kꞌinun, tuꞌn tchjet jun chojenj cyuꞌn, mas te jun libr sak pwak tuꞌn junjun tuꞌntzun tchjet aju tajlal lu te rey te Asiria. Cyjaꞌtzun aj meltzꞌaj rey te Asiria tuj ttxꞌotxꞌ, ex mintiꞌ ten mastl tuj cytxꞌotxꞌ aj Israel.

21 Aju chꞌintl txꞌolbaben tiꞌj Manahem ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 22 Cyimtzun Manahem ex aju o cawin te t-xel, atzun Pekaía aju tcyꞌajal.

23 Otok bant 50 abkꞌi ttzyetlen tcawin Azarías aju rey te Judá, tej ttzyet tcawin Pekaía aju tcyꞌajal Manahem cyibaj aj Israel, ex o cawin cabe abkꞌi tuj Samaria. 24 Pero mya baꞌn e ela ke tbinchben tuj twitz Kman, porque mintiꞌ el tpaꞌn tib cyiꞌj ke il tbincha Jeroboam aju tcyꞌajal Nabat, aju e binchan ke aj Israel il tuꞌn.

25 Pero ax jun xjal at toclen ttxlaj, Peka tbi, aju tcyꞌajal Remalías, jaw tiꞌn tib tiꞌj, ex e onin 50 xinak aj Galaad tucꞌil, oc tzokpaj tiꞌj tuj Samaria tuj ja maꞌ twaꞌl jatum cyocx ke soldad xkꞌukil tja rey, ex cub byoꞌn rey tuꞌn, tucꞌix Argob ex Arie. Te tibajxi ax o cawin te t-xel.

26 Aju chꞌintl txꞌolbaben tiꞌj Pekaía ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.

27 Otok bant 52 abkꞌi ttzyetlen tcawin Azarías aju rey te Judá, tej ttzyet tcawin Peka aju tcyꞌajal Remalías cyibaj aj Israel, ex o cawin winkin abkꞌi tuj Samaria. 28 Pero mya baꞌn e ela ke tbinchben tuj twitz Kman, porque mintiꞌ el tpaꞌn tib cyiꞌj ke il tbincha Jeroboam aju tcyꞌajal Nabat, aju e binchan ke aj Israel il tuꞌn.

29 Tuj tkꞌijlalil tej toctok Peka te rey cyibaj aj Israel, pon Tiglat-pileser aju rey te Asiria ex e tzyet ke tnam lu tuꞌn: Ijón, Abel-bet-maaca, Janoa, Cedes, Hazor, ex ju txꞌotxꞌ cye aj Galaad ex cye aj Galiley, tucꞌix tcyakil txꞌotxꞌ cye tiyjil Neftalí, ex akeju xjal najl cyuj e jeꞌx tiꞌn pres tuj Asiria. 30 Jawtzun tiꞌn tib Oseas aju tcyꞌajal Ela tiꞌj Peka aju tcyꞌajal Remalías, oc tzokpaj tiꞌj ex cub tbyoꞌn. Cyjaꞌtzun tten o cyaj ten te cawil te t-xel, tej otok bant winkin abkꞌi ttzyetlen tcawin Jotam aju tcyꞌajal Uzías.

31 Aju chꞌintl txꞌolbaben tiꞌj Peka ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.

32 Otok bant cabe abkꞌi ttzyetlen tcawin Peka aju tcyꞌajal Remalías, tej ttzyet tcawin Jotam aju tcyꞌajal Uzías tuj Judá. 33 Toctok Jotam twiꞌ 25 abkꞌi tej ttzyet tcawin, ex kaklaj abkꞌi o cawin tuj Jerusalén. Aju ttxuꞌ Jotam Jerusa tbi ex tmeꞌjel Sadoc.

34 Baꞌn e ela ke tbinchben Jotam tuj twitz Kman, ic tzaꞌnx ke tbinchben Uzías aju ktzan tman. 35 Baj tbinchaꞌn aju pwert te ttxaꞌn tpeꞌn tja Kman, aju tjawsaꞌn te jawni. Masque icju, pero mintiꞌ e jeꞌl tiꞌn ke ja in che ajben te cycꞌulbil xjal cywiꞌ ke witz, jatum cucx xi cykꞌoꞌn tnam xjal ke chojbil, ex cucx cub cypatun storac.

36 Aju chꞌintl txꞌolbaben tiꞌj Jotam ex tiꞌj tcyakilju o tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Judá.

37 Tuj tkꞌijlalil lu tzaj t-samaꞌn Kman Rezín aju rey te Siria, tucꞌix Peka aju tcyꞌajal Remalías, kꞌojlel tiꞌj Judá, ex cucx e ul kꞌojlel te tibajxi. 38 Tejtzun tcyim Jotam, cuꞌx makuꞌn cyxol ktzan t-xeꞌchel tuj tnam Ttanmi David tbi, aju ktzan t-xeꞌchel. Te tibajxi aju o cawin te t-xel, atzun Acaz aju tcyꞌajal.