3 Toctok Uzías twiꞌ kaklaj abkꞌi tej ttzyet tcawin ex o cawin 52 abkꞌi tuj Jerusalén. Aju ttxuꞌ, Jecolías tbi ex ax aj Jerusalén. 4 Ke tbinchben Uzías baꞌn e eꞌla tuj twitz Kman, ic tzaꞌnx ke tbinchben Amasías aju ktzan tman. 5 Oc tilil tuꞌn tuꞌn tajben te Dios tej itzꞌtok Zacarías aju xnakꞌtzante te tuꞌn tniman te Dios. Ex tej cucxtok tajben te Dios, o onin Dios tiꞌj tuj tcyakil.

6 Xiꞌ Uzías tuꞌn tkꞌojin cyiꞌj aj Filistey ex cub t-xitun aju muro toc tiꞌj tnam Gat, aju muro toc tiꞌj tnam Jabnia ex aju muro toc tiꞌj tnam Asdod, ex e jaw tbinchaꞌn ke tnam tuj txꞌotxꞌ at tuj tcwent tnam Asdod ex cyuj mastl lugar cyxol aj Filistey. 7 O onin Dios tucꞌil tuꞌn tcub cyiꞌj aj Filistey ex aj Arabia tuꞌn, akeju najlke tuj tnam Gur-baal tbi, ex tuꞌn tcub cyiꞌj aj Meunit. 8 O chjet chojenj cyuꞌn aj Amón tucꞌil Uzías, ex aju tkanil tiꞌj Uzías o pon max tuj tmojonil Ejipt, porque aju tipumal o chꞌiyxix wen.

9 Ax icx e jaw tbinchaꞌn ke ja maꞌ cywaꞌl twi muro tuj Jerusalén: Jun tibaj Pwert Escyin tbi, juntl tibaj Pwert Chkꞌajlaj tbi ex juntl tibaj t-scyinil muro, ex e baj tcyuwsaꞌn wen. 10 Ax icx e jaw tbinchaꞌn ke ja maꞌ cywaꞌl tuj lugar tzkij txꞌotxꞌ, ex e cuꞌx tjakoꞌn nimcu xoch, porque attok nim twacẍ, tzaꞌnx tuj chkꞌajlaj t-xe witz, ax icx cyuj ke chkꞌajlaj ttzi nima. Ax icx ateꞌtok ke tmajen in che akꞌnan cyuj ke cojbil ex cyjakꞌ ke tkan uva aju tzyuꞌntok tuꞌn tuj tiwitz txꞌotxꞌ, ex cyjakꞌ ke tkan tawal, porque nim tgan tiꞌj tuꞌn takꞌnet txꞌotxꞌ.

11 Ax icx ke t-soldad Uzías xnakꞌtzamnike tuꞌn cykꞌojin, ex tuj cꞌlojin in che ex tuj kꞌoj ic tzaꞌnx ju list bant tuꞌn Jehiel aju aj tzꞌibal te rey, ex tuꞌn Maasías aju at toclen ttxlaj rey, ic tzaꞌnx ju orden tuꞌn Hananías, jun cyxol ke nejenel at ttxlaj rey. 12 Aju cyajlal ke nejenel cye junjun cꞌloj cyiyjil akeju cyuw cycꞌuꞌj tuj kꞌoj, japun cab mil tucꞌ kak syent cybet. 13 Aju cyajlal soldad ateꞌtok tuj cycwent tuꞌn tcyakilx, attok ox syent mil tucꞌil wuktl mil tucꞌ jweꞌ syent soldad xnakꞌtzamnike tuꞌn cykꞌojin ex at nimxix cyipun tuꞌn cyonin tiꞌj rey cyuj ke kꞌoj in che oc tuꞌn. 14 Xi tkꞌoꞌn Uzías ke makbil in che ajben tuj kꞌoj cye cycyakil t-soldad, cyucꞌix ke lans, ke pasbil cꞌuxbil, ke chicyet cꞌuxbil, ke xobl plech ex ke xobl abj tuꞌn cyajben cyuꞌn. 15 Ax icx e cub tbinchaꞌn ke máquina tuj Jerusalén tuꞌn cyajben tuj kꞌoj ex tuꞌn cyxi xoꞌt ke plech ex ke nmak abj; ake jlu e bant cyuꞌn ke injenyer tuꞌn cyocx ten cyuj ke ja maꞌ cywaꞌl ex cyibaj ke muro mas maꞌ cyjawsaꞌn. Aju tkanil tiꞌj Uzías el lakꞌeꞌ najchak wen, porque nim o onin Dios tiꞌj tuꞌn tten nimxix tipumal.

16 Tejtzun tten nim tipumal jaw tniman tib, ex tuꞌntzun jlu o naj. Mintiꞌ xi tniman tyol Kman aju Tdios, porque ocx tuj tja Dios tuꞌn tcub tpatun storac tibaj altar te patbil storac. 17 Xi lpeꞌ ju pal Azarías tiꞌj cyucꞌix 80 pal ucꞌin tuꞌn, in che ajben te Kman ex miban che xob, 18 oc cymayoꞌn ex xi cymaꞌn te: Aya rey Uzías, mintiꞌ toclena tuꞌn tcub tpatuna storac twitz Kman, nok oꞌcx ke pal at cyoclen tuꞌn tcub cypatun storac, akeju tiyjil Aarón, ex akeju xjansaꞌmaj tuꞌn cybinchante jlu. Texa tuj tja Dios porque ma tzicꞌa tibaj tley Kman, ex mlay jaw nimsaꞌna tuꞌn Dios tiꞌj jlu.

19 Kꞌiꞌntok jun xawcꞌ tuꞌn Uzías tuꞌn tcub tpatun storac, ex tej tbinte jlu tzaj nim tkꞌoj cyiꞌj pal. Textzunju or lu tujx tja Dios, twitz altar te patbil storac ex cywitzx ke pal, jaw jlet txꞌaꞌc tibaj twitz, aju txꞌaꞌc mintiꞌ kꞌanbil tiꞌj. 20 Atzunte tnejel pal Azarías cyucꞌix mastl ke pal, tej t-xi cyqueꞌyin tiꞌj, o cyil otok jaw jlet txꞌaꞌc tibaj twitz, aju txꞌaꞌc mintiꞌ kꞌanbil tiꞌj, jurattzun etz cyiꞌn naj tuj tja Dios, ex tuꞌnx tib etz naj, porque tuꞌn Kman otok cub tcastiw.

21 Yabxtok taꞌ rey Uzías tuꞌn txꞌaꞌc mintiꞌ kꞌanbil tiꞌj tejxi tcyim. Cyjaꞌtzun o ten rey tuj jun ja tjunalx te, tuꞌnju yabtok tuꞌn txꞌaꞌc mintiꞌ kꞌanbil tiꞌj ex oc mayoꞌn tuꞌn miꞌn tocx tuj tja Dios. Ate Jotam aju tcyꞌajal cyaj ten te t-xel tuj tja rey, ex o cawin cyibaj xjal.

22 Aju chꞌintl txꞌolbaben tiꞌj Uzías, atxix tej tkeꞌ tcawin ex tejxi tpon baj, o cub tzꞌiban tuꞌn Isaías aju t-sanjel Dios ex tcyꞌajal Amoz. 23 Tejtzun tcyim Uzías, atzun cuꞌx makuꞌn tuj jun camposant cye rey, pero mya ax cyxol ke mastl rey akeju ktzan t-xeꞌchel, tuꞌnju yabtok tuꞌn txꞌaꞌc mintiꞌ kꞌanbil tiꞌj. Te tibajxi, aju o cawin te t-xel, atzun Jotam aju tcyꞌajal.